Read Hrangkhol THUPHUANG 17 Bible Online

THUPHUANG 17 - Hrangkhol bible

THUPHUANG 17

¹Berbu sari chôi vântîrtôn sarihai laia inkhat kha a honga, a ni hong chongpuia. “Hong ta, tui tamtak chunga toi, notizuar irhming inthang tak chunga hremna om hrang kha nang irhmutir ki ti.

²Irnênga rênghaiin an indit ngaia, irnênga omhai khom a hurna zu khan a vâi inruitir ngai,” a tia.

³Vântîrtôn khan Irtha ramchâra a ni fepuia, Pathian hrilsiatnaa sip, lu sari nei le irki sômkhat nei, sahrâng seninlâr chunga chuang nupangnu ki hmua.

⁴Nupangnu kha puan senduk le seninlârin a’rvoa, rângachak irthei hai, lung mantam hai, sailungvârhaiin a’rvoa. A kutin intirom le a hurna porinchena sip rângachak khilât a chôia.

⁵A michala khan irhming, a omzia irthup, “Babulon kho roiinpui, irnênga notizuarhai le thil intiromhai nu,” iti irziak a oma.

⁶Khan, kha nupang kha Pathian mihai thisen le Jisua mârtârhai thisen inruiin ki hmu. Ki hmu le chu a sân ki’rngai a’rkhêl tak taka

⁷Vântîrtôn khan, “Ithoa mo ar khêl ni iti?” a tia. “Nupangnu le a chuangna sahrâng lu sari le irki sôm nei omzia irthup kha nang hril ki ti.

⁸Sahrâng kha voikhat a lei om tâka, om nôk ta mah. Khannisianlân, khurmongboia irthokin hong suak a ta, irhmangnaa fe a ti. Irnênga mihriam omhai, irnêng le irvân siam mâna hringna lekhabua an irhming irziak loihai khan, sahrâng kha an hmu tena chu, a om tâk, om nôk ta loi, khannisianlân, a hong om nôk hrang tâk sikin, an irngai la’rkhêl tak tak a ti.

⁹Hi hin vârna le inhriat theina a nang. Lu sarihai kha nupangnu toina tâng sarihai kha an ni. Reng sari khom an ni sa:

¹⁰ringa chu an inrîl tâka, inkhat chu a lan lala, inkhat chu la hong inlal mah, hong inlal khomsian sôtnote kêng a inlal hrang.

¹¹Sahrâng lei om tâk kha, om nôk ta no khom kha rêng sarihai pâla kiriatna a nia, irhmangnaa fe thiai tâk a ni.

¹²“Irki sôm ni ihmuhai kha rêng sôm a lan lal loihai an ni. Khannisianlân, sahrâng le rênghai angin dârkâr khat chu irchamneina ipêk la ni an ti.

¹³Khante an thiltum inkhat a ni sikin an sinthotheina le an irchamneina sahrâng kuang pe an ti.

¹⁴Khanchu, Belrate kha doi an ta, khannisianlân, Belrate kha rênghai Reng, inlalhai Inlaltak a ni sikin anni kha inhnê a ta, a inhnêna kha a ikoihai, a inthanghai le iamoma ama zuituhai khomin dong sa an ti,” a tia.

¹⁵Kha vântîrtôn ngîr khan ki kuang, Notizuarnu toina tui tamtak ni ihmu kha mihai, mipuihai, Jentail hai, le chong dang dang hai an ni.

¹⁶Irki sôm le sahrâng ni ihmu khan notizuarnu kha hnôl an ti. Thil a inei murdi lapai pe zit an ta, bomboiin marak an ti. A hme khom fa an ta, meiin hâlirvôm an ti.

¹⁷Pathian thu le a thil tumhai a hong tung indik theina hrangin, rêng sômkhathai khan an irchamneina sahrâng kuang pe hrangin Pathianin lung irrualna an neia.

¹⁸Khan, “Nupangnu ni ihmu kha kho roiinpui, irnênga rênghai chunga roirêltu kha a ni,” a tia.