Read Hrangkhol ROIRÊLTUHAI 10 Bible Online

ROIRÊLTUHAI 10 - Hrangkhol bible

ROIRÊLTUHAI 10

¹Abimeleka a thi hnunga khan Isakara irchi laia mi Pua nâipa Tola, Dodoa tupa, Efraim tâng ram Samir khuaa om chu Israelhai sansuak hrangin ar siama.

²Kum sômhni inthum sûng Israelhai chu a hruaia, a thia, Samir khuaa khan an phûma.

³Tola thi hnunga Gilead mi Jaira a hong om nôka.

⁴Israelhai chu kum sômhni inhni a hruaihaia. Nâipasal sômthum a neia, kha mihai khan chuangna hrang sakuartung an nei chita.

⁵Gilead rama khopui sômthum an neia, kha khua irhming chu “Jair khua” ti a ni mai tâk. Jaira chu a thia, a omna Kamon khuaa an phûma.

⁶Israel mihaiin RENGPA nuam loi lam thilsual an tho nôka; Baalhai, Asterothi-hai, Amona pathianhai, Zidon mi pathianhai, Moab mi pathianhai, Amor mi pathianhai, Filistia mi pathianhai an biak saa.

⁷RENGPA chu Israelhai chunga a sân a ning an mur tâka, Filistia mihai le Amon mihai kuta a pêka.

⁸Amon mihaiin kum sômkhat kiriat sûng chu Jordan nisua tianga Amor mihai ram Gilead-a Israel omhai chu dengtheia lunginzîng takin an siahaia.

⁹Khan Amon irchihai kha Juda, Benjamina le Efraima irchihai doi hrangin Jordan râl an kâia; khasikin Israelhai chu a sân an lunginzîng tâka.

¹⁰Israelhaiin RENGPA an koia, “Kin Pathian kin irheisana, Baal sin kin thoa, ni chunga thilsual kin itho a ni,” an tia.

¹¹RENGPAN Israelhai kuang, “Aigupta mihai, Amon mihai, Amor mihai, Filistia mihai,

¹²Zidon mihai, Amelek mihai le Maon mihaiin deng nangni an intheitira, nin ni koia, nangni ki saninzôk a ni kha.

¹³Khan khomin, nin ni la’rheisana, pathian dang sin nin tho pea; khasikin, nangni saninzôk viat no ning.

¹⁴Nin inuam tak pathian danghai kuanga khan fe ta roi; nangni sansuak hrangin ngên unglân, lunginzîng nin tuang lai khomin nangni sansuak ri se,” a tia.

¹⁵Israelhaiin RENGPA kuanga, “Kin sual a ni, nangin sa ni iti lam ang takin kin chunga tho ro; hi mihai ata hi ni saninzôk phot ro ba,” an tia.

¹⁶Khanchu, an kôla pathian dang irlimhai chu an paia, RENGPA chu chubai an mûk tâka; Israelhai inriang zia a hmu’n chu a sân lung an khamhaia.

¹⁷Khan Amon-hai chu an irbukkhôma, Gilead hmuna riakbuk an khuara, Israelhai khom an irbukkhôma, Gilead biala Mizpa khuaa riakbuk an khuar saa.

¹⁸Israel mihai le Gilead-a an hruaituhaiin, “Amon mihai doi hrangin tu mo malam hruai hrang? Gilead ram pumpui sûnga hruaitua la chang a ti,” an tia.