Read Hrangkhol THUPHUANG 7 Bible Online

THUPHUANG 7 - Hrangkhol bible

THUPHUANG 7

¹Kha irzoiin chu, muanga le tuikhangliana le thingkunghai rêng rênga phâivua a tho ta loina hrangin phâivua chela irnêng kil minlia ngîr vântîrtôn minli ki hmua.

²Vântîrtôn dang, Pathian hring irsinsiana chôi, nisua tianga hong suak ki hmu. Ama khan vântîrtôn minli Pathianin irnêng le tuikhanglian siat theina thu a ipêkhai kha hnukirhai inring takin an sâma.

³Vântîrtôn khan an kuang, “Ei Pathian suakhai an michala irsinsiana ei sia mâka chu irnêng le tuikhanglian le thingkunghai kha lan siat no roi,” a tia.

⁴An michala Pathian irsinsiana zonhai hrilin ki oma, nuaihni sîngminli le sângminli an ni. Khahai kha Israel nam sômhleihnihai an ni.

⁵Juda nama sîngkhat sânghni, Reubena nama sîngkhat sânghni, Gada nama sîngkhat sânghni,

⁶Asera nama sîngkhat sânghni, Naftalia nama sîngkhat sânghni, Manasea nama sîngkhat sânghni,

⁷Simeona nama sîngkhat sânghni, Levia nama sîngkhat sânghni, Isakara nama sîngkhat sânghni,

⁸Zebuluna nama sîngkhat sânghni, Josefa nama sîngkhat sânghni, Benjamina nama sîngkhat sânghni irsinsia tak tak an ni.

⁹Kha irzoiin chu ki hong ena, mipui tam irkhêl tep zoiloi, zât tin, chi tin, nam tin le chong tina mihai puan chek sila tûm ônhai chôiin, rêngtoihmun le Belrate makunga ngîr ki hmua.

¹⁰Khahai khan hnukirhai inring takin, “Saninhringna hi ei Pathian, rêngtoihmuna toitu le Belrate kuanga irthoka a ni,” tiin an khêka.

¹¹Vântîrtônhai murdi kha rêngtoihmun le upahai le thilhring minlihai kôla khan an ngîra, rêngtoihmun makunga khan inbokin,

¹²“Amen! Inpâkna hai, roiinpuina hai, vârna hai, lômthu insîrna hai, chôiindômna hai, Sinthotheina hai, Kumkhontuangin ei Pathian ta a ni mai! Amen!” tiin Pathian chubai a mûka.

¹³Khan, upahai laia inkhatin ki kuang, “Hi puan chek silhai hi tuhai man ni, kho rengata hong mo an ini?” tiin a nir dona.

¹⁴“Ka pu, inhre ma ung. Nangma’n nin hriat,” tiin ki sâma. Ama khan ki kuang, “Hihai hi dengintheina ichiom tak ata hong zôkhai kha an nia, an puanhai Belrate thisena irsunfaiin an inchek tâkhai a ni.

¹⁵Khasikin, Pathian toihmun makunga ngîrin, sûn le zânin a biak ina sin an tho ngai, khan, rêngtoihmuna toitu khan a puan in an chunga zâr a ti.

¹⁶An phîngchâm ta no nia, an tui khom inhrâl ta no ni. Misa’n emhai ta no nia, a sâna lum rêng rêng tuang ta no nihai.

¹⁷Belrate, rêngtoihmun inlainaa om kha a enkoltu ni a ta, hringna tuikhanglianhaia tuang a ti. Khanchu, Pathianin an mit ata mitrithi tinrêng huipai ta a ti,” a tia.