Read Hrangkhol JAKOBA toc2 JAKOBA 1 Bible Online

JAKOBA toc2 JAKOBA 1 - Hrangkhol bible

JAKOBA toc2 JAKOBA 1

¹Pathian le Rengpa Jisua Krista suak Jakoba khan nam sômhleihni rammuala inthek indarhai kha chubai ki mûk.

²Ki urênghaio, fiana chi tinrêng nin tong tena thil raifân omin bê zit roi,

³nin iamna fiaa a om hin tuangdiarna a siam ti nin inhriat.

⁴Khaang khan, ite irsam loia nin famirkipa, puihlinga nangni a siam theina hrangin nin tuangdiarna khan hlosam viat loiin nangnia sintho ngêt ri se.

⁵Nin laia tukhomin vârna ar samin chu mi murdi kuanga inhnar loia phal taka pe ngaitu Pathian kuang ngên ri se, pêk ni a ti.

⁶Aniachu, iamna neiin, lungirhla viat loiin a ingên hrang a ni; lungirhlatu chu phâivua’n tuikhanglian a sêma a irsoktir ang hi a ni.

⁷Khaang mi lungrîl bulbâl neiloi, a sintho murdia ite detloi mi khan Rengpa kuang ata ite hmu hrangin irtûng no ri se.

⁹Iamtu inriang mi kha Pathianin a chôiirsâng sikin lôm ri se.

¹⁰Iamtu irchong khom irhniamtira a omin lôm sa ri se, hloisûl pâr angin ar chongna a la chuai hrang sikin.

¹¹Misa, a hong suakin a sân a hong luma, hloisûl kha a em inthêma, a pâr a tâka a enhoina a boi ngai. Khaang khan, irchong khom a sinthôna irhmangin om a ti.

¹²Fiana tonga, ngîr indet khak mi chu a vân a sa, fiaa a om hnungin Rengpa’n ama lungthungtuhai pêk a inkung, chôiindômna lukhum, hringna kha, a ichang hrang a ni.

¹³Tukhomin thêmna an tongin, “Hi thêmna hi Pathian ata kêng,” ti no ri se. Pathian chu sual hranga inthêm chi ni ma, ama khomin tûte inthêm ngai mah.

¹⁴Mi tin hi mâni irzukna suala inthêm an ni zit uala, kha khan mi an hôpin a hruai irhmang ngai a ni.

¹⁵Kha irzukna khan tê a hong vonga, sual a nei, kha sual kha a hong puihlingin chu thina an tungtir ngai a ni.

¹⁶Ki urêng inditom takhaio, ihuangin om no roi.

¹⁷Thilpêk sa le thilpêk irkip chu irvâna irthoka danglamna le irthûlna nei viat ngailoi Pathian, irvâna vâr Siamtu kuanga irthoka zuang chum ngai a ni.

¹⁸A thil siamhai laia ra masa hrangin ama nuamlam ang takin thutaka a ni inei a ni.

¹⁹Ki urêng inditom takhaio, hi hi inhre roi. Mi tinin ar ngai tiang uar sianlân, insîrna lam tiang irchu loiin, an milung inchuk ri sehai.

²⁰Mihriam ningmurna hin Pathian thiltum diktak kha hlo inchuk thei ngai mah.

²¹Khasikin, intirom chi tinrêng le sual chi tinrêng pai irhmang unglân, nin milunga Pathian thu tû, nangni saninhring thei chu thuhnuairôl takin pom roi.

²²Sinthôna om loia thu irngai vai a ruk tiin mâni irhuang no roi.

²³Tukhom thu irngaitu nia, zôm ual loi chu, hlîmena mâni hmêl entu ang a ni.

²⁴Ngûk takin ar ena, a rot hnungin chu i ang hmêl irput mi mani a’rnghil nôk zel ngai.

²⁵Aniachu, tukhom dân famirkip, nin zalêntirtu kha ngaitua uala, khaanga om maia, irngaia irnghil nôk lattu ni loia, a zôma zômtu ngei chu, a sintho murdia hlochuk a ti.

²⁶Tukhom sakho mi tak nia irbea, a milei vêng inhnê ual loi chu mâni a irhuang a nia, a sakhua chu chanlamboi a ni.

²⁷Pathian mit hmua sakho biak dân irthiang le sual kop loi chu hi hi a ni: fara le meithâihai an intak laia donsui le rammual porinche kop loia irvong insa hi a ni.