Read Hrangkhol JAKOBA toc2 JAKOBA 3 Bible Online

JAKOBA toc2 JAKOBA 3 - Hrangkhol bible

JAKOBA toc2 JAKOBA 3

¹Ki urênghaio, nin laia irchutirtu ni hi tum sup sup no roi, irchutirtuhai hi mi danghai nêka ngar uala roirêl pe ei la ini hrang ti nin inhriat.

²Ei rêngin thil tamtak ei tho’nsual ngai. Tukhom a thu’nsîra tho’nsual ngailoi mi chu mi puihling a ni, khaang mi chu an takpumpui khom an sep thei ngai.

³Ei thu inzômtir hrangin sakor bâia thîr takam ei inhmuamin chu, an takpumpui khom ei nuamna ang ei inher kôi thei ngai.

⁴Irkuanghai khom lian okhai sian khom, phâivua’n a sêm inhnîng lai khomin a chalaitu’n a nuamna tiang ang a chalaina chînte khan an fetir thei a ni.

⁵Khaang dênin milei khom hi takpum ôn chînte a ni nâkin, irsorthei tak a ni. Mei irsî chînte te’n ram inrôp tak tak khom a ikâng thei ngai dên hi ngaitua u ta.

⁶Milei khom hi mei ang a nia, rammual siatnaa sip, ei takpuma kop, ei takpum om dân porinchetirtu a ni; ei hringnun pumpui hremhmun meia dengintheitirtu a ni.

⁷Mihriamin, ramsa le vâ tinrêng hai, thilhring le tuia nga tinrênghai hi vâi inngam thei an nia, an vâi inngam ta ngai.

⁸Khannisian, milei chu tûte’n vâi inngam thei viat ngai mah. Sual om chian thei loi, thina tûra sip a ni.

⁹Kha leh khan ei Pa, Rengpa chu ei inpâka; ei mihriam chanpui, Pathian irangpuia siamhai khua ei sâl sa ngai a ni.

¹⁰Bâi inkhat ata satvurna le khosâlna a suak ngai. Ki urênghaio, khaang khan chu a ini hrang ni mah.

¹¹Tuihnâr inkhat ata tui thum ual le tui khâ suak ngai mah.

¹²Ki urênghaio, theipui kunga Oliv a ra ngai ma ni? Grep hruia khom theipui a ira thei ma ni? michikhur ata khozoi tui irthiang zuang suak thei ual mah.

¹³Nin laia vârna le inhriat thiamna nei mo an om? Om dân sa le thil sa tho’n thiam tak le thuhnuairôl takin inlangtir ri se.

¹⁴Nin milunga hnarsâna inthûk tak le mâni dohasana nin neiin chu thudik irkalnaa nin vârna irsorpuiin milak tho no roi.

¹⁵Khaang vârna kha chung tianga zuang chum ni maka, rammual ata taksa irzukna le ramkhohri ata a ni ual.

¹⁶Hnarsâna le mâni dohasana omnaa khan buaina le sualna chi tinrêng a om ngai.

¹⁷Chung tiang ata vârna zuang suak chu a maton taka a’rthianga, kha zoiin irngei a nuama, a milung ar uaia, changpui a hoia, lungkhamna le ra saiin a sipa, theibîkna le vârirletna nei ngai mah.

¹⁸Irngeina siamtuhaiin irngeina zonga chi an itû kha thil sain a ra ngai.