Read Hrangkhol ROIRÊLTUHAI 16 Bible Online

ROIRÊLTUHAI 16 - Hrangkhol bible

ROIRÊLTUHAI 16

¹Samsona chu Gaza khuaa a fea, notizuar a hmua, a zâlpuia.

²Gaza khuaa hruaituhaiin Samsona a hong ti an inhriatin chu an irhuala, “Khua hong vâr phot ri seh that ei ti,” an tia; dâihrekin kul mikot bula khan zânkhovârin an inruanga.

³Khannisianlân, Samsona chu zân chimrip ten vai a oma; zân chimripa khan a thoia, khopui kul mikot chu a chela, a khâra, a chopui le a kalnahai kha a phôipai zita, Hebron tâng sîp taka a hong sia tâka.

⁴Kha hnunga khan Sorek irhôra om dôngmate inkhat, a’rhming Delili chu ar ditpuia.

⁵Filistia hruaitu ulianhai ringa a kuang an honga, “Itina mo hiang dôra a ihrât, itin mo kin inhnê thei hrang, inhriat tum ro ba; ama khita kin soisak theina hrangin tangka sum sângkhat le irzakhat nang pe chit kin ti,” an tia.

⁶Khanchu, Delili’n Samsona kuang, “I sika mo hiang dôra ni ihrât nin hril ro ba; itin mo nang khit inlân nang kin soisak thei hrang?” a tia.

⁷Samsona’n a kuang, “Saihli thal hrui thar la chârloi sari leh hin ni khithai sianlân, hrât no ninga, mi danghai ang mai ni ta ki ti,” a tia.

⁸Khanchu, Filistia hruaitu ulianhaiin saihli thal hrui thar la chârloi sari an hong chôia, kha leh khan Samsona chu an khita.

⁹Delili chontan sûngrila lei inruangtuhai an oma, a kuang, “Samsona thoi ro, Filistia mihaiin nang doi hrang an ni,” a tia. Khan, saihli thal hruihai chu patzâi meiser leh hâl sat ang maiin a chat chit tâka. A hrât nasan chu lan hre thei mahai.

¹⁰Delili’n Samsona kuang, “Nin hril mak che, ni ni huang a ni: a dik takin nin hril ro, itin mo khit phiar thei ni ini hrang,” a tia.

¹¹Ama’n, “Hruihrual thar, la hmang viat ngai loi leh hin ni khithai sian, hrât no ninga, mi danghai ang mai ni ta ki ti,” a tia.

¹²Delili’n hruihrual thar la hmang viat ngai loi chu a lâka, a khitphiara, “Samsona, Filistia mihaiin nang hong doi hrang an ni ta,” a tia. Lei inruangtuhai chu chontan sûngrila an oma, an hong suaka. Khan, a khitna hruihrual chu patmal ang takin an potsat chit tâka.

¹³Delili’n Samsona kuang, “Ni ni la huang maia, dikloi thu ni ni la ihril nôk a ni hi. Itin tak mo nang khit inlân ni ihrât theiloi hrang?” a tia. Samsona’n, “Ki sam phiar sari hi puana không sa’n lân a kilna leh kil khakin lân, hrât ta no ning, mi danghai angin ni ta ki ti,” a tia.

¹⁴Delili’n a sam chu a kil khaka, a kuang, “Samsona, Filistia mihaiin nang hong doi hrang an ni ta,” a tia. Ama chu a hong hara, a sam kildêna timmatuahai chu a phôi chita, a sam chu a kêlsua paia.

¹⁵Delili’n, “Voithum reng ni ni huang tâka, itin mo ki lungthung ni ni la iti thei? lung ni thung tak tak mak che, ni hrât nasan khom nin hril nuam mak che,” a tia.

¹⁶Sûn tin a nor ngot ngota, a ngên ngut ngut sikin, thipui rak ang dôrin a milung a hong inzîng tâka.

¹⁷Khanchu a lungrîl murdi a hril zit tâka, “Ki suak rengata Pathian ta hranga Nazarit mi ki nia, ki sam hi ziatinkol la ni ngai ma, ki lu hi voiinkol ni sianlân ki hrâtna hi boi a ta, mi dang ang takin ki ihrât loi hrang a ni,” a tia.

¹⁸Delili’n tinrêng a hril tatak tâk a nih ti an hriatin, Filistia hruaituhai chu a koihaia, “Hong suak ta roi, itinrêng a nin hril zit tâk,” a tia. Filistia hruaituhai chu an honga, sum tangka chu an hong chôia.

¹⁹Khan, a mal chunga lukhamin an intira, mi inkhat a koia, a sam phiar sari chu an tantir zita; a soisaka, a hrâtna chu a hong boi tâka.

²⁰Delili’n, “Samsona, Filistia mihaiin nang an hong idoi hrang a ni,” a tia. A inmu chu a hong hara, “Matona ang khan hrât ki ta, zôkpat ta no ning mo,” a tia. RENGPA’N a mâksan tâk ti inhre mah.

²¹Filistia-haiin an chela, a mitru an kêlsuak pea. Gaza khuaa an hruai tâka, kut khitna thîrhrui an inbuntira; intângna ina bu an innôitir ngaia,

²²khannisian a lua sam chu a hong sei nôk tâka.

²³Filistia hruaituhai chu an pathian Dagon kuang thilinhlan tamtak inhlan hrangin an irbukkhôma, “Kin râlpa Samsona chu kin pathianin a ni pêk tâk hi te,” an tia.

²⁴Samsona an hmu’n chu an pathian an inpâka, “Ei pathianin ei râlpa le ei ram insiatpu, mi tamtak ni thatpupa chu ei kuta a ni pêk tâk hi te,” an tia.

²⁵An lôm tak taka, “Samsona kh a hong hruai u ta, nuiza siamna’n lei hmang rei,” an tia. Intângna in ata Samsona chu an hong hruai suaka, nuiza siamna’n an hmang tâka, chopui le chopui inhni kâra an inngîrtira.

²⁶Samsona’n a kaipu nâipang kuang, “Hi in doina chopui hi ni hong inthemtir ta, lei irhnêl rong ba,” a tia.

²⁷Ina khan Filistia hruaitu, pasal le nupang an omkhôm mura, a in irchuan chunga khom khan pasal le nupang sângthum vêl an oma. Samsona nuiza siamna’n an hmang chu an ena.

²⁸Khanchu, Samsona’n RENGPA a koia, “O RENGPA Pathian, nin hriat maiin lân, nin hrâttir ro ba; O Pathian, atûna vai hin ni hong inhrâttirin lân ki mitru inhni kêlsuakpaihai phuba Filistia mihai chunga hin hong la vak ki ti,” a tia.

²⁹Khan, Samsona’n, kha a irhnêlna chopui inhni chu a bân chang tiang le vei tiang an kuaa. sirsanin a hmanga.

³⁰“Filistia mihai hi lei that hlukhai rong,” a tia, chopui chu ar nakhrât thei dôrin a nama, in chu a chim rup tâka, an hruaituhai le a sûnga om murdi chu a del thathaia. A dam laia a ithathai nêkin atûna a ithathai hi an tam ual.

³¹A urênghai le a pa insûnghai chu an zuanga, a ruak chu an kêlsuaa, a pa Manoa thân Zora le Estaol kâra khan an phûm tâka. Kum sôm inhni Israelhai chunga roi a irêl a ni.