Read Hrangkhol ROIRÊLTUHAI 1 Bible Online

ROIRÊLTUHAI 1 - Hrangkhol bible

ROIRÊLTUHAI 1

¹Josua thi hnungin Israelhaiin RENGPA an zonga, “Kanaan mihai doi hrangin kin laia tu nam hi mo kop masa tak hrang?” an tia.

²RENGPA’N, “Juda irchihai kop masatak ri sehai, ram hi an kuta ki pêk a ni,” a tia.

³Juda irchihaiin, an urêng Simeona irchihai kuang, “Ei ta hranga inkung rama hin hong unglân, Kanaan mihai hi doihai roi, keini khom, khaang ngêtin nin ram ta hrangin doi hrangin hong kin ti,” an tia.

⁴Khasikin, Simeona nam le Juda namhai chu irdoinaa an fe tâka, RENGPA’N Kanaan mihai le Periz mihai chu an hnêtira, Berek-a mi sîngkhat an inhnêa.

⁵Kha khan Adoni-bezeka a lei oma, an doia,

⁶a intân pata, an irzûla, an chela, a kutpui le a kepui an tanpai pea.

⁷Adoni-bezeka’n, “Rêng sômsari kutpui le kepui ki lei tan inbongpai pea omhai khan ki bu nêkna maichâm hnuaia bu’rmal an hrût ngaia, khaanga ki itho ang chie khan Pathianin ki chunga a hong tho tâk a ni hi te,” a tia. Khanchu, Jerusalema an hruaia, kha khan a thi tâka.

⁸Juda irchihaiin Jerusalem an doia, mi an thata, khopui chu an hâla.

⁹Kha zoia chu Juda irchihaiin tâng rama omhai, tâng phâia omhai le Negeb (Kha kha thang ram tiang ramchâr irhming a ni) hmuna om Kanaan mihai chu doi hrangin an irsiama.

¹⁰Hebron khua, Kiriath-arba an ti ngai chu, an doia, Sesai mihai, Ahimana mihai le Talmai mihai chu an inhnêa.

¹¹Kha rengata Juda irchihai chu Debir doi hrangin an fea, tiana khan kha khua kha Kiriath-sefer ti a ni ngai.

¹²Kaleba’n, “Kiriath-sefer doia, lâk thei chu, ki nâinu Aksaii dôngma hrangin pêk ki ti, a tia.

¹³Kaleba sangpa Kenaza nâipa Othniela’n a lâka, a nâinu chu a dôngma hrangin a pêk tâka.

¹⁴An irnei nî khan a pa kuanga ram ngên hrangin Othniela’n a nora. A sakuartung chung rengata a chuma, Kaleba’n, “Imo ni inuam?” a tia.

¹⁵Nupang khan, “Thilpêk ni pe ro, sim tiang ramchâra ni nin omtir tâk lolo’n chu tui hnâr neihai ni pe’n lân,” a tia. Kaleba’n khoichung leh khoihnuai tuihnâr omna chu a pêk tâka.

¹⁶Mosia tarpu tianga irchi, Ken mihai chu Juda irchihai leh tûmzôl khua an ti Jeriko rengata Arad khua sim tiang Judai ramchâra an fea, khataka omhai laia khan an omsuam tâka.

¹⁷Juda irchihai chu Simeona mihai leh an fe suama, Zefat khuaa khan Kanaan mihai chu an doia; khua chu an insiat zita, a’rhming Horma an phuaa.

¹⁸Gaza, Askelon, Ekron hai le a kôl vêla khuahai chu Juda irchihaiin an lâka.

¹⁹RENGPA’N Juda irchihai chu a ompuia, tâng rama omhai chu a inhnotsuaka; tâng phâia omhai rêk chu sakor thîrtali an neia, Juda irchihaiin inhnotsuak thei mahai.

²⁰Mosia thu angin Hebron chu Kaleba an pêka, anni’n Anaka nâi inthum chu an inhnotsuaka.

²¹Benjamina irchihaiin Jerusalema om Jebus mihai chu inhnotsuak mahai; Jebus mihai chu Benjamina irchihai leh Jerusalema atûn ten hin an omsuam.

²²Efraima le Manasea irchihai chu RENGPA’N a ompuia, Bethel doi hrangin an fea.

²³Matona khan Bethel chu Luz ti a ni. Khua envêl hrangin mi an tîra.

²⁴Mi inkhat khua rengata a hong suaka, khua envêltuhaiin, “Khopui inrûka lût theina nin hril roh, ite nang lo no ni ung,” an tia.

²⁵Khanchu khopui lûtna chu a’rhmuhaia, Efraima le Manasea mihaiin khua chu an lâka, khandaiin mi an that tôla; kha mi inkhat kha chu an insûng mihai leh ile an zôk.

²⁶Ama chu Hit rama a’rthona, khua a chuana, a’rhming Luz a phuaa; atûn ten hin kha irhming kha a la’rput mai.

²⁷Manasea irchihaiin Beth-Sean khuaa omhai, Taanak khuaa omhai, Dor khuaa omhai, Ibleam khuaa omhai le Megido khuaa omhai, Kanaan mihai an kôl vêla khuaa omhai leh ile inhnotsuak mahai. Kanaan mihai chu an om mai tâk a ni.

²⁸Israel mihai an hong hrât sit sitin chu Kanaan mihai chu sinthônaa hmang hrangin an siama, an hnot chu inhnotsuak mahai.

²⁹Efraima mihaiin Gezer khuaa Kanaan mi omhai chu inhnotsuak mahai. Kanaan mihai chu an bila Gizer khuaa khan an om sa tâka.

³⁰Zebulun mihaiin Kitron le Nahalal khuaa omhai chu inhnotsuak mahai. Kanaan mihai kha an laia an om kumkhua tâka; aniachu siahloa an siamhai.

³¹Asera mihaiin Ako khuaa omhai, Sidon khuaa omhai, Ahlab khuaa omhai, Akzib khuaa omhai, Helba khuaa omhai, Afek khuaa omhai, Rehob khuaa omhai chu inhnotsuak mahai.

³²Asera mihai chu Kanaan mihai kâra an om sa maia, inhnotsuak mahai.

³³Beth-Semes khuaa omhai, Bethanat khuaa omhai chu Naftalia mihaiin inhnotsuak mahai; kha rama om Kanaan mihai leh khan an om sa tâka; Beth-Semes le Bethanat-a omhai chu sinthônaa hmang hrangin an siama.

³⁴Amor mihaiin Dana irchihai chu tâng rama an inhnotdoka, an omna hmuna lût nôk phal ta mahai.

³⁵Amor mihai chu Har-heres tânghaia, Aijalon khuahaia, Saalabin khuahaia an om mai tâka; khannisian, Josefa insûng mihai chu an hrât zêla, an sinthotua hmang hrangin an hong om tâka.

³⁶Amor mihai ramri chu Akrabim hong fena le hmâr tiang Sela-ah irthokin a tungin a fe pat a ni.