Read Hrangkhol JAKOBA toc2 JAKOBA 5 Bible Online

JAKOBA toc2 JAKOBA 5 - Hrangkhol bible

JAKOBA toc2 JAKOBA 5

¹Nangni mi irchonghaio, irngai u ta, nin chunga intak zuang tung hrang sikin chap unglân, khêkhroi ta roi.

²Nin irchongnahai a siat zoi tâka, nin puanhai khom irnge’n an fâk zoi ta.

³Nin rângachak le sumhai khom a êkin a lei man zoi ta, a êk iman kha nin theiloizia inlangtirtu ni a ta, meiin thil a ikâng irhmang angin nin taksa kha fa zoi a ti. Sûn hnungkhôna chu irchon nin ibukkhôm a ni hi.

⁴Irngai u ta, nin loia sinthotuhai hlo nin khit pehai kha an khêka, bu âttuhai khêk irhai kha Itinrêng Rengpa mikuar inhriata a tung ta.

⁵Irnênga hin hoi tak le nuamningin nin oma, that hrang nikhuaa hrangin nin lei irvâi inmar chian nin ni.

⁶Mi dik tak chu thiamno nin inchangtira, nin thata, ama’n chu nangni doi mah.

⁷Khanchu, urênghaio, Rengpa zuang mâka chu diar takin om roi. Loi neitu’n a loi ata ra inlût hrang a inghâk dân hi en roi; rua masa le rua hnungkhôn a nghâk mai mai ngai a ni.

⁸Nangni khom diar takin om unglân, lungrîl det tak irput roi; Rengpa zuang nôkna hrang anai ta.

⁹Urênghaio, thiamno changa nin om loina hrangin irdem irhlôm no roi. Irngai u ta, Roirêltu chu mikot kôla a om chian tâk a ni.

¹⁰Urênghaio, Rengpa irhminga thu insîrtu, deipuhai dengintheina diar taka an tuang dân kha enton hrangin hmang roi.

¹¹Diar taka tuangtu kha vânsa ei irti a ni. Joba tuangdiarzia nin inhriata, Rengpa’n a hnungkhôna a pêk dânhai nin inhriat. Rengpa kha za’rngaina le lungkhamna’n a sipa.

¹²Ki urênghaio, i khom nisian khomâk irsâm ngai no roi, irvân mani irnêng mani, thil dang sâmin mo khomâk sâm no roi, “A ni,” nin iti chu “A ni” ti chian unglân, “Ni ma,” nin iti chu “Ni ma” ni chian ri se; khanchu thiam loiin nin iom loi hrang a ni.

¹³Nin laia vânduaina tong an om mo? Chongchai ri se. Râifân mo an om? Inpâkna hla sak ri se.

¹⁴Nin laia damloi mo an om? Koiindang upa inkoitirin, anni’n Rengpa irhminga sahriak polin a ta hrangin chongchai ri se;

¹⁵iam ngita chongchaina khan damloi kha indam a ta, Rengpa’n kaithoi a ti; thil a lei tho’nsual tâk khom ngaidam ni a ti.

¹⁶Khanchu, nin sualhai thupha chôi irhlôm unglân chongchai irhlôm roi; khanchu indamin om nin ti. Sathnem irngai taka mi dik chongchaina khan thil roiinpuitak a tho thei a ni.

¹⁷Elija kha eini anga mihriam ma mai kêng a ini, rua tho loi hrangin sathnem irngai takin a chongchaia, kum thum le tha ruk sûng irnêng chunga rua tho ta mah.

¹⁸A chongchai nôka, irvân ata rua a zuang thoa, irnêng ata chîmuhai a hong inmông thartir nôk ta.

¹⁹Ki urênghaio, nin laia tu mani thutak ata pêt irhmang sianlân, tu khôkin mani a hong koikhîr nôkin chu,

²⁰ama hi inhre roi: mi sual, a lampui irhmangna ata hruai kîr nôktu khan kha mi sual irtha kha thina ata irthokin a saninhringa, sual tamtak ata ngaidamna an tung pe tâk a ni.