Read Hrangkhol THUPHUANG 15 Bible Online

THUPHUANG 15 - Hrangkhol bible

THUPHUANG 15

¹Khanchu, irvâna thilirkhêl dang roiinpui tak le irkhêltak ki hmua. Vântîrtôn sariin hripui sari an chôia, kha kha dengintheina hnungkhôn takhai an ni; kha tena khan Pathian ningmurna a hek tâk sikin.

²Khan, hlîmen mei leh irpol tuikhanglian nia irhoi taka inlang ki hmua. Sahrâng le a’rlim le a’rhming nambar inhnêtuhai kha ki hmu sa. Pathian perkhuang chôiin, hlîmen tuikhanglian muanga khan an ngîra.

³Pathian suak Mosia hla le Belrate hla an saka, “Rengpa Pathian Itinrêngthothei, Ni sinthohai chu a roiinpuiin ar khêl tak tak! Nangma chu nam tinhai laia Inlaltak, Ni lampuihai chu a felin a dik tak tak!

⁴Rengpa, tu mo nang chi loia, a chôiindôm loi hrang? Nangma vai ni’rthianga, Ni sintho felhai kha mi tinin an hmu tâk sikin. Nam tinrêngin chubai nang hong mûk an ti,” tiin.

⁵Kha zoiin chu ki hong ena, irvâna tempil irhong, a sûnga Pathian omna Biakbuk kha ki hong hmua.

⁶Khanchu, kha tempil ata irthokin hremna sari chôi vântîrtôn sarihai kha tempil ata an zuang chuma; puan irnêm chek, vâr irtêk tak silin, rângachak hruiin an rôp an khita.

⁷Kumtuanga hring mai Pathian ningmurnaa sip rângachak berbu sari kha thilhring minlihai laia inkhat khan vântîrtôn sarihai kha a pêka.

⁸Tempil kha Pathian roiinpuina le sinthotheina khu khan a sip zita, vântîrtôn sarihai ichôi hremna sari kha a hek mâka chu tûte tempila khan lût thei mahai.