Read Hrangkhol ROIRÊLTUHAI 21 Bible Online

ROIRÊLTUHAI 21 - Hrangkhol bible

ROIRÊLTUHAI 21

¹Israel mihai chu Mizpa khuaa an irbukkhôma, khan RENGPA makunga, “Mi tukhomin kin nâinuhai hi Benjamina mi kin inneitir hrang ni ma,” tiin chong an inkung ngita.

²Khanchu, Israel mihai chu Bethel-a an fea, Pathian makunga khohloi dênin an toia, inringtak le beiindong takin an chapa,

³“O, RENGPA, Israelhai Pathian, hianga thil hi itina hong tung mani tâk na, Israelhai lai ata Benjamina irchihai hi an irhmang zit hrang tâk hi?” an tia.

⁴A tûk zînga chu zîng taka maichâm an siama, irngeina thilinhlan le hâlirvôm thilinhlan an inhlana.

⁵“Israel nam laia Mizpa khuaa irbukkhômna hmuna chang sa loi an om mo?” tiin an irdon irhlôma. Mizpa khuaa RENGPA makunga hong fe loi chu, ‘that ngêt hrang ni a ti,’ tiin chong an inkung ngita.

⁶Israelhaiin an urêng Benjamina irchihai chu an lunginkham tak taka, “A vuan hin Israelhaiin kin laia nam inkhat chu kin inchân a ni ta.

⁷Benjamina nam la dam sunhai ta hrangin itin mo dôngma kin izongpuihai ta hrang? RENGPA makunga kin nâinuhai chu dôngmaa inneitirhai viat loi hrangin chong lak kin lei inkung khak tâka,” an tia.

⁸Khan anni’n, “Israel nam laia mi a tu nam tak hi mo Mizpa khua inkhômpuia chang sa loi?” an tia. Kha inkhômpuia khan, Gilead rama, Jabes khuaa mi chu inkhat lua hong mahai ti an hmu tâka.

⁹Irhming an hong koihaiin chu Jabes khuaa mi chu tûte om mahai.

¹⁰Irbukkhôm nahruaituhaiin an laia mi huaisen sîngkhat le sânghni an tîra, “Fe unglân, Jabes khuaa mi murdi, nupang le nâipang khom va that zit roi,

¹¹pasal that zit unglân, nupang khom pasal lei siatpui tâkhai rêng rêng chu that zit roi,” an tia.

¹²Jabes-hai laia khan dôngmate, pasal la isiatpui loi irzaminli an hmua, Silo khuaa Kanaan rama khan an hong hruaihaia.

¹³Rimon rôl khura om Benjamina irchihai kuang palâi an tîra, irdoi inmong ta hrang thu an hrila.

¹⁴Benjamina irchihai chu an hong kîra, Israelhaiin Jabes dôngmate, an ithat loihai chu an dôngmahai hrangin an pêka; aniachu, chuk mahaia.

¹⁵RENGPA’N Israel irpumkhatna a senindarh tâk sikin mipuihai chu a sân poi an tia, Benjamina irchihai chu an irngaiinhluhaia.

¹⁶Irbukkhôma hruaituhaiin, “Benjamina laia nupang om ta mahai, a la damhai dôngma hrang hi itin mo ei izongpuihai ta hrang?” an tia.

¹⁷Israel nam sôm nam hnihai laia hin nam khat khom irhmang phal ma ung. Khasikin, Benjamina la dam sun omhai ta hrangin irchi ei inneitirhai ngêt hrang a ni.

¹⁸Khannisian, ei nâinuhai lak dôngma inneitirhai hrangin phal mak mea. “Mi tukhom mâni nâinu Benjamina mi inneitir chu vânnisalin om ri se, tiin chong ei lei inkung tâka,” an tia.

¹⁹“Irngai ta, RENGPA hranga kum tin Silo khuaa kût om ngai chu a zoro anaiteng tâk kêng,” tiin an ngaituaa. (Silo hi Bethel hmâr tiang, Bethel ata Sekem panna lamlian nisuana tianga om, Lebanon sim tianga om a ni).

²⁰Benjamina irchihai chu chong an bêhaia, “Fe unglân, Grep irhuanhaia lei irbîk unglân,

²¹lei thîr mai unglân, Silo khuaa dôngmate rual lâm hrangin hong suak an ta, nangni khom grep irhuan ata hong suak unglân, Silo khuaa dôngmatehai chu mâni dôngma hrang seng chel unglân, Benjamina rama nin ihruaihai hrang a ni.

²²An pahai mani an nuchahaiin mani nangni an hong inbuai khomin, “Lungkham takin inneitirhai mai roi, râl anga irdoiin dôngmaa an ichelhai khom ni maka; nangni lakin nin nuam sika nin ipêk khom ni ual loia, nin chonginkung khom nin insiat ual mani, lei ti kin ti,” an tia.

²³Khan Benjamina irchihaiin an ihrilhai angin an thoa, Silo khuaa dôngmate rual lâmhai laia mi, mâni dôngma hrang seng an chela, an ram tiang an fepuihai tâka, khopuihai chu an siam insata, kha khan an om tâka.

²⁴Kha rengata kha Israel danghai chu mâni rama an irchi chi le mâni nam ram senga an kîr nôk tâka.

²⁵Kha lai khan Israel rama rêng om mahai, sa an iti ang angin mi tin an om ngai a ni.