Read Hrangkhol ROIRÊLTUHAI 20 Bible Online

ROIRÊLTUHAI 20 - Hrangkhol bible

ROIRÊLTUHAI 20

¹Israel mi murdi chu thukhat chelin Mizpa khuaa RENGPA makunga an irbuk khôma, Dan le Beerseba khua inkâra mi murdi le Gilead ram mihai leh ile an fe khôm a ni.

²Israel nam tin hruaituhai khom Pathian mihai pungkhômhai laia khan an changa. Sipaihai khandai le thal irlek thei mi nuai minli an ni.

³Benjamina irchihaiin Israelhai kha Mizpa khuaa an irbukkhôm ti an lei inhriata. Israel mihaiin, “Itina mo hi thil saloi tak hi a hong itung dân hi nin hril u ta,” an tia.

⁴Levi irchia, nupang an ithat pasal khan, “Benjamina-hai khua Gibea ki va tunga, ki lâksîrnu leh kin riaka.

⁵Gibea mihai chu zâna ni doi hrangin an hong irthoka, ki tungna in kha an hong irhuala; ni that an tuma, ki lâksîrnu chu an siatpuia, a thi chak tâk a ni.

⁶Ki lâksîrnu ruak chu insûnga ki hruaia, a taksa chu ki’rchanchita, Israel rama ki thon darh a ni kha, hiang dôra porinchea hur an ni.

⁷Irngai u ta, Israel nâihaio, hi hin nin om irkip zita, itina tho hrang mani, nin ngaidân hril u ta?” a tia.

⁸Khanchu, mipui murdi chu thu inrual takin an thoi huaka, “Tukhom mâni puan in tiang mo mâni in tiang mo, tûte kîr no ma ni.

⁹Hiang hin Gibea chu soisak ei ti, tasânin doi ei ta, mi senkhat Gibea doi hrangin inthanghai ei ti.

¹⁰Kin laia sôma inkhat ei fâk hrang tum kin ta, mi dangin Gibea mihai chu hremhai an ti, hiang thil hurna porinche an tho sikin,” an tia.

¹¹Khanchu, Israel rama pasal murdi chu lungirrual takin khopui chu insiat tumin an irbukkhôma.

¹²Israel namhaiin Benjamina namhai ram tina palâi an tîra, “Ithoa mo hianga thilsual hi nin itho?

¹³Gibea khuaa mi, hianga thilsual thohai hi hong hruai unglân, that hrang kin ni, hianga thilsual hi Israel laia kin inboi hrang a ni,” an tia. Khannisianlân, Benjamina-haiin Israelhai chong kha ite uksak mahai.

¹⁴Benjamina-haiin kho tin ata Israel mi danghai lei doi hrangin Gibea khuaa an hong irbukkhôma.

¹⁵Gibea khua mihai bâka Benjamina mi kho dang dang ata honghai chu khandai le thal chôi mi sînghni le sângruk an ni. Gibea mi khom inthang sai mi irzasari an ni.

¹⁶Hi mi inthangsuakhai laia mi irzasari chu vei kut hmang mi an ni, sâilungdêngin sammal khom insel loiin dêng thei an ni.

¹⁷Israel mi, Benjamina-hai doi hrangin mi nuai minli khandai thal chôi sipai an ni, khahai kha irdoi mi ving an ni.

¹⁸Israel mihai chu an irthoka, Bethel-a an fea, Pathian an zonga, “Benjamina irchihai doi hrangin tu nam mo fe masa hrang?” an tia. RENGPA’N, “Juda irchihai fe masa ri sehai,” a tia.

¹⁹Khanchu, Israel mihai chu zînga an thoia, Gibea khua irhualin riakbuk an khuara.

²⁰Benjamina irchihai doi hrangin an irthoka, an suaka, khopui tiang irnghatin an sipaihai chu an irtânga.

²¹Benjamina irchihai chu Gibea khua ata an hong suaka, kha nî khan Israel mihai chu mi sînghni le sânghni an thata.

²²Israel mihai chu an irthor irhlom nôka, an tho phut nia an irsiamna hmun ngêt khan an irdarh nôka.

²³Kha nikhua mân khan Israelhai chu RENGPA makunga chapin khohloi dênin an oma, “Kin urêng Benjamina irchihai doi hrangin kin irthok nôk hrang mani?” tiin an irdona. RENGPA’N, “Doihai nôk roi,” a ti a ni.

²⁴A voihnina khom khan Israelhai chu Benjamina irchihai doi hrangin an irthoka.

²⁵Benjamina irchihai chu a sûn hni nî khom khan Gibea khua ata an hong suaka, râlthuam chôi mi sipai sîngkhat le sângriat an that nôk tâka.

²⁶Israel mi murdi chu Bethel-a an fea, RENGPA makunga an chapa, an toia, khohloi dênin bu an ngheia, hâlirvôm thilinhlan le irngeina thilinhlan an inhlana.

²⁷Kha lai khan Pathian Thuthung Bôm chu kha khan a oma, RENGPA chu an irdona.

²⁸Arona nâi Eleazara nâipa Finehasa chu Thuthung Bôm enkolpu a ni. Mipuiin RENGPA kuang, “Kin urêng, Benjamina irchihai doi hrangin kin irthok hrang mo, irthok loi hrang mo?” tiin an irdona. RENGPA’N, “Fe nôk roi, nangtûka nin kuta nangni pe ki ti,” a tia.

²⁹Khasikin Israel mihaiin Gibea khua kôla râl sipai inrûkin an lei thuphaia.

³⁰Sûn dang ang ngêtin Israelhai chu a sûn thum nî khan, Benjamina irchihai doi hrangin Gibea khopui tiang irheiin an irzara.

³¹Benjamina irchihai chu lei doihai hrangin an va suaka, khua ata an irzûl suakhaia, sûn dang ang ngêtin loia, lampuilian Bethel le Gibea panna lamhaia khan Israel mihai sômthum an that nôka.

³²Banjamina irchihaiin, “Matona ang khan kin thathai nôk tâk,” an tia. Israelhaiin, “Tho intân ei ti, khopui ata hi lamliana hin va suak ei ti,” an tia.

³³Israel sipai murdihai chu Baaltamar hmuna an irbukkhôma, sirsan an lâk tâka, khan Gibea khua irhuala lungpui kâra irbîk inrûkhai kha an zuang suak saa.

³⁴Khan, Israel mihai laia inthang mi sîngkhatin Gibea khua chu an doi tâka, Benjamina irchihai khan an ihrât loi hrang ti inhre viat mahai.

³⁵RENGPA’N Israelhai chu Benjamina irchihai an hnêtira, Israelhaiin mi sînghni le sângringa le irzakhat an thata. Khahai kha Benjamina mihai sipai zit an ni.

³⁶Benjamina irchihaiin an ihrât loi hrang ti an inhriat tâka. Israel sipai bulpuihai khan Gibea khua irhuala lei irbîk inrûka an isiahai kha irnghatin Benjamina mihai chu hnung tiang an siasanhaia.

³⁷Kha mihai chu Gibea khuaa khan irningloiin an intân lût thuta, an irsemdara, an ihmu ta phot chu an thata.

³⁸Israel sipai bulpui le lei irbîk inrûka omhai khan irsinsiana an siama, khua ata meikhu a suak zut zut an hmu’n chu,

³⁹irdoina hmuna Israel omhai chu an tho nôk hrang ti a ni. Kha lai khan Benjamina irchihaiin Israel mi sômthum an lei that tâka. “Matona kin itho ang takin kin itho nôk hrang a ni,” an tia.

⁴⁰Khua rengata meikhu a suak zut zutin chu Benjamina irchihaiin an hong thîra, khua a kâng zit tâk ti an hmu’n chu ar khêl an ti tak taka.

⁴¹Khan Israel mihai chu an hong irhei nôk tâka, Benjamina mihaiin thi zit hrang kin nih ti an inhriatin a sân an char an indong tâka.

⁴²Israel mihai ata ramchâr tiang an intân tâka, tûte om loina tiang intân an tuma; khannisian, intânsuak thei mahai, sipai bulpuihai le khua ata hong suakhai khan kiang tiang kiang tiang an doihaia,

⁴³Israel mihaiin an râlhai chu an irhualhaia, misa suakna tiang Gibea tiang an intâna, an irzûlhai pata, an that zêla.

⁴⁴Benjamina sipai satak tak mi sîngkhat le sângriat an thata.

⁴⁵Senkhat chu Rimon khur panin an intâna, lampuia mi sângringa vêl chu an thia. Israelhaiin Gidon dênin an irzûlhaia, mi sânghni chu an thata.

⁴⁶A rêngin, Benjamina mihai chu mi sînghni le sângringa irdoi mi ringot an ithi a ni.

⁴⁷Mi irzaruk chu ramchâr tiang Rimon rôl khura an intâna, kha khan tha minli vêl an oma.

⁴⁸Israelhai chu Benjamina mihai an doi zêla, pasal le nupang nâipang khom, an insûng sâhai ten khom an that fâi zita. Kha vêla an khua murdi chu an hâl fâi zit tâka.