Read Hrangkhol 2 TIMOTHEA toc2 2 TIMOTHEA 3 Bible Online

2 TIMOTHEA toc2 2 TIMOTHEA 3 - Hrangkhol bible

2 TIMOTHEA toc2 2 TIMOTHEA 3

¹Sûn hnungkhôna chu zoro intak tak la tung a ti, ti inhre roh.

²Mâni hrang satna zonghai, sum irngaiinnat hai, irsong hai, irpâkna hai, Pathian insîrinsiat hai, nu le pa thu zôm loihai, lômna neiloi hai, irthiang loi hai,

³Irzirpui lungthungna nei loi hai, mi nunsia hai, mi hnôl ngai hai, irdîntheiloi hai, mi nunrông hai, mi that nuam hai, a sa nuam viat loi hai,

⁴Vârirlet hai, milung hrât hai, irngaiinhlu hai Pathian lungthung nêkin mâni lômna vai lungthung ualhai la suak an ti.

⁵A chungphua tiang chu sakho mi ang ni an ta, khannisianlân, a sûng tiang chu takna nei ual loihai la om an ti. Khaang mihai kha chu hnung songsanhai roh.

⁶Khahai laia mihai kha kêng in sûnga lûta, sual puakrik nupang into ualhai suaka a man ngai.

⁷Kha nupanghai kha irzukna tinrênga hruai irhmang, inhriat tum maia thutak inhre thei viat loihai an ni.

⁸Jannia le Jambria’n Mosia an idoi anga khan, kha mihai khom khan thutak hi an doi ngai, lungrîl siat zoi tâka, iamna lama khom Pathian nuamloina lam mi an ni.

⁹Khannisianlân, kha vai kha tho no ni, mi tinin an intozia an hmu hrang sikin. Kha tak kha, Jannia le Jambria chunga khom a itung a ni.

¹⁰Nangma’n chu irchutirna hai, ki om dân hai, ki thil tum hai, ki iamna hai, ki tuangdiarna hai nin hriat.

¹¹Antiokei-a hai, Ikoniona hai le Lustra khua haia dengintheina le intakna tak tak ki chunga zuang tunghai dengintheina hai ki ituang irkhêlzia le khatak ata Rengpa’n a ni isansuak thu hai kha nin hriat.

¹²Tukhomin Krista Jisua nunhoi tak anga om an tum photin chu denginthei ni ngêt an ti.

¹³Mi sualhai le tho pa paihai chu an dongtum hong siat tîr tîr an ti, mi dang huang ngai khomsian anni ngei khom huang an ti.

¹⁴Nang chu, nir chu tâk, ni pom indet tâk kha te, chel khak roh, tu mo nang irchu nin hriat.

¹⁵Ni nâipangte ata Lekha irthiang kha nin hriat sa tâka, Jisua Krista iam sika saninhring ni hranga vârna nang a pêk thei ti nin hriat.

¹⁶Lekha thu murdi hi Pathian phûkkhum a nia; ir-en indikna hranghaiin, irsiaminsatna hranghaiin, nun dân dik irchutirna hranghaiin an lâp tak tak a ni.

¹⁷Khaanga hmangin kêng Pathian mi chu hmang inruk a hong nia, thil sa tinrêng thothei hranga irbel a hong ni ngai a ni.