Read Hrangkhol 3 JOHANA 1 Bible Online

3 JOHANA 1 - Hrangkhol bible

3 JOHANA 1

¹Upa khan, a sâma ki lungthung Gaia, chubai nang ki mûk.

²Rual inditom tak, itinrênga hlo ni chuk, irtha le taksa tiang ni dama, ni hrisêl theina hrangin nang ki chongchai pe ngai a ni.

³Urênghai an honga, thutaka ni iamomzia le thutaka ni om indet khakzia an ni hong hrila, ki râi a fân tak tak a ni.

⁴Ki nâihai thutaka an om tih kin hriata ki ilôm bana chu lômna dang rêng nei ma ung.

⁵Rual inditom tak, hi urênghai hi mikhual ni khomhai sian an chunga ni lei satak taka,

⁶Koiindanga khom ni satzia an insîr ngai. An inzinna lama anni hi Pathian nuamlam tiang ni lei changpui zêl theiin chu a sân sa ti.

⁷Krista sinthoa an fenaa khan Jentailhai lai ata ite sanna la nuam mahai.

⁸Khanchu, thutak hranga sin suam ei ni, ei inhriat theina hrangin keini hin hi mihai hi ei ichangpui hrang a ni.

⁹Koiindanghai kuang khan lekha ki’rziak tâka, khannisianlân, Diotrefa, an laia hruaitu chang nuam ngaitu khan, ki thu uksak mah.

¹⁰Khasikin ki hong zoro tena chu a om dân, thil irkhêl tak tak thoa mi a ibê thuhai nangni hril zit ki ti. Kha kha a ruk ti loiin ama ngêtin urênghai lôm nuam maka, a lôm nuamhai khom a khapa, Koiindang ata an hnot suakhai ngai a ni.

¹¹Urêng inditom tak, a saloi chu irchu no’n lân, a sa chu irchu ual roh. Thil sa thotu chu Pathiana suak a nia, sin saloi thotu chu Pathian la hmu ngai mah.

¹²Demetria hi mi tinin an inpâka, thutak inpâk khom a ihlo a ni; keini khomin kin inpâka, kin inpâkna chu a dik a nih ti nin hriat.

¹³Ni kuang thu tamtak insîr hrang ki neia, khannisian, pe’n le lekha tuia irziakin nuam ma ung.

¹⁴Sôtnote hnunga nang hmu lat ki sabeia, kha tena hmêl irhmu’n la chong ta rei.

¹⁵Irtharngamna ni kuang om ri se. Ei rualhai hin chubai nang an mûk. Ei rualhai kha an irhming irlam sengin chubai ni mûk pe roh.