Read Hrangkhol 2 PETERA toc2 2 PETERA 3 Bible Online

2 PETERA toc2 2 PETERA 3 - Hrangkhol bible

2 PETERA toc2 2 PETERA 3

¹Inditom takhaio, voihni lekha nangni ki hong ithon a ni ta. Nin inhriat sai tâk nangni ki hong inhriat nontir nôk; nangnia lungrîl irthiang kaiinhar hrangin voihni nangni ki hong ithon a ni.

²Deipu irthianghai thu le Rengpa le Saninhringtu thupêk, nin tirtônhaiin tiana nangni an ihril kha, inhre mai roi.

³Sûn hnungkhôna chu hmusitpuhai, mâni irzukna ang taka omhai hong suak an ti, ti inhre masa roi. Hmusit tak takin,

⁴“Zuang nôk chonginkung kha itin mo a ni tâk? Ei irchibulhai an thi zoi tâka, thilsiam irphut ata itinrêng a ngai dênin a la iom mo ni ma?” la ti an ti.

⁵Tianlaia khan Pathian thu’n, irvânhai khi siam a ini le irnêng chu tui ata siam suak a inihai, tui le tui kâra a isia hai,

⁶tuilêt lai khan rammual milui chu, kha tui khan a ngîma, a insiathai kha a’rnghil om an thoa.

⁷Pathian ngaisak loihai chungchâng rêl zoro le irhmangtir tika meia kâng irhmang hrangin atûn irnêng le irvân khom hi Pathian thu’n a ihôi a ni.

⁸Inditom takhaio, hi hi irnghil no roi, Rengpa ta hrangin chu sûn khat hi kum sângkhat ang a nia, kum sângkhat khom hi sûn khat ang a ni.

⁹Senkhat iam lam angin Rengpa hi a thu’nkung hlenna lama ir-ial ma; nin ta hrangin a ituang thei kêng; tûte irhmang nuam maka, mi murdi’n an sual an irleta, a kuang an ikîr a nuam ual a ni.

¹⁰Rengpa Nikhua chu inru angin a zuang itung ngêt hrang a ni. Kha tika chu irhai inring tak le irvân khi kâng irhmang zit a ta; irnêng le a sûnga thil om murdi khom irhmang zit a ti.

¹¹Hihai hi khaanga siat zit hrang a ni’n chu nangnihai kha i ang mi mo nin ini hrang?

¹²Pathian sûn tep nghâkhmo taka nin thîr mai lai hin mi irthiang, Pathian ta hranga irpêk mi nin ini hrang a ni. Kha tika chu irvân khi kâng irhmang a ta, a lum sikin ârsihai khom zôi zit an ti.

¹³Khannisianlân, Pathian inkung, irnêng thar le irvân thar, a sûnga felna omna kha, ei inghâk a ni.

¹⁴Khanchu inditom takhaio, hi thil nin nghâkhai hin Pathian makunga irthiang le sêlna boia om hrangin theidôr insua unglân, ama leh irngei roi.

¹⁵Rengpa tuangdiarna hi saninhring nin ni theina zoro inchuma bê unglân, Pathianin vârna nangni a ipêk angin ei urêngpa inditom tak Paula khomin hi thu hi a irziak ngai a ni.

¹⁶A thu irziak senkhathai chu a sân inhriat thiam an tak, ite irchu loi le mi det loihaiin Pathian Lekha thu dang an irngai kôi ang dênin an irngai kôia, mâni siatna an intung ngai.

¹⁷Inditom takhaio, nangni’n chu nin inhriat tâka, irdîn roi; khano’nchu uksak nei loihaiin nangni hruai irhmang an ti; nin det insat laiin tûk likna chin ni.

¹⁸Ei Rengpa le saninhringtu Jisua Krista inhriatna hai, lungkhamna hai irsônlian mai roi. A kuanga khan roiinpuina atûn ata kumtuang dênin om ri se. Amen.