Read Hrangkhol ROIRÊLTUHAI 7 Bible Online

ROIRÊLTUHAI 7 - Hrangkhol bible

ROIRÊLTUHAI 7

¹Khanchu Jerubaala an iti Gideona le a kuanga mi omhai chu zîng taka an thoia, Herod vadung kôla riakbuk an khuara, Midian mihaiin chu an omna hmâr tiang More tâng kôla riakbuk an khuara.

²RENGPA’N Gideona kuang, “Ni mihai hi a sân an tam, ni kuta Midian mihai ki pêkin chu, Israelhaiin keini kut ngeia saninzôk kin ni hi teh tiin, omlian thôna’n ti.

³Mipui laia hril ro, “Tukhom, irdoina chia thâidôp chu Gilead tâng ata in tiang kîr nôk ri se, tiin inpuang ro,” a tia. Khanchu, mi sînghni le sânghni chu in tiang an kîra, sîngkhat chu an la om.

⁴RENGPA’N Gideona kuang, “Mi an la tam ok, ivadunga hruaihaiin lân, keiin inthangsuakhai ki ti: “Hi hi fe ri seh,” ki ti’n chu fepuiin lân, ‘Hi hi chu fe no ri se,’ ki ti’n chu tîrpai ro,” a tia.

⁵Khanchu, ivadunga a hruaihaia, RENGPA’N Gideona kuang, “Ui anga mileia tui inliak chu a bingin sia’n lân, khûksadela tui indôp chu a bingin se ro,” a tia.

⁶An kut zaphaa inliaka inliakhai chu mi irzathum an nia, mi danghai chu khûksadelin tui an indôp a ni.

⁷RENGPA’N Gideona kuang, “Mi irzathum, an kuta tui thâla indôp hmanghai leh hin nangni sansuak ki ti, Midian mihai chu nin kuta pêk ki ti,” a tia.

⁸Khanchu fâk nêk pêltuhai le bekul irputtuhai le mi irzathum ti no chu mi dang chu an in tiang a tîr nôkhai zita. Midian mihai riakbuk chu an thang tiang phâia om a ni.

⁹Zâna RENGPA’N Gideona kuang, “Thoiin lân, an riakbuka, zu fe roh, ni kuta inhnêna ki pêk tâk a ni.

¹⁰Nangma zu fe ni chi’n chu ni siahlo Pura kha hruai sa roh.

¹¹An ihril chu zu’rngaiin lân, kha zoi chu an riakbuk zu doi chu a sate’n nuam ni ti,” a tia. Khanchu, a siahlo Pura leh khan râl sipai omna hmor tiang khan an zu fea.

¹²Midian-hai, Amalek-hai le ramchâra omhai chu irhôra khan an irthek mura, khâi pung ang mai an ni, an saringseihai khom muanga chiaiphoi anga tep zoiloi an ni.

¹³Gideona hai chu an zu tungin, mi inkhatin a rual chu a’rmang a lei inhrila, “Irmang ki neia, kin riakbuka hin barli bai tang a’rhluma, riakbuk puanin a hong dela, a del siata, hnuaia a’rdâp ziak tâk,” a tia.

¹⁴A rualpa’n, “Joasa nâipa Gideona khandai a ni no’n te imo a ini hrang? Kha Israelpa kuta khan Midian-hai le sipaihai murdi hi Pathianin a pêk tâk a ni hi te,!” a tia.

¹⁵Gideona’n irmang le a omzia an inhril kha a inhriatin chu Pathian chubai a mûka; Israelhai riakbuka a hong fea, an kuang, “Thoi roi, Midian mihai chu RENGPA’N nin kuta a pêk tâk,” a tia.

¹⁶Mi irzathum chu buk thumin a sena; bêl rong le a sûnga meiser om, bekul leh ile a pêkhai chita;

¹⁷an kuang, “Mi en chak unglân, ki itho ang tho zêl roi, an riakbuk sîr tak ki tung tika ki itho angin nangni khom nin itho hrang a ni.

¹⁸Kei le ki fe chanpuihaiin bekul kin tumin chu kil tina tum chit unglân, ‘RENGPA le Gideona ta hrangin’ tiin khêk sup sup roi,” a tia.

¹⁹Gideona le a mi irzakhathai chu zân laia, râl hrungtuhai an irthûl lai takin riakbuk hmor chu an tunga; an bekul chu an tuma, an bêl chu an zêm khoia.

²⁰Pâl danghai khomin an bekul chu an tuma, bêl chu an zêm khoia, meiser chu an vei kutin an intûka, bekul chu an chang kuta intûkin an tuma, “Khandai chu, RENGPA le Gideona ta hrangin!,” tiin an khêk tâka.

²¹Râlhai riakbuk irhîlin an ngîrna hmun chita khan an ngîra, riakbuka sipaihai chu an khêka, an intân zoi tâka.

²²Gideona mihaiin bekul irzathum kha an tuma; RENGPA’N râlhai murdi chu anni le anni a’rtuktirhaia; Zarethan tiang Beth-sita dêna rot intân an oma, Tabat bul Abel-mehola ramri dêna rot intân khom an om.

²³Khan, Naftalia irchihai, Asera irchihai le Manasea irchihai Jordan nisua tiang le nitâk tianga omhai chu an koi bukhaia, Midian-hai an inhnotsuakhaia.

²⁴Gideona’n Efraima tâng rama palâi a tîrsuaka, “Hong suak unglân, Midian mihai hong doi unglân, Midian mihaiin Jordan dung le ivadung danghai chu an lei khâlhai zita.

²⁵Midian hruaitu inhni Oreba le Zeeba chu an chela, Oreb lung hmuna Oreba chu an thata, Zeeba chu Zeeb grep sômna khura an thata. Jordan râla Oreba le Zeeba lu chu Gideona kuang an hong chôia.