Read Hrangkhol ROIRÊLTUHAI 15 Bible Online

ROIRÊLTUHAI 15 - Hrangkhol bible

ROIRÊLTUHAI 15

¹Inhnunga chu bu ât laiin Samsona’n kêlte chôiin a dôngma chu a va pana, “Ki dôngma chontana va lût ki ti,” a tia. Khannisian, a tarpu’n lei phal ta maka.

²A tarpu’n, “Ni indit viat ta loi mani kin tia, ni rualpa inkhat kha kin lei inneitir tâk a ni hi te. A sangnu hi a hmêl a sa uala, lungkham takin ama irthûla nei zel ta roh,” a tia.

³Samsona’n, “Atûnlai hin Filistia mihai hi lei longnenghai ta rong,” a tia.

⁴Samsona chu a suaka, sihal sômthum a chela, inhni an irmei a suiirzomhaia, a suiirzomna taka khan meiser a siaa.

⁵Meiser chu an choka, Filistian-hai loia bubil hmuna khan sihalhai chu an suaa. Bu pâr le bu indinglai chu a kâng suat suata, oliv hmunhai khom a kâng saa.

⁶Filistia mihaiin, “Tu itho ma ni?” an tia. “Timna khua mi mâkpa Samsona itho a ni hi te. A dôngma kha a tarpu’n a lâk pea, a rualpa a pêkpai a ni kha,” an tia. Filistia mihai chu an honga, kha nupang le a pa chu an in leh ile an hâl thathai tâka.

⁷Samsona’n, “Hianga nin itho a ni’n chu nin chunga phuba ki lâk mâka chu mong no ning,” a tia.

⁸Khanchu, an chunga a tho tâka, mi tamtak a thata, Etam lungpui khura a lûta, a om mai tâka.

⁹Filistia mihai chu an hong fea, Judai rama riakbuk an khuara, Lehi vêla an inzardara,

¹⁰Judai ram mihaiin, “Itho sika mo ni doi hranga nin ihong hi?” an tia. Anni’n, “Samsona khitphiara, a ni ilong lam angin long hrangin kin ihong irsiam a ni,” an tia.

¹¹Judai ram mi sângthum Etam rôl khura khan an zu fea, Samsona kuang, “Filistia-hai hi kin chunga thuneituhai an nih ti inhre mak che mo? Kin chunga ni tho lam hi itina mani tâk?” an tia. Ama khan, “An ni ilong angin an chunga ki itho a ni kha,” a lei tia.

¹²Anni’n, “Filistia mihai kuta pêk hrangin nang khit hrang kin ni,” an tia. Samsona’n, “Nangni’n ki chunga kut insumloi hrangin chong irkhâm phot roi,” a tia.

¹³Samsona kuang, “A ni nang khit kin ta, an kuta pêk kin ti, nang that no ni ung,” an tia. Khanchu, hruihrual thar inhniin an khita, khur ata chu an hong hruaisuaka.

¹⁴Lehi hmun an hong tungin chu Filistia-haiin an lei dona, an khêk mur mura; RENGPA irtha’n a hong man thuta, an khitna hruihrual thar chu pat ang takin an potsat chit tâka.

¹⁵Sakuartung irkamru thar tak hi a hmua, a lâka, mi sângkhat vêl a van zui thathaia.

¹⁶Samsona’n, “Sakuartung irkam ru maiin ki that tôla, A sâng têlin ki vîk thathaia, Sakuartung irkam ru chârin,” a tia.

¹⁷Kha thu kha a hril zoiin sakuartung irkam ru chu a paia, kha hmun kha Ramat-lehi an phua tâka.

¹⁸Samsona chu a tui an hrâl tak taka, RENGPA chu a koia, “Ni siahlo hi roiinpui takin ni nin hnêtira, tuiinhrâlin ki ithi mai hrang a ni hi te, sertan loihaiin ni hong thatna’n ti,” a tia.

¹⁹Khan, Lehi hmuna khur om chu RENGPA’N ar ônga, tui a hong suaka, a hong in tena chu a sôl a hong chan pe tâka, a hong har tâk. Kha tuikhur kha En-Hakkore an phuaa, Lehi hmuna hin atûn ten hin a la om.

²⁰Filistia mihai zoro lai khan Samsona’n Israel mihai chu kum sômhni a hruaia.