Read Hrangkhol TITA toc2 TITA 2 Bible Online

TITA toc2 TITA 2 - Hrangkhol bible

TITA toc2 TITA 2

¹Nangma’n chu irchutirna hrisêl ni irchutir mai hrang a ni.

²Putarhai chu insumthei, mahripom, irsepthei, iam dân dik, lungthungna nei mi le mi khonza thei ni hrangin inthorhai ro.

³Khaang dênin pitarhai khan an om lama Pathian chi mi ni hrangin inthorin lân, mi nuiso uar, uain indu mi ni no ri se; thil sa irchutir uar sianlân,

⁴nuvenghai chu an pasalhai le an nâihai lungthung mani,

⁵insumthei mani, irthiang mani, in sûng omlam sa mani, khonzâna mani, pasal thu zôm hranga an irsep theina hrangin inthor ro. Khanchu, Pathian thu chu hrilsiata a om loina hrangin.

⁶Khaang dênin pavenghai khom mâni irsep hrangin inthor roh.

⁷Nangma len vâng chu thil sa tinrêng thôna lama entonrua takin omin lân, mahripom tak le a sate’n mi irchutirin lân,

⁸chongbâi hoi, demna hrang om loi hmang ngai roh, a le tiang an inzakna hrangin.

⁹Suakhai chu lam tinrênga an puhai kuang irpelût hrangin inthorhai roh; an nuamlamin omhai sianlân, an ithuanhai tur hrang ni mah.

¹⁰An puhai neinun an inrûk hrang ni mah. Inrûk nêkin, Pathian ni Saninhringtu hi mihaiin an iam nuam theina hrangin itiklai khomin mi sa le iamom an nih ti an inlang ual hrang a ni.

¹¹Mi murdi saninhringa an om theina hrangin Pathian lungkhamna kha inlangtir a hong ni ta.

¹²Atûnlai zoro hin Pathian uksak loina le rammual tiang thil masanin mâni irvong infela, dik taka omhai le Pathian uksakna nunhai a ni’rchutira.

¹³Ei Pathian roiinpui taka a zuang inlangna nikho lômom ei isabei hi hlo’nchuk zoro ei inghâk a ni.

¹⁴Ama ngei chu ei ta hrangin a’rpêka, tho’nsualna tinrêng ata a nir tan suaka, ama mi hrangin a ni’rthiangtira, thil sa tho nuamna a ni ipêk a ni.

¹⁵Hi thuhai hi ni ihril hrang a ni, inthorin lân, irchamnei takin ngohai ro. Tûte’n nang ngainêp no ri sehai.