Read Hrangkhol HEBRAI toc2 HEBRAI 11 Bible Online

HEBRAI toc2 HEBRAI 11 - Hrangkhol bible

HEBRAI toc2 HEBRAI 11

¹Iamna nei ti chu thil ei isabei kha a dik ngêt infel le thil ei ihmu loihai kha a om ngêt inhriat infel hi a ni.

²An iamna’n kêng zoro miluia mihai khan Pathian ipomna an lei idong ngai.

³Iamna’n rammual hi Pathian thua siam a nih ti ei inhriat, khaang khan, thil hmu theihai hi thil hmu thei loihaia siam a ni.

⁴Iamna’n Abela khan Kaina nêka irbôlna sa ual Pathian kuang an hlana. A iamna sikin a thilpêk kha ipomin a oma, mi fel a ni tiin Pathian pomna a idong a ni. Kha a iamna sika khan a thi hnung khomin thu a la insîr mai a ni.

⁵Iamna’n Enoka kha thina irtem loi hrangin Pathianin chung tiang a hruaia, tûte’n hmu ta mahai. Pathian Thubu’n, “Enoka kha chung tiang hruaiin a om mâka khan Pathian an lômtir ngai,” a tia.

⁶Iamna boiin chu tûte’n Pathian inlôm thei ngai mah. Iamna nei taka Pathian kuanga hong murdi’n chu ama chu a oma, ama zonghai kuang lômman a pêk ngai iti a iam ngêt hrang a ni.

⁷Iamna’n Nova khan, sûn matona thil a la ihmu theiloi Pathianin a hril laia khan, Pathian thu zômin irkuang a sina, kha irkuanga khan ama le a in sûng mihai saninhringin an om. Khasika khan, rammual kha thiamno an changa, iamna sika felna Pathian kuanga om kha a idong a ni.

⁸Iamna’n Abrahama khan, Pathianin ram pe hranga a inkung pea fe hrangin a koi laia khan Pathian thu zômin a fena hrang khom inhre loiin a suaka,

⁹Iamna’n Pathianin ram a inkung pea khan khual mi angin a oma, Pathian chonginkung dong sa, Isaka le Jakoba angin puan inhaia a oma.

¹⁰Abrahama’n khopui, lungphûm det nei, Pathian isiam le sin kha a nghâk mai a ni.

¹¹Iamna’n Abrahama kha a tar ok hnungin le Sari ngei khom a iching ni sian khom, Pathian chu a chonginkunga iam a om tiin a’rnghat ngit sikin pa a la ichang a ni.

¹²Abrahama kha a thi ang dôra om tâk ni khomsian, kha mi inkhata irthokin irchi, irvâna ârsi za le tuipui kôla chiai tep zoiloi dôr an irzir a ni.

¹³Iamna neiin kha mihai kha an ithi a ni. Pathianin a inkung pe kha dong phâk no khomsian, hla taka irthoka hmu’n an lei lôm tâka, irnênga hin khualmi le mi’nvâi an nih ti an lei inhriattir ta.

¹⁴Khaanga tihai khan chu an ram an ithîr a nih ti an lang.

¹⁵An ram hong mâk kha chu kan ta maka, kan sianlân chu kîr nôkna zoro’nchum nei ta an ti.

¹⁶Kha nêkin, ram sa ual irvâna om kha kêng an irngai. Khasikin Pathianin an Pathian irti kha inzak maka, an ta hrangin khopui ten khom a lei siam pe tâk sikin.

¹⁷Iamna’n Abrahama khan, fiaa a om lai khan a nâipa neisun Isaka kha, irbôlna’n a inhlan a ni. Pathian kuang ata chonginkung hmutu ni khom sianlân, a nâi irbôlna’n a la inhlan nuam a ni.

¹⁸Pathianin a kuang, “Isaka irthoka hin ni chihai ki inkung kha nei ni ti,” a ti pea.

¹⁹Pathianin Isaka kha thina irthok khomin a kaithoi thei tih Abrahama’n an hriata, Isaka kha thina irthokin a hmu nôk ti hrangin a om.

²⁰Iamna’n Isaka khan, sûn matona hrangin Jakoba le Esaua hai chunga satvurna chonga an kunga.

²¹Iamna’n Jakoba khan, a thi hrang tônin Josefa nâihai kha sat a vur seng senga, kha hnung chu a khianghrol hmor tûngin Pathian chubai a mûk tâka.

²²Iamna’n Josefa khan, a thi hrangin Israel irchihai Aigupta ata an suak hrang thu an sîra, a ruhai an ihrê hrang dân khom chong a mâk pehai.

²³Iamna’n Mosia kha a suak laiin, nâite hmêl satak a ni sikin a nu le a pa’n rêng thupêk chi loiin tha thum an thupa.

²⁴Iamna’n Mosia khan, a hong lian tena chu Faroa nâinu nâipaa irbe mai kha nuam ta maka.

²⁵Sôtnote sûnga sual inhoina hmang nêkin chu Pathian mihai leh dengtheina tuang an thang ual ta.

²⁶Krista sika hmusitna tuang kha Aigupta rama irchon murdihai nêka irchon hlu ualin a bêa, sûn matona a lômman hmu hrang kha a thîr mai sikin.

²⁷Iamna’n rêng ningmur kha chi loiin Aigupta ram a mâka; hmu theiloi Pathian kha a hmu sikin a ikîr nuam ta loi a ni.

²⁸Iamna’n Ferkân kût an siama, thisen kha mikothaia inthek hrangin thu a pêka, vântîrtôn khan Israelhai nâi lutîr chu a that loina hrangin.

²⁹Iamna’n Israelhai khan muanga fe ang dôrin Tuipui Sen kha an irkâna; Aigupta mihaiin chu irkân an tuma, tuiin an lemhai zita.

³⁰Iamna’n Jeriko kulpui kha Israelhaiin sûn sari an vêl zoiin chu a chim ta.

³¹Iamna’n Rahabi notizuar kha Pathian thu zôm loihai leh irhmang sa maka, Israel eninfeltuhai kha lunghoi tak le lôm takin a lei intunghai sikin.

³²Ki la insîr mai hrang mo? Gideona, Baraka, Samsona, Jeptha, Davida, Samuela hai le deipuhai thurchi insîr hrang lakin zoro nei ma ung.

³³Iamna’n ram pumpui an doia, an inhnêa, thil dik an sina, Pathian chonginkung an donga, kâmkeibaknei bâihai an hîp pea,

³⁴mei inthanghai an thata, khandaia that an zôk a ni. Hrât no an lei nia, khannisianlân, iamna’n an hrâta, Israel buala khan mi hrât an nia, nam dang râl pâlhai kha an inhnê ngai.

³⁵Iamna sikin nupanghaiin an urêng mithihai thoinôkna an hmua. Mi dang thoinôkna sa ual an dong theina hrangin kêlsua nuam mah.

³⁶Senkhat chu nuiza siamna’n an hmanga, an zêma, senkhat nôk chu kolbun le intângna ina an khum.

³⁷Lunga dêngin an oma, bong hnia âtin an oma, khandaia thatin an oma, Belra vun le kêl vun silin an invâia; inriangin, intak takin le dengtheiin an oma.

³⁸Kha mihai ta hrangin chu rammual hi om hmun hoi loi tak a ni. Mi’nvâi angin ramchârhaia le tânghaia an irvâk an irvâka, pûkhaia le khurhaia an om ngaia.

³⁹Khahai khan an iamna sikin Pathian pomna an donga, khannisianlân, Pathian chonginkung chu dong mahai,

⁴⁰Pathianin ei ta hranga thil sa ual an kung sikin. Khahai kha eini leh ngêt kêng famirkipa siamin an iom hrang tih hi Pathian thil tum a ni.