Read Hrangkhol HEBRAI toc2 HEBRAI 12 Bible Online

HEBRAI toc2 HEBRAI 12 - Hrangkhol bible

HEBRAI toc2 HEBRAI 12

¹Eini chu, a ni thîrhai mipui tamtak ihual vêlin ei om sika hin, ni khaphai le sual einia kop ngit hi pai ei ta, ei maton intân irsiatna oma hin irnak songin intân ei ti.

²Jisua, ei iamna irphutna le mongna tiang kha en ngit ei ti. Ama khan a matona raifânna sika khan mualinphoina kha ngainêpin Krosa khan a tuanga, atûn chu Pathian rêngtoihmun chang tiang a hong toi ta.

³Nin sôla nin irzal loina hrangin mi sualhai hnôlna irkhêltak tuangtu kha ngaitua roi.

⁴Sual nin doinaa hin thi ngamin la pût mak chêi.

⁵Pathianin nâihai anga nangni an thorna chong kha nin irnghil tâk ma ni? “Ki nâi, Rengpa nang sepna kha ngaisakin lân, Nang a ngo khomin irzal no roh.

⁶Rengpa khan lung a ithunghai chu a sep ngaia, Nâia a ipom ka chu a zêm ngai,” ti hi.

⁷Pa isep anga nin ituang hi tuang zâm zâm roi; Pathianin nâihai chunga tho dân angin sep loi nâi tu mo a om?

⁸Nâi murdi’n an itong ngai sepna kha nin tong no’n chu, nâi tak ni loiin, zâi nâi kêng nin ini hrang a ni.

⁹Ei taksa tianga pahai thua khom an ni sep, mahrip ei tho ngai. Ei irtha tianga Pa len vâng chu ei hringna hrangin ar cham chamin ei iom a nang a ni.

¹⁰Ei taksa tianga pahaiin chu sôtnotea sa an ti lam ang takin an ni sep ngai, Pathianin chu a’rthiangna ei dong theina hranga ei satna hrangin kêng a ni isep ngai.

¹¹Sepna rêng rêng hi tuang laiin chu raifânomin inlang ngai maka, intak takin an lang ngai a ni. Khannisianlân, tuang zoi tika chu, khataka tuang suaka om tâkhaiin chu ra irtharngam om tak an suaktira, mi a siaminsa ngai.

¹²Nin kut khamhai kha lâng unglân, nin irkhûk inthinghai kha inngîr roi.

¹³Khan, ke’nbâi kha irlo’rphêt loia, indama a om ualna hrangin lam intûna fe roi.

¹⁴Mi tin leh irngeia lêng tum unglân, irthiangna nei tum sa roi; kha irthiangna boiin tûte’n Rengpa hmu thei no ni.

¹⁵Tûte Pathian lungkhamna ata kîr nôk loia, thingkung khâ hong inchera, a tûr sika buaina tamtak insua anga mi om loi hrangin en zit roi.

¹⁶Khabana, tûte irdit song mi mani, Esaua anga rammual mi mani, om loi hrangin en zit roi; ama kha a nâi lutîr nina a ni.

¹⁷Inhnunga khan a pa satvurna la dong khomsian, a sin lei tho kha a thûl thei ta no sikin, hnôlin a om tah ti nin inhriat.

¹⁸Nin ngîrna inhre mai roi. Israelhai ang khan rammual Sinai Tânga ngîr mak chêi. Kha zoroa khan meichok hai, inthim hai, sûmbual hai, phâivopui hai,

¹⁹bekul irhai hai, hnukirhai ichiomhai a oma. Mipuihaiin kha hnukirhai kha an inhriata, inhre nôk viat ta loi hrangin an ngêna.

²⁰“Sâ ten khomin tâng kha a tônin chu lunga dêng that hrang a ni,” ti thupêk kha an tuang thei no sika a ni.

²¹An thil hmu kha ichi a om ok, Mosia lua khomin “Chiin kin thing tak tak,” a iti rak a ni.

²²Nangni chu Zion Tâng, Pathian hring khopui, vân Jerusalem le Vântîrtôn sâng tamtakhai omna nin ingîr a ni.

²³Nangni chu Pathian nâi lutîr irvâna an irhming chuang tâkhai râifâna an irbûmnaa nin ingîr a ni. Pathian, mi murdihai roirêltu kuang le mi felhai irtha famirkipa siam tâkhai kuang nin ingîr a ni.

²⁴Nangni chu Jisua, thuthung thar irfûktirtu kuang le thisen inthek, Abela thisen nêka thil sa ual inkungtu kuang nin ingîr a ni.

²⁵Thu’nsîrtu kha lei nuam loiin nin om loina hrangin irdîn roi. Irnênga thu lei insîrtu lua kha nuam maka, hremna zôk mah. Eini irvâna irthoka thu’nsîrtu hnung songhai len vâng chu hremna kha zôk thei viat no ih.

²⁶Kha laia khan a hnukirhai khan irnêng hi an hnînga, khan, atûn chu, “Voikhat chu irnêng vai ni loiin irvân khom lan hnîng ki ti,” tiin chong a inkung tâk a ni.

²⁷Khan, “Voikhat nôk” ti hin thil inhnîng thei loihai an om mai theina hrangin thil siamhai kha inhnîngin thon paiin om an ti, ti a inlang a ni.

²⁸Khasikin lôm ei ti, raifânin, a lôm hrang lamin mahrip le ichi pumin Pathian chubai mûk ei ti,

²⁹ei Pathian hi mi kâng irhmang ngai mei a ni sikin.