Read Hrangkhol 2 THESALONIKA toc2 2 THESALONIKA 1 Bible Online

2 THESALONIKA toc2 2 THESALONIKA 1 - Hrangkhol bible

2 THESALONIKA toc2 2 THESALONIKA 1

¹Paula, Silvana le Timothea khan Thesalonika khuaa Pathian ei Pa le ei Rengpa Jisua Krista koiindanghai chubai ki mûk.

²Pa Pathian le Rengpa Jisua Krista kuang ata lungkhamna le irngeina nin kuang om ri se.

³Urênghaio, nangni sikin Pathian kuang lômthu hril mai hrang kin nia, kha kha kin itho hrang pial a ni. Iamnaa chung nin tuar tak taka, nin rênga lung nin irthung irhlômna khom an thûk tîr tîr a ni.

⁴Dengintheina le intak tinrêng dorôi takin nin tuanga, iamnaa nin detzia le nin dorôizia hai hi koiindanghai laia nangni kin song ngai a ni.

⁵Pathian Ram sika tuang nin nia, khataka lût inruk nin ni theina hrangin. Pathian roirêl dikzia inlangna nin ni.

⁶Pathian chu dik takin thil a tho ngaia, deng nangni intheitirtuhai chu intakna’n thuan a ti.

⁷Rengpa Jisua kha irvân ata ama vântîrtôn sinthothei takhai le meichok laia a zuang inlang tika, nangni intak tuanghai hi hong irngamtir a ti, keini khom ni’rngamtir a ti.

⁸Pathian inhre loihai le ei Rengpa Jisua Krista Thurchi Sa iam nuam loihai chunga phuba a lâk tika chu kha mihai khan hremna tuang an ti.

⁹Kha mihai kha Rengpa makunga le a sinthotheina roiinpui taka irthokin kumkhua siatnaa khan pai ni an ti.

¹⁰A mi’rthiang, ama iamtuhai kuang ata roiinpuina le chôiindômna dong hranga a zuang tika chu, kin thuhril nin lei iam sikin nangni chu kha iamtuhai laia khan kop sa nin ti.

¹¹Hi sika hin Pathianin nangni a ikoina irphua nin om theina hrang le sat nin nuamna murdi le iamna sika nin sinthohai kha, a hrâtnaa nangni ar kiptir theina hrangin, mong loiin nangni kin chongchai pe ngai.

¹²Khanchu ei Pathian le Rengpa Jisua Krista lungkhamna zâra, ei Rengpa Jisua irhming kha nin laia chôiindôm ni a ta, nangni khom ama zâra chôiindôm ni nin ti.