Read Hrangkhol THUPHUANG 11 Bible Online

THUPHUANG 11 - Hrangkhol bible

THUPHUANG 11

¹Khanchu, khianghrol irkhîna khianghrol anga ipêkin ki oma, “Fe’n lân, Pathian biak in le maichâm kha irkhi’n lân, a sûnga Pathian biakhai kha tep sa roh.

²Khannisianlân, Biak in pên tiang chu irkhî no roh, Jentailhai kuang pêk a ni tâk sikin. Anni khan khopui Irthiang kha tha sômminli le tha hni sirpha an ti.

³Ki inhriatpuihai inhni bora puan silin tîr ki ta, sûn sângkhat irzahni sômruk sûnga khan Pathian thu insîr an ti,” a tia.

⁴Kha inhriatpuitu inhnihai kha Oliv thing inhni le meiser siana inhni, irnêng Rengpa makunga ngîrhai kha an ni.

⁵Anni kha tukhomin innatir an tumin chu an bâi ata mei a hong suaka, an râlhai kha a kâng irhmang ngai, khaang dênin tukhomin innatir an tumin chu ithatin om ngêt an ti.

⁶Khahai khan Pathian thu an insîr sûng chu rua tholoi hranga irvân khâr theina irtha an neia, tui, thisen, inchang theina irtha an nei sa, khabana rammual hi an nuam dôr dengintheina tinrênga dengintheitir theina irtha an nei sa a ni.

⁷Khan, an inhriatna thu an insîr zoiin chu khurmongboi ata sahrâng hong suak hrang khan doihai a ta, inhnêhai a ta, thathai a ti.

⁸An ruak kha an Rengpa hembea a omna Jerusalem lamliana khan om a ti. Kha kho roiinpui kha irtha tiang thua chu Sodom le Aigupta ti a ni.

⁹Nam tina mihai, chi tina mihai, chong tina mihai le zât tina mihai khan an ruak kha sûn thum le chomân en an ta, phûm phal no ni.

¹⁰Kha inhnihai thi sika khan irnênga omhai lôm an ta, raifânin thilpêkhai irthon irhlôm an ti. Kha deipu inhnihai khan irnênga omhai deng an intheitir ok ngai sikin.

¹¹Khan, sûn thum le chomân hnunga chu Pathian kuang ata hringna phûk an sûnga a zuang lûta, an ke’n an ngîra; khanchu a hmuhai khan an chi ok ta.

¹²Khan, deipu inhnihai khan irvâna irthokin hnukirhai inring takin, “Hin hong roi!” ti chong an inhriata. An râlhaiin an en chian kârin sûm laia irvâna an fe tâka.

¹³Kha zoro taka khan hnîngnupui an hnînga; khua kha hmun sôma sena hmunkhat chu a chima, mi sâng sari an thi. A la hringhai khan an chi tâka, irvân Pathian an inpâk tâka.

¹⁴Thilirkhêl inhnina chu a theng tâka, khannisianlân, thilirkhêl inthumna hong tung zôi a ti!

¹⁵Khan, vântîrtôn sarina khan a bekul a hong tuma, “Rammual roirêlna chu ei Rengpa le Krista ta a hong ni tâk, ama’n kumtuangin roirêl a ti,” tiin irvâna hnukirhai inringtak takhai a hong oma.

¹⁶Khanchu, upa sômhni minlihaiin an rêngtoihmuna Pathian makunga toihai khan inbokin,

¹⁷“Rengpa Pathian Itinrêngthothei, A om mai le A om tâka! Ni sinthotheina roiinpuitak kha lâkin roi ni rêl tâk sikin ni kuang lômthu kin sir!

¹⁸Jentailhai khan ningmurna an sip ta, Ni ningmurna zoro khom a hong tung tâk sikin, Mithihai roirêl pe zoro hai, Ni suakhai, deipuhai, ni mi irthianghai, Mi lian mi chîn nir hming chituhai, Lômman ni pêk zoro le irnêng insiattuhai kha insiat sa hrang zoro a tung ta!” tiin Pathian chubai an mûka.

¹⁹Khanchu, irvâna Pathian biak in kha ar honga, Thuthung Bôm a zuang inlanga. Kha hnung chu kôlirlek hai, hnukirhai, khonri hai, hnîngnu hai, irial inrik takhai a hong om ta.