Read Hrangkhol 2 TIMOTHEA toc2 2 TIMOTHEA 2 Bible Online

2 TIMOTHEA toc2 2 TIMOTHEA 2 - Hrangkhol bible

2 TIMOTHEA toc2 2 TIMOTHEA 2

¹Ki nâipa, nang chu Krista Jisua lungkhamna hin nang inhrât ri se.

²Khan, hriatpuitu tamtakhai laia keima rengata irchutirna chong ni inhriathai kha, mi dang irchutir nôk thiai hrangin, mi iamomhai kuang inkoltir roh.

³Krista Jisua sipai iamomtak angin intak ni tuangpui sa roh.

⁴Sipai chu a hruaitu inlômtir hrangin hi rammual thil danga tomirzêl ngai mah.

⁵Mi intân irsiat khom dân ang taka an tân no’n chu lômman hmu thei no ni.

⁶Loimâna sin takirtâipu ngêt khan a ra a idong masa hrang a ni.

⁷Ki insîr hi ngaitua sabakin lân, Rengpa’n lam tinrênga inhriat thiamna nang pe a ti.

⁸Thurchi Sa ki hril ngai, Jisua Krista, Davida irchia mi, mithi lai ata thoi nôk tâk thu kha inhre mai roh.

⁹Kha Thurchi Sa sika khan intak ki tuanga, mi sual ang dêna thîrhrui ikhit ki ni, Pathian thu chu khit zât ni ma.

¹⁰Krista Jisuaa om, saninhringna kha, kumtuang roiinpuina le an dong theina hrangin irtanhai sikin, hihai murdi hi ki ituang a ni.

¹¹Hi thu hi a dik a ni: “A thina ei kop sa’n chu, A hringna kop sa ei ti.

¹²Ei tuangin chu, Ama leh roirêl sa ei ti. Ei hnôlin chu, ni hnôl a ti.

¹³Iamom no khom inlân, Ama chu iam a om maia, A bingin a’rphil thei no sikin,” ti hi.

¹⁴Hi thu hi mihai inhriattirhai roh, Pathian irhmingin hrilin lân, thu irchua irsêlna ngai hi masan ri sehai, inlâpna om maka, a’rngaituhai an siatna mai mai a ni.

¹⁵Nangin chu Pathian nuamlam mi, sinthotu, mâni sin inzakpui loi, thutak chu dik taka hmang theitu ni tum khak roh.

¹⁶Rammual mihai thu dukdakloi kha irheisan roh, kha khan Pathian ngaisak loina tiang mi a hruai ngai.

¹⁷Pân saloi angin an thu irchutir kha a zap ngai; an laia Humenaia le Fileta kha a bulpui an ni.

¹⁸Thutak chu an pêtsana, “Thoinôkna chu a om chian ta” an tia, mi senkhat iamna khom an irhmangtir ngai.

¹⁹Khannisian, Pathian lungphûm det tak kha chu inhnîng thei ma, ama khan hi chong hi irziak a om: “Rengpa’n ama tahai chu an hriat,” iti le “Tukhom Rengpa ta ki nih ti murdi’n chu sual hnung a isongsan ngêt hrang a ni,” ti hi.

²⁰In roiinpui taka bêlbûrhai khom rângachak le suma siam ni zit mahaia, pilsoia siamkhôm a ni, senkhat a hlu ual, senkhat hlu loi ual.

²¹Hi thil saloi ki insîrhai ata irkêm mi hi chu hmangrua hlu, in Neitupa hrangin hmang zât, irsûkinfâi diam, sin sa tinrêng sinna hranga hmang zôi thei hranga irsiam chak ang hi lei ni a ti.

²²Thoibop irzukna hai chu irheisanin lân, milung irthiang taka Rengpa irlamtuhai le felna hai, iamna hai, lungthungna hai, irngeina hai irzûl roh.

²³Hi isêlna inlâploi le invêtom hi irheisan roh, irdoina an suaktirna mai mai a ni.

²⁴Rengpa siahlo chu irhal a iuar hrang ni ma, tukhom inrenthei, irchuthei, mi tuangdiarthei a ini hrang a ni.

²⁵Ama doituhai khom tuangdiarthei takin a suiôi hrang a ni, thutak inhre hrangin Pathianin an lungrîl a irlettir zôi thei.

²⁶Diabola chânga in-ôk, a nuamlam a inthotir ngaihai kha hong suakin la hong har suak an ti.