Read Hrangkhol RUTHI 1 Bible Online

RUTHI 1 - Hrangkhol bible

RUTHI 1

¹Tianlaia roirêltuhaiin roi an rêl lai khan, Israel rama châm a tâka. Judai ram Bethlehem khuaa mi inkhat chu a dôngma le a nâipasal hnihai leh Moab rama om hrangin an fea.

²A’rhming chu Elimelek a nia, a dôngma irhming chu Naomi a ni, a nâipasal hnihai irhming chu Mahlona le Kiliona an ni. Judai ram Bethlehem khuaa Efrata mi an ni. Moab rama khan an fea, kha khan an om mai tâka.

³Naomi pasal Elimelek chu a thia, khanchu, Naomi le a nâipasal hnihai leh vai an om tâka.

⁴A nâipasalhaiin Moab mi dôngma’n an neia, inkhat irhming chu Orpi a nia, inkhat irhming chu Ruthi a ni. Kha rama khan kum sôm vêl an om hnungin,

⁵Mahlona le Kiliona khom an thia, khanchu Naomi kha a pasal leh a nâipasal hnihaiin an thisan tâk a ni.

⁶Khan RENGPA’N a mihai changpuia fâk nêk a pêkhai ti thu Moab ram ata a lei inhriat sikin, a moihai inhni le Moab ram ata kîr nôk hrangin an irsiam tâka.

⁷Khanchu a moihai inhni leh khan an omna mâksanin Judai ram an pan tâka.

⁸Naomi’n a moihai inhni kuang, “Fe unglân, nin nuhai in tiang kîr nôk chian ta roi, nin pasal thi tâkhai le ki chunga satna nin inlangtir lam ang takin, RENGPA’N nin chunga satna inlangtir ri se.

⁹Nin ruaiin pasal dang nin nei nôk theina hrangin RENGPA’N nangni ngaitua pe ri se,” a tia. Annihai kha a tumhaia, inring takin an chap tâka.

¹⁰A moihai khan, “Fe no ni ung, ni mihai kuang ni ifena hrang hmuna nang zui kin ti,” an tia.

¹¹Naomi’n, “Ki nâinuhaio, kîr nôk chian roi, ithoa mo nin ni zui nuam bâka! Nin pasal hrang nâipasal ki la inei nôk thei hrang ma ni?

¹²Ki nâinuhaio, nin in tiang kîr nôk ta roi, pasal la nei nôk hrangin chu ki tar ok tâk sikin. Khan tûngna ki la nei itinin, a vuan zân ngân hin pasal neiin nâipasalhai hong nei ngân ta inlân,

¹³an ulian dênin nin inghâk mai hrang ma ni? Pasal boiin nin iom mai hrang mo? Ni thei make, ki nâinuhaio, nangni sikin ki milung a sân a na, RENGPA kut ki ituang tâk a ni hi,” a tia.

¹⁴Khanchu, irhâi inringtakin an chap nôk tâka, Orpi’n a tarpi kha a tuma, a kîrsan tâka, Ruthi rêkin chu a tarpi a chel ngita.

¹⁵Khan Naomi’n, “En ta, ni moi chanpuinu chu a mihai le a pathian tiang a kîr nôk tâk so, nang khom ni moi chanpuinu zuiin ni in tiang kîr nôk ta roh,” a tia.

¹⁶Khannisianlân Ruthi’n chu, “Nang mâksan hrang le nang zui loi hrangin chu nin thêm no ro; ni fena ti tiang fe ki ta, ni riakna ti tiang riak ki ta, nir chihai chu ki’rchihai ni an ta, ni Pathian chu ki Pathian ni a ti.

¹⁷Ni thinaa thi ki ta, kha khan phûmin om ki ti. Nang le kei hi thina ni loia thil dangin ni sen hrang nêkin chu RENGPA’N i ang khomin a nuam nuamin ni lo ri se,” a tia.

¹⁸Ama zui a tum ngit a nih ti an hriatin Naomi’n a dâisanhrek tâka.

¹⁹Khanchu, an ruaiin Bethlehem dên rakin an fe tâka. Bethlehem an tungin chu, a kho mihai an lei inlâi phuata, nupanghaiin, ‘Hi nu hi Naomi kha ma ni?’ an tia.

²⁰Naomi’n an kuang, “Naomi ni ti ta no roi, Mara ni ti ta roi. Tinrêng thotheitu’n na takin a nin tuangtir tâk a ni hi te.

²¹Irkip takin ki suaka, RENGPA’N kut rongin a ni hruai kîr nôk ta. RENGPA milung hoiloina ki chunga an langtira, Tinrêng thotheitu’n ki chunga dengtheina an tungtir hnungin, itho mo Naomi nin ni la iti mai hi?” a tia.

²²Khanchu, Naomi chu a moinu Moab mi Ruthi leh Moab ram rengata an hong kîra, barli ât a’rphut laitakin Bethlehem khua chu an hong tung tâk a ni.