Read Hrangkhol THUPHUANG 16 Bible Online

THUPHUANG 16 - Hrangkhol bible

THUPHUANG 16

¹Tempil ata zuang suak irhai inringtak khan vântîrtôn sarihai kuang, “Fe unglân Pathian ningmurna berbu sarihai kha irnênga bunpai roi!” a iti kin hriata.

²Vântîrtôn masa taktu kha a fea, a berbu kha irnênga a bunpaia; khanchu, sahrâng le a’rsinsiananeihai le a’rlim chubai mûktuhai chunga khan pân hri saloi natak a suak tâka.

³Vântîrtôn inhnina khan a berbu kha tuikhangliana a bunpaia; khanchu thisen, mithi thisen angin a om zita, tuia thilhring murdi an thi zit ta.

⁴Vântîrtôn inthumna khan a berbu kha tuidunghai le tuihnârhaia a bunpaia; thisen an chang zit tâk.

⁵Vântîrtôn tuia irchamneitu khan, “Om mai le a om tâka, Nang mi Irthiang, roi ni rêl indik!

⁶Mi irthianghai le deipuhai thisen insuatuhai kha thisen ni in intir lik tâk hi; an dongtum an ihmu kêng,” a iti kin hriat.

⁷Maichâm ata kha, “A ni, Rengpa, Pathian itinrêngthothei, ni roirêlna kha a dikin a fel a ni,” irhai kin hriat sa.

⁸Vântîrtôn minlina khan a berbu kha misaa a bunpaia; misa lum khan mihriamhai em inlông hrangin phal a ni.

⁹Mihriamhai kha misa lum taka em inlôngin an om tâka, kha dengintheina chunga irchamneitu Pathian irhming kha khomâk an sâma, an sual ata irletin ama inpâk ual mahai.

¹⁰Vântîrtôn ringana khan a berbu kha sahrâng rêngtoihmuna a bunpaia. A ram kha inthimin a bôm zit tâka, mihriamhai kha an natir hrai sikin an milei an sêa;

¹¹an na sik le an pân sika khan irvân Pathian khomâk an sâma, an sintho saloihai ata kha irlet ual mahai.

¹²Vântîrtôn kirukna khan a berbu kha Eufrates tuipuia khan a bunpaia, a tui kha a kang chat tâka; nisua tiang ata rêng zuang hranghai ta hrangin lam a irhong tâk a ni.

¹³Khan, Dragon bâi ata, sahrâng bâi ata, deipu dol bâi ata hong suak irtha porinche inthum, uichok anga om ki hmu sa.

¹⁴Kha kha ramilhli irtha an ni, sinirkhêl khom an tho ngai. Pathian Itinrêngthothei nikho roiinpui irdoinaa hruai irchunkhôm hrangin irtha inthumhai kha rammual pumpuia rênghai murdi kuang an fea.

¹⁵“Irngai u ta! Inru angin ki izuang kêng! Irsiama irvô zoi diama omhai chu an vân a sa, silkai boiin a mualinphoi no hrang sikin.

¹⁶Khanchu, irthahai khan rênghai kha hmun inkhata, Hebrai chonga Armagedon an itia khan an koibûmhai tâka.

¹⁷Vântîrtôn sarina khan chu a berbu kha boiruaka a bunpaia, tempila rêngtoihmun ata irhai inring tak a zuang suaka, “ar zoi tâk!” tiin.

¹⁸Khan, kôl a’rtêka, irhai a zuang suaka, khonri, hnîngnu a hong inhnînga. Mihriam siam phut ata khaang dôra hnîngnu tho kha la om ngai mah. Khaanga hnîngnupui kha a natak a ni.

¹⁹Kho roiinpui kha hmun thumin a hong koia, ram tina khopuihai a chim tâka. Babulon kho roiinpui kha Pathianin an hriat chiana, a ningmurna khilât kha an intir tâka.

²⁰Chômbung murdi a boia, tânghai khom ar hmang zit ta.

²¹Irvân ata irial lian tak tak, her sômringa ang dôra rik, mihriam chunga a tâka. Irial hremna sika khan Pathian kha an hrilsiata, kha hremna kha a na ta hrai sikin.