Read Hrangkhol 1 JOHANA 2 Bible Online

1 JOHANA 2 - Hrangkhol bible

1 JOHANA 2

¹Nâihaio, thil sual nin tho loina hrangin hi thu hi nin kuang ki irziak a ni. Aniachu, tukhom hong sual ta sianlân, Pa kuanga nin sîrpuitu mi fel, Jisua Krista kha, ei nei.

²Krista kha ei sual ngaidamna a ni, eini sual vai ni loiin rammuala mi murdi sual ngaidamna khom a ni.

³Pathian thupêkhai ei zômin chu ama ei inhriat a nih ti a ifel a ni.

⁴Ama kha kin inhriat tia a thupêkhai zôm ual loi chu milak a nia, amaa thutak a iom loi a ni.

⁵Tukhomin a thu a zômin chu Pathian kha a sân lung a ithung a ni. Amaa ei om ngêt tih inhriat infelna hrang chu hi hi a ni:

⁶Tukhom, Pathian leh irzomin ki om mai titu kha Jisua Kristaa om angin a iom sa hrang a ni, ti hi.

⁷Inditom takhaio, nin kuang thupêk thar ki hong irziak ni mak e, thupêk milui, a phut ata nin inei kha ki irziak a ni. Thupêk milui kha, nin inhriat sai tâk kha a ni.

⁸Khannisian atûna nin kuanga thupêk ki irziak hi a thar a ni, kha thutak kha Kristaa leh nangnia an lang; inthim kha a hong irkiang thiaia, vâr tak tak a hong vâr tâk sikin.

⁹Vâra om irtia, a urêng khôkmâk chu atûn ten khom inthima a la iom mai a ni.

¹⁰Tukhom mâni urêng lungthungtu chu vâra a om maia, amaa khan tûkna rêng om mah.

¹¹Tukhom mâni urêng khôkmâktu chu inthima a oma, inthima a’rvâk ngaia, inthimin a mit an zîng pe ngai sikin a fena khom a inhriat ngai loi a ni.

¹²Nâihaio, Krista zâra nin sualhai ngaidam a ni tâk sikin nin kuang ki irziak a ni.

¹³Pahaio, ama chu a phut ata om mai kha nin inhriat tâk sikin nin kuang ki irziak a ni. Vânglaihai, Setan kha nin inhnê tâk sikin nin kuang ki irziak a ni.

¹⁴Nâihaio, Pa kha nin inhriat tâk sikin nin kuang ki irziak tâk a ni. Pahaio, ama chu a phut ata om mai kha nin inhriat tâk sikin nin kuang ki irziak tâk a ni. Ruathartehaio, nin hrâta, Pathian thu nangnia a om tâk sika Setan nin inhnê tâk sikin nin kuang ki irziak tâk a ni.

¹⁵Rammual hi lungthung no unglân, rammuala thil omhai khom lungthung sa no roi, Tukhomin rammual hi lung a thungin chu, Pa lungthungna a inei loi a ni.

¹⁶Rammuala thil om murdihai taksa irzukna hai, mit irzukna hai, mâni sum irsorpuinahai le dam sûng roiinpuinahai hi Pa kuang ata suak ni mak e, rammual ata suak kêng a ini ual.

¹⁷Rammual hi a’rzuknahai pumin a hong iboi thiai a ni, khannisian, Pathian nuamlam thotu chu kumkhua’n om mai a ti.

¹⁸Nâihaio, zoro hnungkhôn a hong ni tâka, Krista râl la hong om a ti, ti nin inhriat ang khan, atûn hin Krista râlhai tamtak an hong suak ta; khasika khan zoro hnungkhôn kha a ni tah ti ei inhriat a ni.

¹⁹Anni kha ei lai ata an suaka, ei mi le satak tak ni mahaia, nihai sian ei kuang an iom mai hrang a ni. Khannisian, an rêngin ei mi le sa ni zit mahai tih an inlang fiana hrangin an isuak tâk a ni.

²⁰Nangni chu, Mi Irthianga khan sahriak nangni a’rthutira, itinrêng nin inhriat a ni.

²¹Thutak kha nin inhriat loi sika ki irziak ni maka, thutak nin inhriat sikin le thutak ata minlak rêng rêng suak ngai mah ti khom nin inhriat sika ki irziak a ni.

²²Jisua kha Krista a nih ti pomloitu nêka milak tu mo om? Kha pomloitu kha Krista râl a ni. Pa le Nâipa a ihnôl a ni.

²³Tukhom Nâipa pomloi chu Pa khom a ipom loi a ni; tukhom Nâipa pomtu chu Pa khom a ipom a ni.

²⁴Nangni’n chu a phut ata nin inhriat kha nangnia inomtir mai roi. A phut ata nin inhriat kha nangnia a om maiin chu nangni khom Pa le Nâipa khan nin iom mai hrang a ni.

²⁵Hi hi a ni a thu’nkung, Krista ngêtin ei kuang a inkung kumtuang hringna hi.

²⁶Nangni hruai irhmang tumtuhai chungchâng thu hi nin kuang ki irziak a ni.

²⁷Nangni chu, a sahriak nangni pol kha nangnia a om maia, tukhom irchu nang mak chêi. A sahriak nangni irpoltirna khan thil tinrêng nangni ar chutira, kha kha a dika, milak ni mah. Khanchu, nangni a irchutir ang khan Kristaa khan om mai roi.

²⁸Atûn hin, Nâihaio, a zuang inlâr tika hâi taka ei oma, a zuang Nikhuaa inzak loia ei om theina hrangin Kristaa khan om mai roi.

²⁹Ama kha mi diktak a ni ti nin inhriatin chu, dik taka thoptu ka chu a nâihai an nih ti inhre roi.