Read Hrangkhol THUPHUANG 9 Bible Online

THUPHUANG 9 - Hrangkhol bible

THUPHUANG 9

¹Vântîrtôn ringana khan a bekul a hong tuma, khanchu, ârsi, irvân ata irnênga tâk ki hmua, a kuang khurmongboi châbi an pêka.

²Ârsi khan khurmongboi kha a inhonga, khur ata kha meikhu, meipui thi theiloi khu khak angin a hong suaka, kha meikhu sika khan misa le irvân hai a hong inthim ta.

³Meikhu ata khâihai irnênga an zuang tâka, âinuvêthaiin sinthotheina an inei ang takin an kuang sinthotheina an pêka.

⁴Irnênga hloisûl hai, thilhring hai le thingkung hring hai rêng rêng chu sê viat loia, mihriam an michala Pathian irsinsiana nei loihai vai kha sê hrangin an hrila.

⁵Khan, khâihai kha mihriamhai kha that hrangin chu pe maka, tha ringa sûng denginthei hrangin an pêk. Deng an theizia chu âinuvêtin mi a sêa, deng a intheitir ang hi a ni.

⁶Kha sûnga khan chu thina zong an ta, hmu viat no nihai; thi irzuk an ta, khannisian, thina’n marakhai a ti.

⁷Khahai kha sakor irdoina fe hranga irsiam chak an anga; an lua khan rângachak rênglukhum ang zek khuma, an hmâihai kha mihriam hmâi a anga.

⁸An sam kha nupang sam angin a oma, an ha kha kâmkeibaknei ha angin a om.

⁹Thîr rôppho ang hin rôppho an neia, an mithâ zâp irhai chu sakor tamtakin irdoina hmun pana sakor tâlihai an intânpui sup sup irhai ang kha a ni.

¹⁰Âinuvêt angin irmei le sêna hrang an neia, tha ringa sûng mihriamhai innatir theina khom an irmeia khan a iom a ni.

¹¹Khur mongboia vântîrtôn kha rêng angin an chunga inlal takin an neia; Hebrai chonga a’rhming chu Abadona a nia, Grik chonga a’rhming chu Apoluona, a ni. (A omzia chu “An siattu,” tihna a ni).

¹²Thilirkhêl masa chu a theng tâka, thilirkhêl dang inhni, hi zoia hin la om a ti.

¹³Khan, vântîrtôn kirukna khan a bekul a hong tuma, khanchu, Pathian makunga rângachak maichâm irkia irthokin hnukirhai kin hriata.

¹⁴Hnukirhai khan vântîrtôn kirukna kuang, “Eufrates tuidunga vântîrtôn minli ikhithai kha insua ro!” a tia.

¹⁵Kha dârkâr le sûn le tha kum hranga irsiam tâk vântîrtôn minlihai kha, mihriamhai hmun thuma sena hmunkhat that hrangin an insuahai tâka.

¹⁶Sipai sakor chunga chuanghai kha an tamzia chu kror hni an nih ti hrilin ki oma.

¹⁷Inlârnaa khan sakorhai le a chunga chuanghai kha hiang hin ki hmu: rôppho mei anga sen huakin, lunghlu anga dum le kât anga eng an ni. Sakor luhai kha kâmkeibaknei lu ang hin a oma, an bâia irthokin mei hai, meikhu hai le kât hai a suaka.

¹⁸Kha hremna inthumhai: mei, meikhu, le kât an bâia irthoka suak khan mihriam hmun thuma sena hmunkhat chu a that ta.

¹⁹Sakorhai sinthotheina kha an bâia le an irmeia khan a oma; an irmeihai kha mirûl angin a oma, lu an nei saa, ama khan mi an innatir ngai a ni.

²⁰Mihriam, kha hremnaa that banhai khan an kut sinthohai ata irlet ual mahaia; ramilhli hai, rângachak millim hai, sum millim hai, dâr millim hai, lung millim hai, thing millim hai, ite hmu theiloi, inhretheiloi le fe theiloi hai biak kha ma mahai.

²¹An mi that hai, dôi hmang hai, an irdit porinche hai, an inrûkhai ata khom irlet ual mahai.