Read Hrangkhol THUPHUANG 19 Bible Online

THUPHUANG 19 - Hrangkhol bible

THUPHUANG 19

¹Kha zoiin chu irvâna mipui tamtakhai khêk irhai inring tak angin, “Haleluia! Saninhringna, roiinpuina, sinthotheina hai ei Pathian ta a ni!

²A roirêlnahai khom a dikin a ifel a ni! Ama khan notizuar inthang, a uirena sika irnêng insiat ngainu le a suakhai thisen insua ngai kha thiamno inchangin Pathianin deng an theitir tâk sikin,” an iti kin hriat.

³Khan, an khêk nôka, “Haleluia! Kho kângna meikhu kha kumtuangin chung tiang intor mai a ti,” an tia.

⁴Khanchu, upa sômhni minlihai le thilhring minlihai khan inbokin, “Amen! Haleluia,” tiin Pathian, rêngtoihmuna toitu kha chubai an mûka.

⁵Khan, rêngtoihmuna irthokin hnukirhai a hong suaka, “Nangni suakhai murdi le ama mahrip thohai ngai, mi lian le mi chînhai, ei Pathian inpâk roi!” a tia.

⁶Khanchu, mipui tamtak hnukirhai angin le tuitâk irhai angin le khonripui irhai angin, “Haleluia, Rengpa ei Pathian Itinrêngthothei khan roi a rêl ta!

⁷Râifân le lôm takin a roiinpuina chôiindôm ei ti! Belrate dôngma nei zoro a ni ta, a moi khom ar siam zoi ta.

⁸Puan irnêm, fâitak le irtêk tak a sil hrangin pêk a ni,” a iti kin hriat. (Puan irnêm kha Pathian mihai sintho sa a ni.)

⁹Vântîrtôn khan ki kuang, “Belrate irneina hruaithea fialhai chu an vân a sa,” ti irziak roh, a tia. Ama dênin ki kuang, “Hihai hi Pathian thu dikhai a ni,” a ti saa.

¹⁰Khanchu, chubai mûk hrangin a ke bula kin boka, khannisianlân, ama khan ki kuang, “Hiang hin chu tho no roh, kei khom nangma le ni urênghai le Jisua thutak inpuang pomhai suak chanpui kêng ki ni. Pathian chubai mûk roh!” a tia. Thutak Jisua inpuang kha thu’nsîr theina irtha a ni.

¹¹Khan, irvân irhong ki hmua, sakor ngoi le a chunga chuang iamom le dik taka an iti ki hmu sa. Ama khan fel takin roi a rêla, a râl a doi ngai.

¹²A mithai kha meichok angin a oma, rênglukhum tamtak a khuma. A chunga irziak irhming ama bana chu tûte’n a omzia an inhriat loi, a nei sa.

¹³Songkol irfual, thisen kop chit an nghâka, a’rhming chu “Pathian Thu,” a ni.

¹⁴Irvâna sipaihai khan puan irnêm chekhlang le fâi tak sila, sakor ngoihai chunga chuangin an zuia.

¹⁵A bâia irthokin khandai ngaihtak a hong suaka, ama khan nam tin inhnê a ti. Thîr khianghrolin an chunga roirêl a ta, Pathian Itinrêngthothei ningmur inrikna grep sômna khura khan sirpha a ti.

¹⁶A puan le a malpuia khan, “Renghai Reng le Hruaituhai Hruaitu,” tia irhming irziak a om.

¹⁷Khan, misaa khin vântîrtôn ngîr ki hmua, vântîrtôn khan irvânlaizôla va vuang murdihai kuang hnukirhai inring takin a khêka, “Pathian hruaithe roiinpuitak irhîl hrangin hong irbûm roi!

¹⁸Hong unglân, rênghai, sipai ulianhai, sipaihai, sakor le a chunga chuanghai hme, mi murdi suak le suak ni loi, a lian le a chînhai hme nin fâk theina hrangin!” a tia.

¹⁹Khanchu, sahrâng le irnênga rênghai le an sipaihai kha sakor chunga chuang le a sipaihai doi hrangin an irbûm ki hmua.

²⁰Sahrâng kha an chela, deipu dol, a mit hmua sinirkhêlhai sin ngaipu kha an chel saa. (Kha sinirkhêlhai sika khan sahrâng irsinsiana neihai le a’rlim chubai mûkhai kha a ihuang ngai a ni). Sahrâng le deipu dol kha an ruaiin an hring pumin kâta kâng mei laia khan an paithâk tâka.

²¹An sipaihai kha chu sakor chunga chuangtu bâia khandai suaka khan an sâta, va murdi’n an hmehai kha an fâka, an khop tâka.