Read Hrangkhol THUPHUANG 5 Bible Online

THUPHUANG 5 - Hrangkhol bible

THUPHUANG 5

¹Khan, rêngtoihmuna toitu kut chang tianga khan lekhabu irzuat sûng tiang pên tianga irziak, irsinsiana sari neia irsinsia khak ki hmua.

²Vântîrtôn hrâttak, hnukirhai inring takin, “Tu’n mo hi irsinsiana hi inhonga, lekhabu irzuat hi a phar thei hrang tâk?” tia tânginsam ki hmu sa.

³Khannisianlân, irvâna, irnênga, irnêng hnuaia khom lekhabu irzuat kha an hong thei le a en theirua tûte om mahai.

⁴Lekhabu irzuat kha an honga, a en theirua tûte an om no sikin ki chap ngûi ngûia.

⁵Khanchu, upahai laia inkhatin ki kuang, “Chap no roh. Irngai ta! Juda nama mi Kâmkeibaknei, Davida bulpui khan, a’rsinsiana sari kha inhonga, lekhabu irzuat kha phar hrangin an hnê ta,” a tia.

⁶Kha hnung chu, rêngtoihmun inlaina tak, thilhring minlihai le upahai irhîlin Belrate ngîr that tâk anga inlang, irki sari le mit sari nei ki hmua; kha mit sarihai kha chu Pathian irtha sari, irnêng chung pumpuia tîr suakhai kha an ni.

⁷Belrate kha a fea, rêngtoihmuna toitu kut chang tianga lekhabu irzuat kha a va lâk tâka.

⁸Lekhabu irzuat kha a lâk le chu, thilhring minli le upa sômhniminlihai kha, serânda le rângachak berbu mirimhoia sip chôi sengin, Belrate makunga khan an inboka; kha mirimhoi kha Pathian mihai chongchaina a ni.

⁹“Nangma lekhabu irzuat kha lâka, A’rsinsiana inhongrua ni ni; Thatin ni oma, ni thina sika khan chi tina mihai, chong tina mihai, ram tina mihai, Pathian ta hrangin ni thisenin nir chôk tâk.

¹⁰Kin Pathian sintho hrangin khua le tuia le ochaihaiin ni siam tâka; Khanchu, irnênga roirêl an ti,” tiin hla thar an saka.

¹¹Ki hong en nôka, rêngtoihmun le thilhring minlihai le upahai kôla khan vântîrtôn tamtak hnukirhai kin hriata; an tam lam chu a sâng a sâng hmun sâng tamtak le a sîng a sîngin sîng tamtak an ni.

¹²Khahai khan hnukirhai inring takin, “Belrate that tâk hi, Sinthotheina hai, irchongna hai, vârna hai, hrâtna hai, chôiindômna hai, roiinpuina hai le inpâknahai hmurua a ni,” an tia.

¹³Khabana, irvân le irnêng chung le irnêng hnuai le tuikhangliana thilhring tinrênghai le rammual sûnga thilhring om murdihaiin, “Rengtoihmuna toitu le Belrate kuanga khan, Inpâkna hai, chôiindômna hai, roiinpuina hai le sinthotheina hai, kumtuangin om ri se,” ti hla an isak kin hriat sa.

¹⁴Thilhring minlihai khan “Amen!” an tia, upahai khan inbokin chubai an mûka.