Read Hrangkhol ROIRÊLTUHAI 11 Bible Online

ROIRÊLTUHAI 11 - Hrangkhol bible

ROIRÊLTUHAI 11

¹Gilead mi, Jeftha chu pa hâitak a nia, a nu chu notizuar a ni. Gileada nâi a ni.

²Gileada dôngma’n nâipasal a nei maia, khahai chu an hong ulianin Jeftha chu an inhnotsuaka, ‘Kin pa insûng irchon nangin lua thei no chi ni, nu danga nâi ni ni hi,’ an tia.

³Jeftha chu a urênghai khua rengata a suaka, Tob rama a om tâka. Jeftha chu mi dukdak loihaiin an zuia.

⁴Amon mihaiin Israelhai an hong doia khan

⁵Gilead hruaituhai chu Tob khuaa om Jeftha chu hruai hrangin an fea,

⁶Jeftha kuang, “Amon mihai kin doi theina hrangin kin hruaitu taka hong chang ro ba,” an tia.

⁷Jeftha’n Gilead upahai chu a sâma, “Nin ni ennuam no sikin, nin pa in ata nin ni inhnotsuaka, dengtheina nin tuang tena itho sika mo nin ni hong ipan hi?” a tia.

⁸Gilead upahaiin Jeftha chu hiang hin an sâma, “Kha sik taka khan a ni, Amon-hai ni doipuia ni hruai hrangin nang kin nuam, Gilead mihai hi nangin ni hruai hrang a ni,” an tia.

⁹Jeftha’n, “Amon-hai doi hrangin ni hruai kîra, RENGPA’N a nin hnêtirin chu nin hruaitua chang ki ti,” a tia.

¹⁰Gilead upahaiin, “Ni nuamlam angin tho kin ti, RENGPA chu kin thu inhrepu a ni,” an tia.

¹¹Khanchu, Jeftha’n Gilead upahai chu a zuia, mihaiin an hruaitua le a lutaka an siam tâka, Jeftha’n a thil phut chu Mizpa khuaa khan RENGPA makunga an inpuanga.

¹²Jeftha’n Amon rêng kuang palâi a tîra, “Kin ram doi hrangin itho mo ni hong irrol,?” a tia.

¹³Amon rêngin palâihai kuanga, “Aigupta ram ata Israelhai an hong suaka khan ki ram an nir chupuia, khasik taka khan a ni. Arnon dung le Jabok dung kâra, Jordan irhôr chu an ni lâkpai pea, hihai hi hril intam loiin an ni ipêk kîr hrang a ni,” a tia.

¹⁴Jeftha’n palâihai chu Amon rêng kuanga a tîrhai nôka,

¹⁵“Moab le Amon ram hi Israelhaiin lâkpai mahai.

¹⁶Aigupta ram ata Israelhai an hong suak khan ramchâra fe thalin tuipui sena an fea, Kades an tunga.

¹⁷Edom rêng kuang, ‘Ni ram sûnga lûtin nin fetir ro,’ tia an ngên lai khan lei phal ma, khaang ngêtin Moab rêng khom an ngêna, lei phalhai maka; Israelhai chu Kades-ah an om maia.

¹⁸Edom ram lût loiin ramchâra irkual pumin an fea, Moab ram rêng khom phal maka, Moab khua nisua tiang an irkuala, Moab ram lût loiin an ramri dung Arnon phâi, an ram ni loina lam tiang riakbuk an khuara.

¹⁹Israelhaiin Amor mi Hesbon rêng Sihona kuanga khom, ‘Kin rama fe hrangin ni ram sûng hong lût kin ti,’ tia an ngên kha,

²⁰Sihona’n lei phal maka, a mihai a koikhôma, Jahaz hmuna riakbuk a khuara, Israelhai chu a doi tâka.

²¹Khannisian, Israelhai Pathian RENGPA’N Sihona le a mihai chu Israelhai kuta a pêka, an thata; kha lai ram Amor mihai omna chu an nei tâka.

²²Khanchu, Amor-hai ram, Arnon dung le Jabok dung kâra, ramchâr le Jordan dung kâra ram chu an nei tâk a ni.

²³RENGPA Israelhai Pathianin Amor mihai ram a lâkpai pehaia, Israel mihai a ipêk chu, nangin neipai hrang ni itum ma ni?

²⁴Ni pathian Khemosa’n ram nang a ipêk kha neiin lân, kin Pathian RENGPA ni ipêk tâk ram chu keini’n nei kin ti.

²⁵Moab rêng Zipora nâipa Balaka nêka hrâtin ni inhriat ma ni?

²⁶Kum irzathum zel Israelhai hin Hesbon khopui le Aroer khopui hi, an kôl vêl khuahai leh ile, Arnon vadung kôl khopui murdi leh hin an hong lua tâka, kha sûnga khan chu lâkpai pe hrang rêng ni itum ngailoi.

²⁷Khasikin, keini’n thilsual kin nei moa, nangni’n nin ni hong idoi mai hi nin itho indik loi a ni. RENGPA Roirêlpu’n, Israel mihai le Amon mihai kâra thu hi rêl fel ta ri se,” a tia.

²⁸Khannisianlân, Amon rêngin Jeftha chong kha irngai pe nuam ual mah.

²⁹RENGPA Irtha chu Jeftha chunga a hong tunga, Gilead le Manasea ram chu ar fanga, Gilead bial Mizpa khuaa khan a hong kîr nôka. Amon-hai rama khan a fe tâka.

³⁰Jeftha chu RENGPA makunga chong an kunga, “Amon mihai hi ni nin hnêtir photin chu,

³¹in rengata râl ram kin hong kîr nôka ni lei lôm hranga hong suak masatak chu tukhom ni ri se, RENGPA hranga ser irthiang a ini hrang, hâlirvôm thilinhlanin hmang ki ti,” a tia.

³²Jeftha chu Amon mihai rama khan a fe tâka; a va doia, RENGPA’N an hnêtir tâka.

³³Aroer khua ata Minit bial khua sômhni, Abel-Keramim dênin a lâk kîra, a that chita. Israel mihai makunga khan Amon-hai chu an duai tâka.

³⁴Jeftha chu Mizpa khua a ina a fe nôka. Irngai ta, ama lôm hrangin a nâinu chu khuangtehai leh a lei lâm suaka. Ama chu a nâi neisun a ni, nâipasal mani nâinupang mani nâi dang rêng rêng nei mah.

³⁵A nâinu a hong hmu’n chu beidongin a puan an potthêra, “A poi oke! ki nâinu, nangma kher hi! ki milung nin siatin ki milung ni nin zîngtir tak taka! RENGPA kuanga chong kin kung tâka, sûtpai nôk thei ni ta ma,” a tia.

³⁶Ama’n, “Ka pa RENGPA kuanga chong ni inkung tâkin chu ni thu angin tho ro; RENGPA’N ni râlhai Amon-hai chunga phuba a lâk tâk kha te,” a tia.

³⁷A pa kuanga khan “Hiang hin ni itho hrang; tha hni sûng chu ki bingin ni sia unglân, ki rualhai leh tânga khun zu fe kin ta, nupang dôngmate irthiang ki ni laia tho hrang hi zu sûn ki ti,” a tia.

³⁸A pa’n an fetira, tha hni sûng chu an omtir tâka. A rualhai leh khan tânga an fea, nâi neiloia a ithi hrang chu an sûna.

³⁹Tha hni zoia khan a pa kuanga a hong kîr nôka, RENGPA kuanga a chonginkung chu a tung tâka; nupang dôngmate irthiangin a thi tâka. Kha kha Israelhai nam lei tho dân a ni.

⁴⁰Israelhai laia, Israel dôngmate’n, kum tin Gilead mi Jeftha nâinu sûn hrangin sûn minli an hmang ngai, dâna an hong nei tâka.