Read Hrangkhol TITA toc2 TITA 1 Bible Online

TITA toc2 TITA 1 - Hrangkhol bible

TITA toc2 TITA 1

¹Kei Paula hi, Pathian siahlo le Jisua Krista tirtôn, Pathian mi izenhai iamnaa kaihruai hrang le

²sakho lam thudik, kumtuang hringna sabeina chu, inhriattir hranga inkung ki ni.

³Milak tho ngailoi Pathian khan, kha kha irnêng irsiang mân daiha a lei inkung tâka, ama thu ang dênin sa a ti zoro taka a zuang inlangtir ta, a ni Saninhringtu Pathian thupêk anga, kha Thurchi Sa inpuangna sin kha inkoltir ki ni.

⁴Tita, ki irkoppui iamnaa ki nâi tak tak kuanga ki irziak a ni: Pa Pathian le ni Saninhringtu Krista Jisua lungkhamna le irngeina nang pe ri se.

⁵Thil infel ban infel hrangin Kret chômbunga nang ki imâk a ni, thu nang ki ipêk ang khan kho tina upahai phun pehai roh.

⁶Upahai chu demnaboi, dôngma inkhat nei an ini hrang a ni; an nâihai khom iamtu a hoihôkna tianga sêlnaboi le tukullian ni no ri sehai.

⁷Koiindang hruaitu chu Pathian sûngkua enkoltu a nia, demnaboi ni ri se; mâni thu ringot nuam, milunginrem, zu’n rui mi, mi zêm song, porinche taka hlep nuam mi ni no ri se.

⁸Mi lôm dân thiam, insumthei, mi’nthîk, mi irthiang, mâni irsep thei mi ni ri se.

⁹Irchutirna dik takin mi an thor theina hrang le kha irchutirna sêltuhai kha thiamno an changtirhai theina hrangin irchutirna ang tak thurin iamom kha pom khak mi a ini sa hrang a ni.

¹⁰Dân ni loi anga om, thuhril mai maihai le huangtuhai tamtak an oma, sertanhai laia mi an ni ual tak.

¹¹Khahai bâi kha hîp pehai hrang a ni; a sûngkua kuain mihai an inbuaihaia, sum hmu hrang sabeiin irchutir loi hrang hrang mi an irchutir ngaia.

¹²Kret mi ngei, anni deipu inkhat khomin, “Kret chômbunga mihai hi milak thei, sahrâng pualoi, thaboi rôlruakhai an ni,” a iti hi thudik tak a iti a ni.

¹³Khasikin, iamna hrisêl an nei theina hrangin, na ianin irkôkhai roh.

¹⁴Judahai thonthu mai mai le thutak irheisan tâkhai thu zôm ta no ri sehai.

¹⁵Mi irthianghai ta hrangin chu itinrêng hi a’rthianga, mi porinchehai le iamna nei loihai ta hrangin chu ite hi irthiang om mah, an milung le an sia le sa inhriatna dênin a iporinche a ni.

¹⁶Pathian inhriatin an irtia, porinchehai, thu zôm loihai, thil tinrêng thôna lama Pathian nuamloi lamhai an ni, (an sintho khan a philhai ngai.)