Read Hrangkhol ROIRÊLTUHAI 12 Bible Online

ROIRÊLTUHAI 12 - Hrangkhol bible

ROIRÊLTUHAI 12

¹Efraima mihai chu an irbukkhôma, Jordan râl Zafon-ah an kâia. Jeftha kuang, “Amon mihai doi hrangin ramri ni khêla, itho sika mo kop sa hrangin ni ni ikoi loi? Ni in chu nang leh ile kin ihâl hrang a ni,” an tia.

²Jeftha’n, “Amon mihai le kin mihai hi thei dôrin kin irkhal a ni. Ni changpui hrangin nangni ki koia, ni changpui loia nin iom a ni kha.

³Ni changpui nuam mak chêi ti kin hriatin mâni hringna irhuamin ramri ki’rkân tâka, kin va doia, RENGPA’N a nin hnêtir tâk a ni. Khasikin, ni doi hrangin itho sika mo nin hong irsiam tâk hi?” a tia.

⁴Jeftha’n Gilead mihai chu a koi khôma, Efraima-hai chu a doia, an hnê tâka. Efraima-haiin, “Nangni Gilead-hai hi Efraima le Manasea ram rengata chaninvâia hong intân irhmang nin ni,” an tia.

⁵Gilead-haiin Jordan dâi kâi hrang phalna an hong zongin Gilead-haiin, “Efraima mi mo nin ni?” an lei ti thiaia. “Ni ma ung,” a ti’n chu,

⁶“Shibolet lei ti ta,” an tia; a’rlam dân fia thei loia, ‘Sibolet a ti’n chu an chela, Jordan vadung kôla khan an that zel ngai. Kha zoro nia Efraima mi thi murdi chu sîngminli le sânghni an ni.

⁷Jeftha’n Israelhai chu kum ruk a hruaia, a thia, Gilead a omna khuaa an phûma.

⁸Jeftha zoia Bethlehem khuaa mi Ibzana’n Israelhai chu a hruaihaia.

⁹Ibzana’n nâipasal sômthum le nâinupang sômthum a neia. A nâinu sômthumhai chu an mâni irchipui nam ni loi, kho dang mi pasal an neitirhaia; a nâipa sômthumhai khom mâni chipui nei loiin ram dang mi sômthum a hruai pehaia. Ibzana’n Israelhai chu kum riat a hruaia.

¹⁰A thia, Bethlehem khuaa an phûma.

¹¹Ibzana hnunga khan Zebulun mi Elona’n Israelhai chu kum sôm a hruaia.

¹²Elona chu a thia, Zebulun ram Aijalon khuaa an phûma.

¹³Elona hnunga khan Pirathon khuaa mi Hilela nâipa Abdona hin Israelhai chu a hruaia.

¹⁴Abdona’n nâipasal sômminli le tupa sômthum a neia, an chuangna hrang sakuartung sômsari a neia. Abdona’n Israelhai chu kum riat a hruaia.

¹⁵Abdona chu a thia, Efraima ram Amalek-hai omna tâng ram Pirathon khuaa an phûm tâka.