Read Hrangkhol 1 PETERA toc2 1 PETERA 1 Bible Online

1 PETERA toc2 1 PETERA 1 - Hrangkhol bible

1 PETERA toc2 1 PETERA 1

¹Petera, Jisua Krista tirtôn khan, Pathian mi irthiang irthekindarhai Ponto ram hai, Galatia ram hai, Kapadokia ram hai, Asia ram hai le Bithunia rama om tâkhai chubai ki mûk.

²Pa Pathian lei inhriat anga inthang, Jisua Krista thu iam hrang le a thina irsu’nfâi hranga Irtha irthiangtir nin nia, nin chunga lungkhamna le irngeina inpungin om ri se.

³Ei Rengpa Jisua Krista Pathian le Pa chu inpâkin om ri se. Jisua Krista kha mithi lai ata kaithoiin sabeina hring nei hrangin a za’rngaina roiinpui tak khan a nin hring nôk tâka.

⁴Khasikin, Pathianin a mihai hranga irchon tamtak a isia kha dong hrangin ei itûng a ni. Kha irchon siat thei loia, hmon thei loi le chuai thei ngai loi kha Pathianin nin ta hrangin irvâna a isia tâk a ni.

⁵Ama nin iam sikin saninhringna sinsiam sai, zoro hnungkhôna inlang a ni dênin, Pathian sinthotheina khan nangni vong a ti.

⁶Fiana tinrêng nin tonga, nin lunginzîng khomin raifân takin om roi.

⁷Nin iamna fiana hrang a ni, rângachak siat thei lua meia fia a nia, kha nêka hlu ual, nin iamna chu, fia hrang pial kêng; khanchu Jisua Krista a zuang inlâr tika inpâkna hai, roiinpuina hai, chôiindômna hai, hlo nin ti.

⁸Ama hmuloi khomin lung nin thunga, atûn ama nin hmu ual no khomin nin iama, raifânna irkhêl insîr thei loi le roiinpuina’n nin isip a ni;

⁹nin iamna ra, nin irtha saninhringna kha, nin hmu thiai sikin.

¹⁰Hi saninhringna chungchâng hi deipuhaiin ngûk taka zongin an suia, nin chunga Pathian thilpêk, lungkhamna zuang tung hrang chu, an lei insîr a ni.

¹¹Annia Krista irtha om chu, Krista tuangna le a hnunga chôiindôma a om hrang thu, a lei inhriattira, i zoroa mo zuang tunga, itina zuang tung hrang moh ti inhriat an tum ngai a ni.

¹²Anni ta hrang ni loi, nangni ta hrangin sin an tho a nih ti inhriattir an ni. Irvân ata tîr, Irtha Irthiang changpuia nin kuanga thurchi Sa hriltuhai khan, kha kha nangni an hril tâk kha. Kha thil kha vântîrtônhaiin khom inhriat an irzuk a ni.

¹³Khasikin lungrîl irsiam diamin irtûng chian unglân, Jisua Krista a zuang inlang tika lungkhamna nangni a zuang chôi pe hrang kha tûng ngit roi.

¹⁴Nâi thu zômhai angin om unglân, tianlai, nin inhriat loi laia nin irzuknahai ang khan om no roi.

¹⁵Nangni a koitu a irthiang angin nangni khom nin om lam murdia lei irthiang roi.

¹⁶Pathian Lekha Thu’n, “Keima ki’rthiang sikin, nangni khom nin irthiang hrang a ni,” a iti ang khan.

¹⁷Theibîk nei loia mi tin an sintho ang taka ngaitua petu kha “Pa” tia nin koiin chu, hi rammuala nin om sûng hin ama chi pumin om roi.

¹⁸Nin irchibulhai ata nin idong nôk, om dân hmang hmunboi tak ata kha thil siatthei sum le rângachaka irtan ni mak chêia,

¹⁹belrate demna boi le porinche loi, Krista thisen hlua irtan nin nih ti nin inhriata.

²⁰Ama chu khorsiang kho’rzir mân daiha Pathian lei inkung a nia, atûn zoro hnungkhôna hin nin ta hrangin a len lang ta a ni.

²¹Ama zâra mithi lai ata kaithoitu le roiinpuina pêktu Pathian kha, nin iam tâka, khanchu Pathian kha nin iamna le sabeina nin irnghatna tak a hong ni ta.

²²Atûn chu thutak nin zôm sikin nin lungrîl nin irthiangtira, urênghai lungirthung ta takin lung nin irthung tâka, nin lungrîl takin lung irthungirhlôm roi.

²³Chi siat thei ata ni loiin chi siat thei loi Pathian kumtuang thu hring ata suakinthar nin ni.

²⁴Pathian Thubu’n, “Mi murdi hloisûl ang an ni, An roiinpuinahai khom hloisûl pâr ang a ni, Hloisûl chu a chuaia, A pârhai chu a tâka.

²⁵Rengpa thu chu kumtuangin a om mai,” ti a ni. Kha ngêt kha a ni Thurchi sa nangni an ihril kha.