Read Hrangkhol THUPHUANG 1 Bible Online

THUPHUANG 1 - Hrangkhol bible

THUPHUANG 1

¹Hi lekhabu hi Jisua Krista thuphuang, Pathianin a suakhai inhriat hranga a ipêk, thil hong tung zôi hrang thu kha a ni; kha thu kha vântîrtôn zuang tîrin a suak Johana kuang a zuang inhriattira,

²khanchu, Johana’n a ihmu murdihai kha an sîra. Ama hi Pathian thu le Jisua Krista’n thutak a inpuang an sîrna a ni.

³Hi lei hrilna bu teptu le ar ngaihai le a sûnga thu om zômhai chu an vân a sa! Hihai murdi tungna hrang zoro hi anai tâk sikin.

⁴Johana khan Asia rama Koiindang sarihai kuang: Pathian, A om mai le, om tâka le, la om hranga kuanga irthok ata, A rêngtoihmun makunga irtha sari omhai kuanga irthok ata,

⁵Jisua Krista, inhriatpuitu iamom tak, thina irthoka thoinôk masa tak le rammual rênghai chunga roirêltu kuanga irthok ata, lungkhamna le irngeina kha nin ta ni ri se. Lung a ni thunga, a thina sikin ei sualhai ata a ni’rtansuaka,

⁶khua le tui le a Pathian le a Pa sintho hranga ochaihaia ni siamtu kuang, a ni, ama kuang ngei roiinpuina le irchamneina kumtuangin om mai ri se! Amen.

⁷En roi, ama kha sûm laia khin a izuang hrang a ni! Mi tinin hmu an ti, ama suntuhai ngei khomin hmu an ti. Irnêng chunga mi murdi’n ama kha châ an ti. Khaang tak khan la ni a ti! Amen.

⁸“Keima hi a maton tak le a hnungkhôn tak ki ni,” Rengpa Pathian om mai tâk le om tâka le la om mai hrang, Itinrêngthothei khan a ti.

⁹Kei Johana, nin urêngpa le Jisua hnung zuinaa a Ram mihai chunga dengtheina hong tung diar taka tuangna lama nin chanpuipa ki ni, Pathian thu le Jisua’n thutak a inpuang thu kin puangna sikin Patmos chômbunga intângin ki oma.

¹⁰Rengpa nia khan Irtha Irthiangin a ni pôla; khanchu ki hnunga irhai bekul anga inringin,

¹¹“Ni thil hmuhai hi irziakin lân, Koiindang sarihai: Efesi, Smurna, Pergamos , Thuatira, Sardis, Filadelfia le Laodikei hai kuang thon roh,” a iti kin hriat.

¹²Tu mo ni chongpui tih inhriat nuamin ki hong irhêlin chu, rângachak meiser siana sari ki hmua;

¹³Kha meiser siana laia khan mihriam ang, a kechum dên thaia songkolirfual innghâk, rângachak kongkhita khit ki hmua.

¹⁴A sam chu belra mul le ivur angin a vâra, a mit chu meichok angin a oma;

¹⁵a kezaphahai chu dâr irtêk, meipuia hâl irthiang tâk angin a oma, a hnuk irhai chu tuitâk irhai angin a ni.

¹⁶A kut chang tiang ârsi sari a chôia; a bâia irthokin khandai bê hni nei ngaih tak a hong suaka, a hmêl chu misa hrât lai tak ang a ni.

¹⁷Ama kha ki hmu le chu, a ke bula ithi ang dôrin kin rîla. Ama khan a kut chang tiang ki chunga irnghatin ki kuang, “Chi no roh! kei hi a maton tak le a hnungkhôn tak.

¹⁸A hring kha ki ni! Thina chunga le mithi khua chunga khom ircham ki nei.

¹⁹Khasikin ni thil hmuhai, atûna omhai le hi inhnunga la hong om hranghai hi irziak roh.

²⁰Ama hi ki kut chang tianga ârsi sari ni ihmuhai le rângachak meiser siana sarihai omzia irthup chu a ni: Ârsi sari chu Koiindang sarihai vântîrtôn an nia, meiser siana sari chu Koiindang sarihai an ni.