Read Hrangkhol HEBRAI toc2 HEBRAI 1 Bible Online

HEBRAI toc2 HEBRAI 1 - Hrangkhol bible

HEBRAI toc2 HEBRAI 1

¹Tianlai khan Pathianin ei irchibulhai kuang a deipuhaia zoro tamtakin lam tinrênga thu a lei insîr ngaia.

²Khannisianlân, sûn hnungkhônhai hin chu ei kuanga a Nâipa thu an sîr ta. Amaa khan Pathianin irnêng le irvân a siama, khabana ama kha sûn hnungkhônhaia chu thil tinrêng dong zit hrangin a iphun a ni.

³Ama chu a Pathian roiinpuina vâr le, a tak angpui ngei le, ama sinthotheina thua itinrêng indingtu neiin, sualhai a’rthiangtir hnungin chung tianga Roiinpuitak chang tianga khin a hong toi ta.

⁴Vântîrtônhai irhming nêka irhming roiinpui a nei tâka, khanchu anni nêkin a roiinpui ual a ni.

⁵Pathianin hi chong hi vântîrtônhai kuang ti viat ngai mah, “Nang chu ki Nâipa ni ni; A vuan sûn hin ni Pa ki hong ni ta,” ti hi. Khabana, Pathianin tu vântîrtôn thu khom insîrin, “Keima a Pa ni ki ta, Ama kha, ki Nâipa ni a ti,” ti chong hi ti ngai mah.

⁶Kha nêkin, Pathianin a Nâi lutîr kha rammuala a zuang tîr hrang laiin, “Pathian vântîrtôn murdihaiin Ama chubai an imûk ngêt hrang a ni,” a iti ual a ni.

⁷Vântîrtônhai chungchâng chu Pathian Thu’n hiang hin a ti, “Pathianin vântîrtônhai chu phâivua’n a siam ngaia, A sinthotuhai meichokin a siam ngai,” a tia.

⁸Nâipa chungchâng rêk chu Pathianin ama hi a iti a ni, “O Pathian, nin lalna ram chu kumtuangin om mai a ti! Ni mihai chunga felna’n roi ni rêl ngai.

⁹Thudik nir ngai inhlua, thudikloi ni hnôl ngai. Khasikin Pathian, ni Pathian khan nang inthangin ni hmêlhai nêkin chôiirsâng raifânna nang a ipêk ual ok tâk a ni hi,” ti le.

¹⁰“Nang Rengpa’n a phuta irnêng ni siama, irvân khom ni kut ngeia ni isiam a ni.

¹¹Khahai kha la boi an ta, nang chu om mai ni ti; Khahai kha silkai angin la milui an ti.

¹²Puan angin inzuat ni ta, Silkai angin thûl ni ti. Nang chu a ngai dên nih ni ta, Ni kumhai khom boi no ni,” tiin.

¹³Pathianin vântîrtônhai laia tûte kuang hi chong hi ti ngai mah: “Ni râlhai ni kezapha sianaa ki siam mâka chu, Ki chang tiang hin toi roh,” ti hi.

¹⁴Khante, vântîrtônhai hi imo an ni? Vântîrtônhai chu irtha Pathian sinthohai an nia, saninhringna hmu hranghai changpui hranga tîr suakhai an ni.