Read Hrangkhol HEBRAI toc2 HEBRAI 8 Bible Online

HEBRAI toc2 HEBRAI 8 - Hrangkhol bible

HEBRAI toc2 HEBRAI 8

¹Ei insîr laia a poimo tak chu ama hi a ni: Khaanga Ochai Inlaltak, irvâna Reng Roiinpuitak rêngtoihmun chang tianga hong toi ei inei a ni.

²Mihriam isin ni loi, Rengpa isin biakbuk tak tak Hmun Irthiang taka Ochai Inlaltakin sin a itho a ni.

³Ochai inlalhai ka chu thilpêk le irbôlna Pathian kuang inhlan hranga phun an nia, khasikin ei ochai Inlaltak khom hin inhlanrua mani chu a nei ngêt a inang a ni.

⁴Irnênga om sianlân chu, ochai zel ni viat no ni; Juda Dân ti lama thilpêk inhlan ngai ochai an om sikin.

⁵Anni sintho ngai kha chu irvân thilhai millim le irlim ka kêng a ini. Mosia’n biakbuk a sin hrang laia Pathianin a kuang, “Ni sin hrangzia chu tânga enirkhîna a’rlim ni ni ihmu ang zeka sin hrangin ngaitua roh,” tia hril angin.

⁶Khannisianlân, atûn chu, anni nêka an chung ual ochai sin kha Jisua ipêk a ni ta, thuthung, Pathian le mihriam kâra a irfûk kha a isa ual ang khan, kha thuthung kha thil sa ual inkungnaa inding a ni tâk sikin.

⁷Thuthung masa kha ite demna boi a ni’n chu, an hnina hong iom kha ite nangna om mah.

⁸Khannisianlân, Pathianin a mihai fel loina a hmu sikin, hiang hin a ti. “Nikhuahai kha a hong itung hrang tâk, Israelhai le Judahai thuthung thar ki siam pe hrang nikhuahai kha.

⁹An irchibulhai Aigupta ata hruai suak hranga an kuta kin tûk nia ki thuthung siam ang khan ni ta no ni. ki thuthung siama khan iamom maka, Khasikin anni kha ki uksak ta loi a ni, Rengpa’n a ti.

¹⁰Nikhua hong tung hranga Israelhai kuang thu ki ithung hrang chu hi hi a ni. An milung sûnga ki dânhai sia ki ta, An lungrîla irziak sa ki ti. Keima an Pathian ni ki ta, Annihai kha ki mihai ni an ti.

¹¹Khanchu, tûte’n, Rengpa kha inhre ro, tia mâni bômhai mani, mâni ram mihai mani an irchutir nang ta no ni. A chîn taka irthokin a lian tak dênin an nin hriat hrang tâk sikin.

¹²An sualhai ngaidam ki ta, an inchâinahai inhre mai ta no ning, Rengpa’n a ti,” tiin.

¹³“Thuthung Thar,” a ti sikin a masa kha chu a inmiluitir tâk a ni; khaang khan, thil milui hmang sa taloi chu boi zit ta a ti.