Read Hrangkhol 1 TIMOTHEA toc2 1 TIMOTHEA 6 Bible Online

1 TIMOTHEA toc2 1 TIMOTHEA 6 - Hrangkhol bible

1 TIMOTHEA toc2 1 TIMOTHEA 6

¹Pathian irhming le ei irchutirna thu insîrinsiata, a om nona hrangin siahlohaiin an puhai kha itinrêng chunga chôiindôm inrukin bê ri sehai.

²Suak, Kristian pu neihaiin chu iamnaa urêng an ini songin an puhai kha an ingainêp hrang ni mah, sa nôk ualin sin an itho pehai hrang a ni; an sinthotuhai le iamna le lungthungnaa in sûngkhat an ini kêng. Hi hi ni irchutirin ni inthorna hrang chu a ni.

³Tukhom ei Rengpa Jisua Krista thu dik le sakhua irchutirna thu irkala irchutirna dang irchutir chu,

⁴mi’nvêt, lârirpâk tak, ite inhre loi an ni; insîr hrang zong thei tak, irsêlna nuam, irhnarsa hai, irsualna hai, Pathian hrilsiatna hai, irsêl mongnaboi insuaktu an ni.

⁵Lungrîl siat tâk, thudik man phâk ta loi, sakhua hi irchongna hranga hmang tumhai an ni.

⁶A ni, Pathian ngaisakna hin mihriam ar chongtir ngai, a thil neia khan a milung a chukin chu.

⁷Rammuala hin ite lûtpui mak mea, ite suakpui thei ual no ih.

⁸Khasikin, fâk hrang le silkai hrang ei neiin chu ei milung inchuk ei ti.

⁹Irchongna nuam mihai chu inthêmnaa an lûta, huatirhamna invêt, châng ichiom taka an in-ôka, an siatpuia, an irhmang ngai a ni.

¹⁰Sum irngaiinnat hi sual tinrêng bul a ni, Sum nei intam an itumna tiang senkhat chu iamna hi an pêtsana, chardongna tamtakin an lungrîl an bingin an suninkhoi ngai a ni.

¹¹Nang, Pathian mi, kha thilhai kha nangma’n chu rotsan roh. Felna hai, Pathian ngaisakna hai, iamna hai, lungthungna hai thuhnuairôlna hai, tuangdiarna hai, nunhoina hai, nei tum khak roh.

¹²Iamna hlu hi songin thei dôr insua roh; kumtuang hringna chu chel khakin lân, kha kha chang hranga koi ni ni, inhretu tamtak makunga iamna ni ipom thu ni inpuang kha.

¹³Itinrêng hringna hnâr, Pathian le Krista Jisua, Pontia Pilata makunga chi viat loia, thudik thop ngittu makunga khan,

¹⁴ei Rengpa Jisua Krista a zuang inlâr nôkna, Nikhua dêna thupêk kha iamom taka zôm hrangin tum roh.

¹⁵An lârna kha chu a zoro taka Pathian inpâkrua le Roirêltu om sun, rênghai rêngtak le rênghai Reng khan intung a ni.

¹⁶Ama vai hi thi theiloi, nâisâiloi zât, vâra om, tûte la ihmu loi le hmu thei ni sa loi kha a ni, a kuanga chôiindômna le sinthotheina kumtuangin om ri se. Amen.

¹⁷Rammual mi irchonghai kha irsor loi hrangin hrilin lân, sum songloi ruaa irnghat tum loia itinrêng ei ihmang hranga ni pêktu Pathiana irnghat ual hrangin inthor roh.

¹⁸Thil sa tho hrangin, thil sa thoa irchong hranghai phal taka mi danghai sem sa ngai hrangin inthor roh.

¹⁹Khanchu, nakan tena irchon hlu tak an irsiam pe ni a ta, hringna tak tak an ichang hrang a ni.

²⁰O Timothe, ni chunga enkoltirna irnghat hi a sân vong irdîn roh. “Inhriatna dik,” tia an isong, dik ual loi, thu irkal, rammual mi tamtakin an irhnikpui ngai ata kha irkêm roh.

²¹Kha kha senkhatin an izôm sa, iamna lam ata an iboi tâk a ni, Pathian lungkhamna kha nin rênga kuanga om ri se.