Read Hrangkhol ROIRÊLTUHAI 19 Bible Online

ROIRÊLTUHAI 19 - Hrangkhol bible

ROIRÊLTUHAI 19

¹Kha laia Israel rama rêng an nei no lai khan Levia irchi mi inkhat Efraima tâng ram mongna tiang a oma, Judai ram Bethlehem khuaa mi lâksîr a neia.

²A lâksîrnu’n a mâksana, a pa in tiang, Judai rama Bethlehem khuaa khan a kîra, tha minli vêl a va oma.

³A pasal chu a thoia, chonghoia inthêma hruaikîr nôk tumin siahlo inkhat le sakuartung inhni leh ile a va fea. Nupangin a pa ina a hruai lûta, nupang pa chu a sân a lôma.

⁴Khan, a nupang pa a tarpu khan a kuanga om hrangin a chela, sûn thum chu an fâka, an inah, kha khan a riaka.

⁵A sûn minli nî khan zînga a thoia; ama khom suak tumin an irsiama; khannisian, a tarpu’n, “Imo khôk fâk nêk fa bak unglân, suak nin ti,” a tia.

⁶Khanchu, an toi khôma, an ruaiin an fâkin an in tâka. A tarpu’n, “A vuan zân chu riak nôk phot roi, nin lungrîl chu râifân takin om roi,” a tia.

⁷Kha nî khan suak an tum nôka; khannisian, a tarpu’n a khap nôka, an châm nôk tâka.

⁸A sûn ringa ni khan suak ta hrangin zîng taka an thoia, a tarpu’n, “Misa a la’rhnuai mân chu om phot unglân, imo khôk fâk nêk fa bak roi,” a tia.

⁹Khan ama chu a lâksîr le a siahlo leh ile fe hrangin an irthokin chu a tarpu’n, “Irngai ta, khohloi a ini tâk kêng, la châm nôk hi roi. Misa a tâk hrang reng a ni tâka, hi hin riak unglân, bu le anh la hei fa nôk hi rei. Nangtûk zînga thoi nin ta, in tiang fe nin ti,” a tia.

¹⁰Khannisian, ama chu châm nôk hrangin chu nuam maka, a thoia, a suak tâka, Jebus-hai khua Jerusalem kôl chu a puakpêl ngai sakuartunghai leh an tunga, a lâksîrnu khom a om saa.

¹¹Jebus-hai khua an tungin misa ar hnuai ok tâka, a siahlo khan, “En ta, Jebus-hai khuaa hin riak ta ei ti,” a tia.

¹²A pu’n, “Israel mi ni loi, nam dang khuaa ei iriak hrang ni mah. Gibea khua pan ei ti,” a tia.

¹³A siahlo kuang, “Gibea khuaa mo Rama khuaa mo ei iriak hrang a ni,” a tia.

¹⁴An fe zêl tâka Gibea khua an tungin misa a tâk tâka. Gibea chu Benjamina-hai khua a ni.

¹⁵Riak tumin Gibea chu an pana, anni intungtir hranga lei koi tukhom an om no sikin, khopui kholaidung chu an pana, an toi tâka.

¹⁶Kha lai taka khan, khohloia tar inkhat a loia fe hi a honga; ama chu Efraima tâng ram mi a nia, Gibea khuaa om mai ngai a ni; Gibea mihai chu Benjamina irchihai an ni.

¹⁷Kha mi khan khopuia kholaidung a hong enin chu mikhual toi a hmua, “Kho taka fe hrang moh? kho rengata hong mo ni ni?” a tia.

¹⁸Levia mi khan, “Judai ram Bethlehem-a om kin nia, Efraima tâng ram monga kin va ife a ni, Judai rama Bethlehem-a kîr nôk hrang kin nia, RENGPA ina fe kin tum a ni, tukhomin nin tungtir nuam om mahai.

¹⁹Sakuartung fâk hrang faponhai khom kin neia, kei le ki lâksîrnu leh ki siahlo ruatharte hrang khom bu fâk hrang kin nei, ite irsam nei viat ma ung,” a tia.

²⁰Putar khan, chardong tho no roi, nin innang murdi chu keima’n tum zit ki ti, kholaia hin chu riak viat no roi,” a tia.

²¹Khanchu, a ina a hruai inlûta, sakuartunghai chu fapon a pêka, an ke an irsûka, an fâkin an in tâka.

²²Râifân le lômtaka bu an fâk laiin khopuia mi sual pôlin in kha an hong irhuala, mikot chu an hong suk tuk tuka, in neipu tarpa kuang, “Ni ina mikhual tunghai kha hong hruaisuak ta, lei irpôlpuihai ro ung,” an tia.

²³In neitupa chu a suaka, “Ni make, ki urênghai, khaanga thil saloi tak chu tho tum no roi; hi mi hi ki ina mikhual tung a ni, hi thil saloi hi a chunga tho no roi,

²⁴en ta, ki nâinu, pasal la pôlloi le hi mi lâksîr hi, hong hruaisuak ki ta, lei hruai roi, nin nuamlam ang angin lôhai roi, hi mi chunga rêk hin chu thil saloi tho no roi,” a tia.

²⁵Aniachu, mihaiin a chong irngai pe nuam mahaia; khanchu, kha Levia mi khan a lâksîr chu a hruaisuaka, anni’n an lei irpôlpuia, zân sôtin an soisaka, zîng khua a hong vâra, misa a hong suak vângin chu an insua tâka.

²⁶Nupang chu zînga a pasal tungna ina khan a va fea, mikot bula khan a’rtet raka, khovâr mân chu kha khan a om tâka.

²⁷A pasal chu zînga a thoia, fe suak tumin mikot chu a hong inhonga, a lâksîrnu chu mikot bula a lei irtet raka, a kutin mikot chelin a hmua.

²⁸Ama’n, “Thoi ro, fe ei ti,” a tia. Khannisianlân, ite sâm maka. Khanchu, a sakuartung chunga khan an kâitira, a thoia, a in tiang a fe tâka.

²⁹In a va tungin chu chemte a lâka, a lâksîr chu a ru pumin sômkhat inhni’n a’rchanchita, Israel ram sûng pumpuia a thon suaka.

³⁰A lei hmu murdi’n chu, “Israelhai laia Aigupta ram rengata an hong suak ata hiang thi rêng rêng hi la om viat ngai ma; ngaitua unglân, chong khômin ngaidân lei hril ta rei,” an tia.