Read Hrangkhol THUPHUANG 12 Bible Online

THUPHUANG 12 - Hrangkhol bible

THUPHUANG 12

¹Khanchu, thilirkhêl roiinpuitak irvâna an langa. Nupangnu misaa irvo, a ke hnuaia tha om, ârsi sômhleihnia siam rênglukhum khum hi a oma.

²Kha nu khan nâi a vonga, nâiha sein a khêka.

³Thilirkhêl dang irvâna an lang nôka. Dragon sen lianpa, lu sari le irki sôm nei, rênglukhum sari khum chit hi a oma.

⁴A’rmeiin irvâna ârsi hmun thuma sena hmunkhat chu a zêma, irnênga a paithâk ta. Nupangnu nâi kha a zuang suak le chu a lei fâk theina hrangin nupangnu matona khan a ngîr ngita.

⁵Khan, nâipasal, nam tin chunga thîr khianghrola roirêl hrang a neia, a nâi kha Pathian le a rêngtoihmun tiang tuang zôiin a oma.

⁶Nupangnu kha chu ramchâra Pathianin hmun ar fûk pea, sûn sângkhat irzahni sômruk sûnga enkola a omna hrang tianga khan a rot ta.

⁷Khanchu, irvâna irdoina a om ta. Mikaila le vântîrtônhaiin dragon kha an doia, dragon le a tirtônhai khomin an doi dêna;

⁸khannisianlân, dragon kha inhnêpaiin a om tâka, ama le a tirtônhai kha irvâna om hrangin phal ni ta mahaia.

⁹Khanchu, dragon lianpa, rûlpui tar, Diabola le Setana an iti, rammual pumpui inlemtu kha an paithâk ta. Irnênga an paithâka, ama vântîrtônhai khom an paithâk sa.

¹⁰Kha hnung chu, irvâna hnukirhai inring takin, “Atûn chu ei Pathian saninhringna le a Reng ninaa a sinthotheina le a Krista irchamneina hai kha a zuang tung ta! Ei Pathian makunga ngîrin, a sûn a zâna ei urênghai hnôl ngaitu kha irvân ata an paithâk tâk sikin.

¹¹Belrate thisen le thutak an inpuang sika khan inhnêna an changa, an hringna khom thi ngam rakin an phal sa.

¹²Khasikin, irvânhai le a sûnga omhai, lo ta roi! Khannisianlân, irnêng le tuikhanglian, nin chung a rik! Diabola khan zoro bongte vai a nei tâk ti an hriat, ningmur takin nin kuang a zuang tak tak sikin,” a iti kin hriat.

¹³Dragon khan hnuaia paithâk a ni ar hriat le chu nâipasal nei nupangnu kha a’rzûl tâka.

¹⁴Khanchu, nupangnu kha dragon tôn phâk bana, kum thum le a chimrip sûng enkola a omna hrang ramchâr tiang a vuang theina hrangin irmupui lianpa mitha kianghniin an pêka.

¹⁵Nupangnu kha tuiin a tân theina hrangin a hnunga dragon khan tui, a bâia irthokin tuilian angin an phîsuaka.

¹⁶Khannisianlân, irnêngin nupangnu kha a changpuia, a bâi a ânga, dragon tui inphît kha an lem tâka.

¹⁷Dragon kha nupangnu chunga a ning an mur tak taka, nupangnu irchi la om Pathian thupêk zômhai le Jisua thutak inpuang pomhai kha doi hrangin a fe tâk.

¹⁸Dragon kha tuikhanglian chiaiphoia khan a ngîr tâka.