Read Hrangkhol THUPHUANG 18 Bible Online

THUPHUANG 18 - Hrangkhol bible

THUPHUANG 18

¹Kha zoiin chu vântîrtôn dang irvân ata zuang chum ki hmua. Ama khan irchamneina lian tak a neia, a roiinpuina’n irnêng pumpui a êl invâra.

²Ama khan hnukirhai inring takin, “Babulon kho roiinpui an rîl ta! an rîl ta! Ramilhlihai omna le irtha porinche hai, va porinche tinrêng chêng inbualna a hong ni ta.

³A hurna uain hrât kha nam murdi’n irnênga rênghaiin ama kha an uirepui ngaia, a hoihôkna thil irchôk hraina sikin rammuala bepârhaiin an irchong sa ngai,” tiin a khêka.

⁴Khanchu, irvâna irthokin hnukirhai dangin, “Hong suak roi, ki mihai! Kha nu kuang ata kha hong suak roi! A sualnahaia nin ikop viat hrang ni mah! A hremnahai hi nin tuang sa loina hrangin.

⁵A sualna khan irvân a phâka, Pathianin a thilsual tho kha a inhriat chian a ni.

⁶Nin chunga a itho angin a chunga tho unglân, A sinthohai murdi a bâk inhniin thuan unglân, Zu nangni a irfûk pe hranga bâk hnia hrâtin a khilât insip pe roi.

⁷Roiinpui a irti le a hoihôkhai ang takin hremna le beidongna’n thuan roi. A lungrîlin, ‘Rengnu’n ki toia! Meithâi ni ma ung. Beidongna tong viat no ning!’ a iti kêng.

⁸Khasika khan, sûn khat sûngin hremnahai, natnathai, beidongna hai, le châm hai hong tung zit a ti. Meiin hâlirhmang ni a ti, a roirêltu Rengpa Pathian kha a hrât sikin,” a tia.

⁹Irnênga rênghai a uirepui ngaihai le a nuamninga a iompui ngaihai khan, a kângna khu kha an hmu tikin chu beidongna’n la chap an ti.

¹⁰A hremna kha tuang sa an chi sikin hla tak ata thîr an ta, “Babulon kho roiinpui le kho det, ni chung a rik! Ni chung a rik! Dârkâr khat sûngin te ni chunga roirêlna a itung tâk hi,” an tia.

¹¹Rammuala bepâr thohai khom khan beidongin an châa, tûte’n an neinun an irchôk ta no sikin.

¹²A nei sunhai chu rângachak hai, sum hai, lunghlu mantam hai, sailungvâr hai, puan irnêm hai, puan senlâr le senduk hai, sotor hai, puan seninlâr hai, thing mirimhoi zât tinrêng hai, sâihaa siam thil tinrêng hai thing hlutak le dâr, thîr, sailungvâra siam thil tinrêng hai;

¹³thingzungthum hai, mosola hai, bero hai, mura hai, mirimhoi hâl zât hai, uain le oliv hriak hai, baidi le bu hai, sehrât le belra, sakor le tâli, suak hai le mihriam hringna hai an ni.

¹⁴Bepâr thohai khan a kuang, “Thil sa a nei ni irzukhai murdi kha an irhmang zit tâka, nir chongna le ni roiinpuina murdi khom an boi zoi tâk, hmu nôk ta no chi ni,” an tia.

¹⁵Bepâr thohai, ama sika hong irchonghai khan a hremna kha an tuang sain teh ti chi sikin hlataka ngîr an ti, beidongin châ an ti,

¹⁶“Kho roiinpui, puan irnêm le a senduk le a seninlâr sila, rângachak le lunghlu mantam le sailungvâra irvô ngai a chung a rik! A chung a rik e!

¹⁷Dârkâr khat sûngin te kha a irchongna murdi kha a irhmang zit tâk hi,” ti an ti. Irkuang hruaituhai le a chuanghai le a chalaituhai le tuia irhlo ngai murdihai khom khan hlataka ngîrin,

¹⁸a ikângna meikhu kha an hmu’n chu, “Hi kho roiinpui anga hi chu la om viat ngai mah!” tiin an khêka.

¹⁹An lua bâli an phula, beidongin an châa, “Kho roiinpui ar chongna sika tuikhanglian irkuang neihai khom lei irchong sa thei! A chung a rik! A chung a rik! Dârkâr khat sûngin te ar hmang zit lam tâk hi,” tiin an khêka.

²⁰O irvân le Pathian mihai, tirtônhai le deipuhai, a ramna sika hin lôm ta roi! Nin chunga a tho lam angin Pathianin a irêl tâk a ni hi!

²¹Khanchu, vântîrtôn hrât tak hin bu nôina lung lianpa ang dôr lung a lâka, tuikhangliana an zuana, “Babulon kho roiinpui chu kha dôra na khan inzuan ni a ta, tûte’n hmu nôk ta no nihai.

²²Serânda irhai, mihriam hla sak irhai, theihle irhai le bekul irhai, ni sûnga inhre nôk ni viat ta no ni! Sin zongna lam rêng rênga sin thiam mi ni sûnga om nôk viat ta no nia, bunôina irhai khom ni sûnga inhre nôk ni ta no ni!

²³Meiser vâr khom ni sûnga hmu nôk ni ta no ni, pasal le moi irhai ni sûnga inhre nôk ni viat ta no ni. Ni bepârhai kha rammual pumpuia mi lianhai an nia, ni dôi milakin rammual pumpuia mihai huangin an iom a ni ta!” a tia.

²⁴A sûnga deipuhai le Pathian mihai le irnênga ithat murdihai thisen suakna a ni sikin Babulon kha ihrem a ni.