Read Hrangkhol RUTHI 3 Bible Online

RUTHI 3 - Hrangkhol bible

RUTHI 3

¹Kha zoiin, Naomi’n Ruthi kuang, “Ki nâinu, ni ta hranga vângsakna in hoitak nang ngaitua pe ki ti.

²A siahlo dôngmatehai leh sin ni va ithôna loi neitupa kha kin urêng irnaipui Boaza a ni. Irngai ro, a vuan zân hin hruizôla barli a zâp infâi zân a ni.

³Khanchu tui irsilin lân, sahriak mirimhoi irpolin lân, ni sil le kai puan satak irbelin hruizôla khan zu fe roh. Aniachu, fâk nêk a zong zoi mâka chu a kuang, inlang no roh.

⁴A zâl tika a zâlna kha irsinsia’n lân, khanchu fe’n lân, a ke tianga puan kha lîmin lân zâl roh, khanchu, ama’n ni tho hrang chu nang lei inhril zel a ti,” a tia.

⁵Ruthi’n, “Ni ti anglam takin tho ki ti,” a tia.

⁶Khanchu, hruizôla khan Ruthi a zu fea, a tarpi ihril lam ang takin a thoa.

⁷Boaza chu fâk nêk ar zoiin raifân takin bu pông kôla khan zâl hrangin a fe tâka.

⁸Zân chimrip tena chu Boaza a hong hara, a va’rheiin chu a ke thuana nupang lei zâl mai kha a hmu tâka.

⁹“Tu mo ni ini?” a tia. Ama’n, “Ni siahlo Ruthi ki ni, kin urêng irkaipui bulpui ni ni sikin ni puan kha ni hong irkhu sa ro,” a tia.

¹⁰Boaza’n, “Ki nâinu, RENGPA’N sat nang vur ri se; ruatharte inriang mo irchong mo zui papai loia ni ioma hin, matona nêkin atûna hin ni felzia nin langtir ual tâk a ni.

¹¹Atûn hin, ki nâinu, chi no ro; ni izong ang lam takin ni chunga nang tho pe ki ti. Kin khuaa mi murdihaiin nupang fel tak ni nih ti nang an inhriat ving kêng.

¹²I khom ni sian, ni urêng irkaipui chu ki ni, aniachu keima nêka irnaipui ual a la om.

¹³A vuan zân chu riak photin lân, nangtûka ni urêng irnaipuiin a itho hrang a tho nuam no’n chu keima’n tho ki ti, ti Pathian hring irhmingin chong kin kung, khovâr mân chu zâl phot ro,” a tia.

¹⁴Khanchu, zîng khovâr dênin a ke thuana khan a zâl tâka, mi tukhomin an hmu infel thei loina hrangin zînga a thoia; Boaza’n, “Hruizôla ni ihong hi mi tukhomin inhre no ri sehai,” a tia.

¹⁵Boaza’n a kuang, “Ni puan sil kha hong chôiin lân, dô ro,” a tia. Khanchu a dâpa, barli tîn khat ar tê pea, an pêltira. Ruthi chu a khua tiang a fe tâka.

¹⁶A tarpi kuang a hong tungin chu, “Ki nâinu, imo ni hong chang?” a lei ti pea. Ruthi’n a chunga Boaza’n thil a itho pe murdi kha a hril zita.

¹⁷“Ni tarpi kuang kut korongin kîr no ro, tiin hi barli tîn khat hi a ni ipêk a ni” a tia.

¹⁸Naomi’n, “Ki nâinu thil hong om hrang dân nin hriat mâka chu lei nghâk zâm ro; a vuan hin thil a hong infel mâka chu om chian no ni,” a tia.