Read Hrangkhol HEBRAI toc2 HEBRAI 2 Bible Online

HEBRAI toc2 HEBRAI 2 - Hrangkhol bible

HEBRAI toc2 HEBRAI 2

¹Khasikin hruai irhmanga ei om nona hrangin thutak ei inhriathai kha ei intûk indet ngit hrang a ni.

²Vântîrtônhaiin ei irchibulhai kuang thu an lei intung lua kha a dika, tukhom a zui loi le a zôm loi ka chu hremna an ihmu rua an hmu zel ngai a ni.

³Hiang dôra saninhringna roiinpui vâng hi te uksak loiin tho inlân, itin mo ei irbîk thei hrang? Hi saninhringna hi a phuta Rengpa’n an puanga, kha hnung ama inhriathaiin a dik tih an ni ifia pe nôk a ni.

⁴Pathian khomin sinirkhêl chi tinrêng le thilirkhêlhai sin le ama lungdoa Irtha Irthiang thilpêkhai semin khahai kha an hriatpui sa.

⁵Pathianin vântîrtônhai kha rammual thar la hong om hrang ei insîr chunga roirêltu hrangin se mah.

⁶Kha nêkin chu, kho hmuna mani, Pathian Thubua lei iti angin: “Mihriam hi imo a nia, O Pathian, ni inhriat mai ngai; Mihriam nâipa khom hi imo a nia, ni ikan ngai?

⁷Ama chu vântîrtônhai nêka irhnuai ualin ni siama, Roiinpuina le chôiindômna nin khumtira,

⁸thil itinrêng chunga roirêlpu’n ni siam ta,” ti’n irziak a lei ni. Pathianin mihriam hi, “Thil tinrêng chunga roirêlpu’n a siama,” a ti sikin lam tinrêng a huap zit ti a fela. Aniachu, atûn hin chu itinrêng thu hnuaia omin la hmu ual mak meh.

⁹Khannisianlân, Jisua sôtnote hranga vântîrtônhai nêka irhnuai uala siam kha ei ihmu a ni, Pathian lungkhamna sika mi tin ta hranga thi hrangin. Thina a tuangna sika khan roiinpuina le chôiindômna inkhumin atûn hin ei ihmu tâk a ni.

¹⁰Pathian, thil tinrêng siampu le indotpu ta hrangin chu, ama roiinpuina dong sa hranga nâi tamtak a hong hruaihai theina hrangin. Jisua khah dengintheina tuang sika famirkiptira siam hi a idik a ni. Jisua chu saninhringna tianga mihai hruaipu a ni sikin.

¹¹Irthiangtirtu le irthiangtirhai chu Pa hmun khata suak an ni. Khasikin, Jisua’n annihai kha urênghai ti inzak mah:

¹²Pathian kuang, “Ki urênghai kuang ni sinthohai insîr ki ta, An inkhômnaa nang inpâk ki ti,” a ti.

¹³“Pathiana ki iamna irnghat ki ti,” a ti nôk, Pathianin, “Nâipang a ni ipêkhai leh hin kin om,” a ti nôk sa.

¹⁴Jisua’n nâipang a ikoihai kha taksa le thisen nei an ni sikin, ama ngei khom anni anga zuang omin an mihriam nitna a zuang inthangpui sa a ni. Kha a zuang thô nasan tak chu thina chunga irchamneitu Diabola kha ar hmangtir theina hrang le,

¹⁵thi chia dam sûnga suaka om murdihai kha a sansua theina hranga a ni.

¹⁶A ichangpui ngai kha vântîrtônhai ni mah ti a fel. Pathian Thu’n, “Abrahama irchihai a changpui ngai,” a ti sikin.

¹⁷Khasika khan Pathian sin a thôna khan mihriamhai Ochai Inlaltak, iamom le lungkhamnaa sip a hong nia, an sualhai ngaidam a ni theina hrangin lam tinrênga a urênghai angin a inang pial a ni.

¹⁸Ama ngeiin thêmna tongin a lei tuang tâk sikin, atûn chu thêmna tonghai a changpui thei ta.