Read Hrangkhol THUPHUANG 22 Bible Online

THUPHUANG 22 - Hrangkhol bible

THUPHUANG 22

¹Khan, vântîrtôn khan hringna tui vadung krustal lung anga irtêk, Pathian le Belrate rêngtoihmun ata zuang luang kha a nin entira,

²Khopui kholai inlaina taka a luanga. Khan, muang kiang tiang, kiang tianga hringna thing , thatin voikhat, a kuma voi sômhleihni ra a oma; kha thing hnahai kha nam tin damna a ni.

³Khopuia khan Pathian khomâksâm rêng rêng om ta no ni. Pathian le Belrate rêngtoihmun kha om ta a ta, a suakhai khan chubai mûk an ti.

⁴A hmêl hmu an ta, ar hming an michala chuang sa a ti.

⁵Zân om ta no nia, meiser le misa khom nang ta no ni; Rengpa Pathian khan êl invâr ta a ta, kumtuang kumtuangin rênghai angin roirêl ta an ti.

⁶Khan, vântîrtôn khan ki kuang, “Hi thuhai hi iam a omin a idik a ni. Deipuhai kuang ama Irtha pêktu Rengpa Pathian khan thil hong tung zôi hranghai kha a suakhai kuang en hrangin vântîrtôn a itîr a ni,” a tia.

⁷Jisua’n, “Irngai roh! Ki izuang zôi zel hrang tâk kêng! Hi lekhabu lei hrilna pomhai ka chu an vân a sa,” a tia.

⁸Kei Johana hi, hi thil murdihai hmupu le inhrepu ki ni. Kin hriata ki hmu zoi le chu kha thilhai nin entirtu vântîrtôn ke bula chubai mûk hrangin kin boka.

⁹Khannisianlân, ama khan ki kuang, “Khaang khan chu tho no roh. Kei khom nangma le ni urêng deipuhai le hi lekhabu thu pom murdihai suak chanpui kêng ki ini, Pathian chubai mûk roh!” a tia.

¹⁰Khanchu, ama khan ki kuang, “Hi lekhabu lei hrilna thuhai hi ip no roh, hihai murdi hong tungna hrang hi anai tâk sikin.

¹¹Tukhom mi felloi chu thil felloi sin mai a ta, tukhom mi porinche chu porinche om mai a ti; tukhom mi sa chu thil sa tho mai a ta, tukhom mi irthiang chu irthiangin om mai a ti,” a tia.

¹²Jisua’n, “Irngai roh! Ki izuang zôi zel hrang tâk kêng! mi tin an sintho ang senga pêk hrangin ki lômman ki kuang a om.

¹³Kei Alfa le Omega, a maton tak le a hnungkhôn tak, a Bul le a Mong ki ni,” a tia.

¹⁴Hringna tuikuanga thei ra kha an fâk theina hrang le khopui kha an lût theina hranga an puan irsûk infâihai chu an vân a sa.

¹⁵Khopui pên tiang chu uihai, dôi theihai, irdit saloihai, mi thathai, millim biakhai, chong le sinthoa milakhai kha om an ti.

¹⁶“Kei, Jisua’n, hi thuhai hi Koiindanghai nin kuanga inpuang hrangin ki vântîrtôn ki zuang tîr a ni. Davida bulpui le a chi, sikhovâr vârtak ki ni,” a tia.

¹⁷Khan, Irtha le moi khan, “Hong roh!” an tia. An hriat murdi’n, “Hong roh!” ti sa ngêt ri se. Tukhom a tuiinhrâl murdi chu hong roi; a nuam murdi’n hringna tui hi manboiin in ri se.

¹⁸Kei, Johana’n, tukhom hi lekhabu lei hrilna thu inhriat murdi’n chu ngar takin kin hriattir: Tukhomin hi thuhai hi a bôkin chu, hi lekhabua a ihril hremnahai hi a chunga Pathianin bôk pe a ti.

¹⁹Khan, tukhomin hi hrilna lekhabua thu a paiin chu hi lekhabua a ihril a dongtum hringna thing kunga thei ra le Khopui Irthianghai kha Pathianin indoktir a ti.

²⁰Hi thu inhretuhai hin, “A ni tak tak! Ki izuang hrang tâk kêng!” a ti. Amen, zuang ta roh, Rengpa Jisua!

²¹Rengpa Jisua lungkhamna kha mi tin kuang om ri se, Amen.