Read Hrangkhol JAKOBA toc2 JAKOBA 2 Bible Online

JAKOBA toc2 JAKOBA 2 - Hrangkhol bible

JAKOBA toc2 JAKOBA 2

¹Ki urênghaio, ei Rengpa roiinpui tak Jisua Krista iamtuhai khan theibîk nei no roi.

²Nin Sinagoka, mi rângachak kut sabi buna songkol satak innghâk hong lût sianlân, mi inriang songkol siat innghâk hong lût sa sianlân;

³songkol sa innghâk kha chu nin lei uksaka, “Nang chu toina sa hin toi ro,” nin tia, mi inriang kuang chu, “Nang chu so son ngîr ro,” mani, “Ki ke hnuaia hin toi ro,” mani nin ti’n chu,

⁴theibîk nin neia, nin thîr dân lungrîl a sân a isual mo ni ma?

⁵Ki urêng inditom takhaio, irngai u ta, rammual irngaia mi inrianghai hi iamnaa irchong hrang le ama lungthungtuhai kuang a ram inkung chang hrangin Pathianin a inthang loi ma ni?

⁶Nangni’n chu mi inrianghai kha inza mak chêia. Mi irchonghai hi nangni hnuaisiatuhai le roirêlna ina nangni hnûklût ngaitu ni mahai mo?

⁷Irhming satak nin irput kha insîrinsiattuhai ni mahai mo?

⁸“Nangma lung ni irthung angin ni bômhai lung ni ithung hrang a ni,” ti Lekha Thua chuang Dân roiinpui tak hi, nin zômin chu nin tho’n sa;

⁹theibîk nin neiin chu sual nin itho a ni, Dân insiattuhai, nin ni.

¹⁰Tukhomin Dân zôm zit khomsian inkhat khom an siatin chu a rênga insiat a ni.

¹¹“Uire no roh,” titu’n chu, “Mi that no roh,” a ti nôka, Uire no khom sianlân, mi ni thatin chu Dân insiat ngêt ni ni.

¹²Khanchu Dân, nin zalêntirtu hmanga rêl pe hrang ei nih ti inhriatin thu insîr unglân, thil tho’n sa roi.

¹³Mi chunga za’rngaina nei loia thilthotu chu za’rngaina boiin a chunga roirêl pe ni a ti; khannisian, za’rngaina hin chu roirêlna an hnê ngai.

¹⁴Ki urênghaio, mi’n “Iamna ki nei,” ti sianlân, a sinthoa inlang no sianlân, imo an lâpna? Khaanga iamna khan nang saninhring thei ni mo?

¹⁵Urêngpa mani farnu mani silkaiboi le phîngchâmin om sianlân,

¹⁶nin laia tu’n mani, “Irtharngam takin fe tan lân, lum tak le khop takin om roh,” ti sianlân, a taksa ta hranga innang kha a pêk ual no’n chu imo an lâpna?

¹⁷Khaang dênin sintho boia iamna vai hi chu omzia a inei loi a ni.

¹⁸Mi tu khôkin mani, “Mi inkhatin iamna a neia, mi dangin sintho a nei,” ti a ti. Khannisian, keima sâmna chu, “Itin mo, mi’n sintho boiin iamna a inei thei lam nir hmu roi; keima’n chu sintho’n ki iamna nang irhmu ki ti,” ti hi a ni.

¹⁹Pathian inkhat vai a om ti ni iam mo? Ni tho’n sa! ramkhohrihai khomin an iama, an inthing ngai kêng.

²⁰Mi’nvêtpa, iamna hi sintho kop loiin chu ite ni mah ti nin hriat nuam mo?

²¹Ei irchibul Abrahama kha a nâipa Isaka, maichâma an hlan lai khan, a sintho sika thiam inchangtir mo ni ma?

²²A iamna le a sintho kha ar hlopa, a sintho khan a iamna kha ar kiptir ta ti nin hriat.

²³Pathian Lekha thua, “Abrahama’n Pathian a iama, a iam sika khan thiamchanga pom a ni ta,” ti kha a tunga, Pathian ruala ibe a ni ta.

²⁴Mi’n sintho sikin thiam an changa, iamna vaiin ni mah ti nin inhriat ta.

²⁵Khaanga khan Rahabi notizuar khom khan, mi tîrhai kha a lei lôma, lam danga an kîrtirhaia, a sintho sika khan thiam a ichang mo ni ma?

²⁶Khasikin, takpum hi irtha kop loiin chu a ithi angin sintho kop loiin chu iamna khom hi a ithi a ni.