Read Hrangkhol HEBRAI toc2 HEBRAI 3 Bible Online

HEBRAI toc2 HEBRAI 3 - Hrangkhol bible

HEBRAI toc2 HEBRAI 3

¹Ki Kristian urêng, Pathianin a ikoihai! Ei iamna lama ochai Inlaltak ni hranga Pathianin a itîr Jisua kha ngaitua roi.

²Pathian in sûng mihai laia Mosia iam a iom ang khan, ama khom hi sin tho hranga an thangtu Pathian kuang iam a iom a ni.

³In sintu khan a in nêkin chôiindômna a idong ual ngai ang khan, Jisua hi Mosia nêkin roiinpuina dong ual ok inruk a ni.

⁴In tin hi tu mo khat isin mani chu a ni ngêta, thil tinrêng chu Pathian isiam a ni.

⁵Pathian in sûng mihai laia tirtôn chu Mosia kha iamom tak a nia, Pathianin sûn matona a la iti hranghai kha a lei insîr a ni.

⁶Krista rêk chu Pathian in sûng mihai chunga Nâipa’n iam a iom a ni. A in sûng mihai chu einihai hi ei ni, ei ihâina intûk indetin ei itûng hi ei irnghat ngit ngânin chu.

⁷Khasikin, Irtha Irthiangin, “A vuan sûn Pathian hnukirhai nin inhriatin chu,

⁸Nin irchibulhaiin ramchâra inthêmna nia, Pathian an innuartir lai ang khan, Nin lungrîl inngartir no roi;

⁹Pathianin kha hmun khan nin irchibulhaiin, An ni fia’n, an ni inthêma, Kum sômminli sûnga ki sinthohai an hmu khomin.

¹⁰Khasikin, kha irchihai chunga khan ki ning an mura, ‘An lungrîlin a hruai pêta, Ki lampuihai khom inhre ta mahai,’ ki tia.

¹¹Ki ninginmurna sikin chonginkung ngar tak ki neia, ‘Ki’rngamna hrang rama khan lût viat no ni,’ ki tia,” a iti ang khan.

¹²Urênghai, Pathian hring kha hnungsong hrangin nin laia tûte’n iam loina lungrîl sual nin nei loina hrangin irdîn roi.

¹³Khaang khan, nin laia tûte sual huangna sika milung ngar nin om loina hrangin Pathian Thubu’n, “A vuan sûn” ti a ni hmang pe sûng ka chu a ni tin irthor irhlôm mai roi.

¹⁴Ei irnghat phutna kha a mong dênin ei intûk indet ngânin chu Krista leh Pathian satvur dong hranghai ei ni ta.

¹⁵Ama hi Pathian Thubu’n a ti; “A vuan sûn Pathian hê nin inhriatin chu, Nin irchibulhaiin ama doia an irhel ang khan, Nin milung inngar no roi,” ti hi.

¹⁶Tuhai mo Pathian hê inhriat hnunga tehel zong kha? Aigupta rama irthoka Mosia’n a ihruai suakhai kha an ni.

¹⁷Tuhai chunga mo kum sômminli sûnga Pathian ning a inmur kha? Sual sina ramchâra thi tâkhai chunga khan a ni.

¹⁸Tuhai mo Pathianin chonginkung ngar tak neiin, “Ki’rngamtirna hrang rama khan lût viat no nihai,” a iti kha? Tehel zonghai murdi kha an ni.

¹⁹Khaang khan, an iamno sikin kha rama khan lût thei mahai tih ei ihmu a ni.