Read Hrangkhol HEBRAI toc2 HEBRAI 4 Bible Online

HEBRAI toc2 HEBRAI 4 - Hrangkhol bible

HEBRAI toc2 HEBRAI 4

¹Atûn hin Pathianin kha irngamnaa nin lût hrangin chonginkung a ni ipêk a ni. Khasikin, nin laia tûte kha irngamnaa lût theiloi nin om loina hrangin irdîn ei ti.

²An inhriat ang takin Thurchi Sa chu eini khomin ei inhriat. Thu chu an inhriat, khannisianlân, an thuin hriathai khan ite ar fêna hmu mahai; asan chu, thu an inhriat kha iamna’n an pom no sikin a ni.

³Eini a iamhai chu, Pathianin a inkung irngamnaa khan ei ilût mai a ni. “Ki ninginmurna sikin chonginkung ngar tak ki neia, Ki’rngamna hrang rama khan lût viat no ni,” a iti ang khan. A sinthohai kha irnêng le irvân irsiang phuta a izoi tâk ni khomsian, kha chong kha a la iti a ni.

⁴Pathian Thubua, “Kho hmuna mani sûn sari ni’n chu Pathianin a sintho murdi ata a’rngam ta,” tiin.

⁵Kha thu zôm dênin: “Ki’rngamtirna hrang rama khan lût viat no ni,” a ti nôk.

⁶Thurchi Sa lei inhriat masahai khan an iam loina sikin, irngamna Rama lût ta no nihai, mi dang la lût hrangin phalna a la iom a ni.

⁷Khaang khan, Pathianin “A vuan sûn” tiin nikhua dang an kung nôka, kum tamtak hnunga Davida hmangin matona a lei iti tâk, “A vuan sûn Pathian hnukirhai nin inhriatin chu, Nin milung inngar no roi,” ti kha a ti nôka.

⁸Josua’n mipuihai kha irngamna a lei ipêk thei ni sianlân chu, Pathianin inhnunga khan nikho dang thu insîr ta no ni.

⁹Khasikin Pathian mihai ta hrangin chu sûn sari nia Pathianin a irngam ang khan irngamna kha a la iom mai a ni.

¹⁰Tukhom kha irngamnaa lût chu Pathianin a sintho ata a irngam ang khan ama khom a sintho ata irngam a ti.

¹¹Tho, khasikin anni anga iam loina sika chuk loia om loiin irngamna khan ei lût theina hrangin a sân irnak song ei ti.

¹²Pathian thu chu a hringa, sin a tho theia, i ang dôra khandai hriam ngaih tak nêk khomin a ngaih uala, hringna le irtha irbunnahai, ru’rbun le irtin hai dênin a sunkhoi chit theia, lungrîla ngaituana le tumnahai hi an hriat thei zôi zel ngai a ni.

¹³Pathian hrangin chu ite thil irthup om mah, thilsiam tinrênghai khom a mithmu’n chu inlang pharin ar hong zit ngai a ni. Ama kuang ngei ei sik senga thurchi ei la insîr hrang a ni.

¹⁴Pathian omna irvâna fe tâk, Ochai Reng roiinpui tak Jisua, Pathian Nâipa kha ei nei sikin ei thurin hi intûk indet ngit ei ti.

¹⁵Ochai Inlaltak ei hrât nonahai le inhre phâkpui theiloi mi nei mak mea, eini anga lam tinrênga thêmna tong tâk, khannisian, sual chu sual loi kêng ei ini.

¹⁶Tho, khasikin za’rngaina le changpuina ei intak tika ei hmu theina hrangin Pathian lungkhamna rêngtoihmun kha hâi takin pan ei ti.