Read Hrangkhol HEBRAI toc2 HEBRAI 10 Bible Online

HEBRAI toc2 HEBRAI 10 - Hrangkhol bible

HEBRAI toc2 HEBRAI 10

¹Juda Dân chu thil tak ang zeka dûr irkip le entonna iamom ni maka, thil sa zuang irlang hrang irhlîm, a tak ni loi, a’rlim vai a ni. Kum tin irbôlna ngaingîr kha kumkhua’n an inhlan ngai a ni. Itin mo kha Dân khan khaanga irbôlnahai sika khan Pathian kuanga hong mihai kha famirkipin a isiam thei hrang?

²Pathian biaka honghai kha an sualhai ata irthokin an irthiang tak tak ni sianlân chu, suala inhriatna kha nei ta no nihaia, irbôlna kha irngam ta an ti.

³Kha nêkin hi irbôlna hin an sual tho, kum tin an hriat nontir ngai a ni.

⁴Sechalhai le kêlhai thisenin sualhai kha inboi zât ni mah.

⁵Khasikin, Krista’n rammuala a zuang hrang laiin Pathian kuang, “Irbôlnahai le thilpêkhai nuam mak chea, Keima ta hrangin takpum ni ni irfûk pe ual tâk.

⁶Sa pum hâlirvôm irbôlnahai sual inboina hranga irbôlnahai kha lôm viat mak che.

⁷Khanchu keima’n, ‘O Pathian, Dân lekhabua ki thurchi irziak ang khan, Ni lungdo sin hrangin keima hin ki om’ ki tia,” a tia.

⁸A masa’n, “Irbôlnahai, thilpêkhai, pum hâlirvôma irbôlnahai le sual irbôlnahai kha Dân ang taka inhlan ni khom sianlân nuam mak chea, lôm khom lei lôm mak che,” ki tia.

⁹Khanchu, “O Pathian, ni lungdo sin hrangin keima hin ki om,” a ti nôka. Khasikin Pathianin irbôlna miluihai kha an boi zita, khahai irthûla khan Krista irbôlna hi a isia tâk a ni.

¹⁰Jisua Krista’n Pathian lungdo a sina, a takpum ngei voikhat ar hlan rip sika khan, ei rêngin sual ata ei irthiang tâk a ni.

¹¹Juda Ochai tinin a nitin an sintum sinin irbôlna ngai dên kha voi tamtak an inhlan ngaia, khannisianlân, kha irbôlnahai khan sualna inboi thei viat mah.

¹²Krista’n chu kumtuanga hrangin sualhai ta hrangin irbôlna voikhat vai an hlana, kha hnung chu Pathian chang tiang a hong toi ta.

¹³A râlhai Pathianin a ke zapha siana’n a siam pe mâka chu ama khan a inghâk mai a ni.

¹⁴Irbôlna voikhat vaiin an sual ata irthiang tâkhai kha kumtuanga hrangin famirkipin a siam ta.

¹⁵Irtha Irthiang khomin hiang hin a nin hriattir:

¹⁶“Nikhua hong tung hranga an kuang, Thu ki intung hrang chu hi hi a ni; An milung sûnga ki dânhai sia ki ta, An lungrîla irziak sa ki ti,” a tia.

¹⁷Kha hnung, “An sualhai le an inchâinahai inhre mai ta no ning,” a ti nôka.

¹⁸Khasikin khaanga ngaidamna omna taka khan chu sual inboina hranga thilpêk nang ta mah.

¹⁹Khasikin urênghaio, Jisua thina sikin zalên takin Hmun Irthiang taka khan ei lût thei ta.

²⁰Ama khan puanzâr chu khêlin (kha kha a takpum tihna a ni) lam thar le lam hring a nin hong pe ta.

²¹Pathian in sûng mihai chunga Ochai roiinpui tak ei inei a ni.

²²Khasikin lungrîl dik le iamna irkip neiin, sia le sa inhriatna dikloi ata ei lungrîlhai irthiangtirin le ei takpumhai tui irthianga infâiin Pathian nâi ei ti.

²³Ei thurin hi chel indet ngit ei ti, Pathian chu a chonginkunga iamom a ti, ti ei irnghat thei sikin.

²⁴Lungirthung le sin sa sina inthor irhlôm hrangin ngaitua seng ei ti.

²⁵Senkhatin inkhôm mâksan an iuar angin uar no inlân, irthor nôk ual ei ti; Rengpa Nikhua chu a hong nâi tah ti nin inhriat sikin irthor irhlôm nôk ual ual ei ti.

²⁶Thutak ei inhriat hnung khomin ei la sual maiin chu sualhai inboi hrangin irbôlna om ta no ni.

²⁷A om hrang chu ichi puma Roirêlna le mei inthang Pathian doihai kângirhmang hrang nghâkna vai tâk kêng.

²⁸Tukhom Mosia Dân zôm loi chu, ama doiin mi inhni mani inthum mani inhriatpuitu an omin chu, lungkhamna boi zitin that a ni ngai.

²⁹Pathian Nâipa hnuaisiaa, Pathian thuthung thisen ama irthiangna kha itea bê loia, lungkhamna Irtha êro mi kha idôra dûk rik ual mo tuang sian nin irhoitir?

³⁰“Phuba rêng rêng keima lâk hrang a ni, Keiin thuan ki ti,” ti le “Rengpa’n a mihai ngaitua a ti,” titu hi ei inhriata,

³¹Pathian hring kuta tûk chu thil ichiom tak a ni.

³²Zoro thenga nin chunga thil omhai kha inhre mai roi. Pathian vârin nangni a êl hnungin kha laia khan dûk tamtak nin tuanga, khannisian, buaina khan nangni inhre mah.

³³Zoro khat chu mipui vântâng laia nangni êro’n deng nangni an intheia, zoro danga chu khaanga deng an lei intheihai leh hmunkhatin nin tuanga.

³⁴Mi’ntânghai tuangna kha nin tuangpuia, nin neinun murdi nangni an lâk pe lai khomin, kumtuanga sôi hrang thil sa ual nin la neih ti inhriatin, kha nin inchânna khom kha lôm takin nin ituang a ni.

³⁵Khanchu nin hâina kha irhmangtir no roi, lômman roiinpui tak a inei hrang a ni.

³⁶Pathian nuam lam nin sina, a inkung kha nin hmu theina hrangin diarna nin inang a ni.

³⁷Pathian Thubu’n, “Sôtnote hnunga chu a zuang hrangtu kha zuang ta a ti; Ir-ial ta no ni.

³⁸Khannisianlân, ki mi fel chu iamna’n hring a ti; Hnung tiang a’rtôlin chu a chunga lôm viat no ning,” a iti angin.

³⁹Eini chu hnung tiang irtôla a’rhmang hranghai ni mak mea, iamna neia saninhring ni hrang mi kêng ei ini.