Read Hrangkhol ROIRÊLTUHAI 4 Bible Online

ROIRÊLTUHAI 4 - Hrangkhol bible

ROIRÊLTUHAI 4

¹Ehuda thi hnunga Israelhaiin RENGPA nuam loi lam thilsual an tho nôk tâka.

²Khasikin, RENGPA thuin Kanaan rêng Jabina’n Israelhai an hnêa, Hazor khuaa an lala, a sipai hruaitu chu Haroset-Goim-ah om Sisera a ni.

³Jabina’n thîr sakortali irzakuak a neia, kum sômhni sûng chu Israelhai deng an theitirhai tak taka, Israelhaiin RENGPA an koia.

⁴Deipunu, Debori, Lapidota dôngma chu, Israelhai roi a rêla.

⁵Efraima tâng rama, Bethel le Rama khua kâra, Debor khuaa tûm thing hnuaia a toia, Israel mihaiin a kuang chongirdon an fe hena.

⁶Kedes-Naftali-ah om Abinoama nâipa Baraka chu a koia, a kuang, “Israelhai Pathianin ‘Naftalia le Zebulun irchihai ata mi sîngkhat hruaiin Tabor tâng tiang fe roi,’ a iti mo ni mah?

⁷Kanaan rêng Jabina sipai hruaitu Sisera chu a thîr sakor tâlihai le a sipaihai leh ile Kison dunga nangni hruai ki ta, ni kuta nangni pêk ki ti a ti kha,” a tia.

⁸Baraka’n, “Ni fe’n chu fe ki ta, ni fe no’n chu fe no ning,” a tia.

⁹Debori’n, “Fe ngêt ki ti; aniachu, ni fe khomin ni roiinpuina hrang ni no ni; RENGPA’N Sisera chu nupangin a inthattir hrang a ni,” a tia. Debori chu a thoia, Baraka leh Kedes an pana,

¹⁰Baraka’n Naftalia leh Zebulun mihai a koibûmhaia, mi sîngkhatin an zuia, Debori khom a fepuihai sa.

¹¹Ken mi Hebera chu Mosia tarpu, Hobaba irchi a nia, Ken mihai lai ata a bingin a oma, Elon-Bezananim bul Kedes vêla khan riakbuk a hong khuara.

¹²Tabor tâng tiang Abinoama nâipa Baraka a fe thu Sisera chu an hrila.

¹³Khan Sisera’n a thîr sakor tâli irzakuak chu a fepuihaia, Haroset-goim rengata a sipai murdi chu Kison dunga khan a hruaia.

¹⁴Debori’n Baraka kuang, “Tho, a vuan hin RENGPA’N ni kuta Sisera hi pêk a ti. RENGPA’N nang a hruai mai mo ni ma?” a tia. Khanchu, Baraka chu Tabor tâng rengata a sipai sîngkhat leh ile an chuma.

¹⁵Baraka’n Sisera chu khandaiin a doi thuta, RENGPA’N Sisera chu a thîr sakor tâli le a sipaihai leh ile an buaihai chit tâka. Sisera chu a thîr tâli ata a chuma, kein an tân pata.

¹⁶Baraka’n a thîr tâlihai le a sipaihai leh ile an irzûla, Haroset-goim dênin an irzûla, Sisera sipaihai chu a sâtthat zita, inkhat lua intâna zôk om mahai.

¹⁷Sisera chu Ken mi, Hebera dôngma Jaeli puan ina an tâna, a lût pata, Hazor rêng Jabina le Habera insûng mihai chu an irngei mai a nih.

¹⁸Sisera don hrangin Jaeli chu an tânsuaka, “Hong intân ro, ka pu, ki kuang hong irbîk ro; chi viat no ro,” a tia. A puan ina khan an tâna, a lûta, puanin ar khû tâka.

¹⁹Sisera’n, “Tui in hrang ni pe ta, ki tui an hrâl e,” a tia. Sehrât dût bûr an honga, an intira, puanin ar khû nôka.

²⁰Sisera’n, “Puan in mikota khan omin lân, mi an honga, ‘Hitaka hong mi an om mo?’ tia nang an irdonin, ‘Om mah’ ni iti hrang a ni,” a tia.

²¹Sisera chu a sân a sôla, inmutui takin a ina. Khan, Habera dôngma’n puan in epna irzum le sekchôi a lâka; a in hnungin dâiriamin a va lûta; a inmu irhnik lai taka a zâl laiin puan in kilna irzumin a bangbarêpa a hêma, a hêm intuma, hnuaia an pêr tâka, khanchu a thi tâka.

²²Baraka’n Sisera chu a hong irzûla, Jaeli’n lei don hrangin a lei suaka, a kuang, “Hong ta, mi ni izong chu nang inentir ki ti,” a tia. An lût suam tâka, Sisera chu a lei thia, puan in kilna chu a bangbarêpa a’rphun muta.

²³Kha nî sûn khan Israelhai makunga Kanaan rêng Jabina chu RENGPA’N an duaitira.

²⁴Kanaan rêng Jabina chu Israelhaiin an inhnê zêl tâka, a mongna taka chu, an that irhmanghai zit tâk.