Read Hrangkhol 1 TIMOTHEA toc2 1 TIMOTHEA 4 Bible Online

1 TIMOTHEA toc2 1 TIMOTHEA 4 - Hrangkhol bible

1 TIMOTHEA toc2 1 TIMOTHEA 4

¹Zoro hnungkhôna chu mihaiin iamna thu hi la’rheisan an ti, irtha dikloi la iam an ta, ramilhlihai irchutirna la zui an tih ti irtha fel takin an sîr.

²Kha thu irchutirna inthek indartuhai kha sia le sa inhriatna cho, thîr irlinga eminchâr nei ang, milakthei an ni.

³Mi senkhatin innei le thil senkhat fâk hi dik mah tiin mi an khapa. Khannisianlân, Thutak inhre tâk, iamtuhai chu lômthu insîr puma fâk hrangin Pathian isiam a nih ti an inhriat.

⁴Pathian thilsiam murdihai hi a saa, ite pai hrang om ma; lômthu insîr puma fâk hrang a ni.

⁵Pathian thu le chongchaina’n ar hlan irthiang zit ta.

⁶Hi kaihruainahai hi urênghai hrilin lân, Krista Jisua sinthotu sa ni ini hrang a ni; iamna thu le irchutirna sa ni zôm ngai ang khan irtha tianga nang irsôntir sa ri se.

⁷Khannisianlân, Pathian mahrip loia, pitarhai thonthu dukdakloi mai mai irheisanin lân, Pathian ngaisakna tiang thila irsep roh.

⁸Taksaa irsep hi an lâpa, irtha tianga irsepna len vâng chu lam tinrênga an lâpa, atûn hring sûng le nakan hringnun hrangin an lâp tak tak a ni.

⁹Hi thu hi a dika, pom zôi zât a ni.

¹⁰Pathian hring kha ei isabei irnghatna a ni tak tak a ni. Ama kha mi murdi ta hrangin saninhringtu a nia, iamtuhai ta hrangin a ni lele sa.

¹¹Hi thuhai le irchutirnahai hi urênghai pêkin lân, irchutir zui mai roh.

¹²Ni nâiinpang sikin tûte’n nang manêp no ri sehai, thu’nsîrna lama, omlam dâna, lungthungna lama, irthiangna lama, iamtuhai entonrua ni roh.

¹³Ki zuang mân chu vântâng laia Pathian thu tep hai, thuhril hai, irchutirna hai lei uar roh.

¹⁴Upahaiin ni chunga kut irnghat laia deipuhai insîr anga irtha tiang thilpêk ni idonghai kha inthâ no roh.

¹⁵Hmang zui maiin lân, tuina taka neiin lân, khanchu mi tinin ni masôn mai lam an ihmu hrang a ni.

¹⁶Ni sintho le irchutirnaa a sân irdînin lân, hi hi tho maiin lân, nangma le ni thu irngaituhai ni isaninhring hrang a ni.