Read Hrangkhol JUDA 1 Bible Online

JUDA 1 - Hrangkhol bible

JUDA 1

¹Jisua Krista suak le Jakoba urêng Juda khan, Pa Pathian lungkhamna le Jisua Krista ienkolnaa om, ikoihai chu chubai ki mûk.

²Za’rngaina hai, irngeina hai, lungthungna hai nin chunga inpungin om ri se.

³Inditom takhaio, saninhringna ei idong chungchâng hi nin kuang irziak ki nuam tak tak ngaia; Pathianin a mi irthianghai laia iamna thu voikhat nang an kol indettir tâk hi thop ngit hranga nangni inthor hrangin nin kuang lekha irziak a nang ti kin hriata.

⁴Mi senkhat Pathian nei loihai, inrûkin ei laia hong lût an oma, kha mihai khan ei Pathian lungkhamna kha hurna an inchangtira, ei Hruaitu le ei Rengpa neisun Jisua Krista khom pom mahai. Kha mihai khan thiamno an chang hrang dân chu tianlai ata Pathian Thubu’n a lei inpuang sai diam tâk a ni.

⁵Nin inhriat sai zit a ni khomin, nangni hong inhriattir nôk ki inuam a ni. Rengpa’n Aigupta ram ata Israel mihai a sansuaka, khannisian an laia iamloituhai kha a inboipaihai nôk a ni.

⁶Vântîrtônhai khom an irchamneinahai pom nuam loia, an omna hmun mâksanhai kha, Roirêlna Nikhua roiinpui tika an chungthu rêl hrangin kumtuang thîrhruia khitin inthim hnuaia a isiahai tâk a ni.

⁷Khaang dêna khan Sodom le Gomora khua hai kha, an kôlvêla khua hai leh hurna porinchea an irpumpêk zoi tâk sikin, mi tin le inhriattirna’n anni chu kumtuang meia hrem an ni tâk a ni.

⁸Khaang dên khan, kha mihai khan inlârna an hmua, kha inlârna hmu sika khan an takpum an porinchetira, Pathian irchamneina an hnuaisiaa, chung tianga roiinpuihai khom an hrilinsiat ngai a ni.

⁹Mikaila, vântîrtôn inchungtak khomin, Diabola le Mosia ruak chungchânga an irsêl lai khan, chong saloiin hal nuam mah, “Rengpa’n hal ri se,” a ti chian a ni.

¹⁰Hi mihai hin an inhriat thiamloi murdi an insîrinsiat ngaia; ngaituana neiloi ram sahaiin an isuakpui inhriatna an izui ang dênin anni khom hin an izuinaa khan a insiattirhai a ni.

¹¹Lungkham an om bâk ngaia! Kaina lampui kha an zuia, sum irzûlin Balaama sualna tiang an intâna, Kora angin tehel an zong sikin, an irhmang sa ta!

¹²Khahai kha lungthungna hruai nin inthê insiattu an ni, inzak loiin an ot sa. Mâni ringot an irngaituaa, sûm rotui pailoi, favâng thing ra loi, voihni thi tâk; a’rzung le ileh inkar zit tâk; a’rhmang zit tâk ang kha an ni.

¹³Tuikhanglian ivôrpai, mâni mualirphoi irsak, ârsi chaninvâi, Pathianin kumtuang inthim irsa khak lei sia pehai ang kha an ni.

¹⁴Adama irchi fe thiai a sarina, Enoka khan hihai chungchâng hi an lei hrila, “En u ta, Rengpa chu a mi irthiang sâng tamtak leh zuang a ti.

¹⁵Pathian uksakloi mi murdihaiin Pathian chi loia an thil tho murdihai le ama doia thu ngar ta tak an insîr murdi chungchânga Pathian uksakloi mi sualhai thiamno inchangtir hrang le mi murdi chunga roirêl hrangin zuang a ti,” tiin.

¹⁶Kha mihai khan chiar le mi hrilsiat vai an hrâta, anni irzukna sual vai an irzûla, bâi nghal songin irpâkin an irsora, inlâpna irzûlin mi huang an hrât tak tak a ni.

¹⁷Inditom takhaio, nangni’n chu ei Rengpa Jisua Krista tîrtônhaiin thu an lei insîr kha inhre mai roi.

¹⁸“Zoro hnungkhôna chu, nangni innuisantuhai, Pathian uksak loia mâni irzukna ang taka omhai la om an ti,” tia nangni a ihril kha.

¹⁹Khahai kha irsenna insuaktuhai, taksa mi, Irtha mi ni loihai an ni.

²⁰Inditom takhaio, nangni’n chu iamna irthiang taka khan mâni irrual khak unglân; Irtha Irthianga chongchaiin,

²¹Pathian lungthungna khan irvong insa unglân kumtuang hringna hrangin ei Rengpa Jisua Krista lungkhamna kha nghâk roi.

²²Lungirhlâna neihai kha lunginkham unglân,

²³mei ata senkhat sansuak innanghai kha kaisuahai lat roi; senkhat chu chi pumin lunginkham unglân, an taksaa porinche kop silkaihai kha intir roi.

²⁴Tûkloi hranga nang enkol thei chu, a roiinpuina makunga sêlna boi le raiinfân tak taka nangni inngîrtir theipu,

²⁵Pathian omsun, a ni saninhringtu kuang khan, ei Rengpa Jisua Krista zâra, roiinpuina hai, inlalna hai, sinthotheina hai, irchamneina hai zoro theng tâk murdihai ata atûn le kumtuang dênin om mai ri se. Amen.