Read Hrangkhol ROIRÊLTUHAI 17 Bible Online

ROIRÊLTUHAI 17 - Hrangkhol bible

ROIRÊLTUHAI 17

¹Efraima tâng rama mi inkhat a oma, ar hming chu Mika a ni,

²a nu kuang, “Ni sumru tangka sângkhat le irzakhat mi’n an inrûk kha, khomâk ni sâma, kei khom ni ni inhril kha, ki ilâk a ni, ki la idôn mai a ni” a tia. A nu’n, “E, ki nâipa, RENGPA’N sat nang vur ri se,” a tia.

³Sumru tangka sângkhat le irzakhat chu a nu a pêk nôka, a nu’n, “Ki khomâksâm kha ki nâipa chunga a chum loina hrangin keima ngeiin hi sumru tangka hi RENGPA ta hrangin ki inhlan a ni. Thing millim inluanna’n le millim siamna’n ni ihmang hrang a ni. Khasikin, sumru tangka chu nang pêk inkhîr nôk ki ti,” a tia.

⁴A nu a pêk inkhîr sumru chu, a nu’n sumru tangka irzahni chu a lâka, millim siam thei kuang thing millim sumru inluanna hrang le a sungna hrangin sumru millim siamna’n a pêka; Mika ina khan an sia tâka.

⁵Mika’n Pathian in a sina, Efod leh millim a siama, a nâipa inkhat chu ochai hrangin an kunga.

⁶Kha lai khan Israel rama rêng la nei mahai, mâni chitin sa an ti angin an om mai a ni.

⁷Judai rama Bethlehem khuaa ruatharte inkhat Levia irchia mi hi a oma,

⁸Kha mi kha omna hrang zongin Judai rama Bethlehem khua chu a suaksana, Efraima tâng rama a honga, Mika in chu a hong tunga.

⁹Mika’n, “Kho rengata ni ihong mo?” a tia. Ama’n, “Judai rama Bethlehem khuaa om Levi irchia mi ki nia, omna hrang zongin ki ihong a ni,” a tia.

¹⁰Mika’n a kuang, “Ki kuang om zel ta ro, ka pa le ki ochai ni hrangin chang ta ro; kum khata sumru tangka sômkhat nang pe ki ta, ni puan sil inkhat le ni bu nêk hrang khom nang pe sa ki ti,” a tia.

¹¹Kha nî ata kha Levia chi chu lungchuk takin a om tâka, a nâipa inkhat ang takin a om sa tâka.

¹²Mika’n Levia irchi mi chu sinthôna a pêk tâka, khanchu a ochai hrangin a siaa, Mika ina khan a om sa tâka.

¹³Mika’n, “Levi irchia mi ngêt ochai ki nei tâka, RENGPA’N vângsakna ni pe ngêt a ti, ti kin hriat!” a tia.